វៀតណាម និងអាស៊ែបៃហ្សង់ បង្កើតទំនាក់ទំនងភាពជាដៃគូយុទ្ធសាស្ត្រ

លោក Ilham Aliyev ប្រធានាធិបតីអាស៊ែបៃហ្សង់ និងលោកជំទាវ ទទួល​បដិសណ្ឋារកិច្ច​ លោក To Lam អគ្គលេខាបក្ស​ និងលោកជំទាវ នៅវិមាន Zugulba ក្នុងរដ្ឋធានី Baku (រូប​ថត៖ vnanet.vn)

ពិធីទទួលបដិសណ្ឋារកិច្ច លោក To Lam អគ្គលេខាបក្ស និងលោកជំទាវ រួមទាំងគណៈប្រតិភូជាន់ខ្ពស់វៀតណាមបានប្រព្រឹត្តទៅយ៉ាងឱឡារិកនៅវិមានប្រធានាធិបតី ក្រោមអធិបតីភាពលោក Ilham Aliyev ប្រធានាធិបតី នៃសាធារណរដ្ឋអាស៊ែបៃហ្សង់ និងលោកជំទាវ។

លោក To Lam អគ្គលេខាបក្ស ជួបពិភាក្សា​ការងារ​ជាមួយ លោក Ilham Aliyev ប្រធានាធិបតីអាស៊ែបៃហ្សង់ (រូបថត៖ vnanet.vn)

លោក To Lam អគ្គលេខាបក្ស និងលោក  Ilham Aliyev ប្រធានាធិបតីអាស៊ែបៃហ្សង់ អញ្ជើញ​​​ជាសាក្សីក្នុងពិធីផ្លាស់ប្តូរលិខិតបញ្ជាក់បំណងស្តីពីកិច្ចសហប្រតិបត្តិការរវាងក្រសួងការពារប្រទេស​​វៀតណាម និងក្រសួងការពារជាតិអាស៊ែបៃហ្សង់ (រូប​ថត៖ vnanet.vn)

ថ្លែងទៅកាន់អ្នកសារព័ត៌មាន លោក Ilham Aliyev ប្រធានាធិបតី នៃសាធារណរដ្ឋអាស៊ែបៃហ្សង់ បានឲ្យដឹងថា នៅក្នុងកិច្ចពិភាក្សា ភាគីទាំងពីរបានពិភាក្សាអំពីបញ្ហាសំខាន់ៗជាច្រើន ហើយឯកសារដែលបានចុះហត្ថលេខានៅថ្ងៃនេះបង្ហាញថា ភាគីទាំងពីរកំពុងបោះជំហានសំខាន់ឆ្ពោះទៅអនាគត។ ដំណើរទស្សនកិច្ចផ្លូវរដ្ឋរបស់លោក To Lam អគ្គលេខាបក្ស ទៅកាន់សាធារណរដ្ឋអាស៊ែបៃហ្សង់ និងអញ្ជើញ​ជាសាក្សីក្នុងការផ្លាស់ប្តូរឯកសារកិច្ចសហប្រតិបត្តិការ បានបង្ហាញពីសារៈសំខាន់នៃកិច្ចសហប្រតិបត្តិការទ្វេភាគី ជាពិសេសលើវិស័យមានសក្តានុពលដូចជាការអប់រំ និង logistics ជាដើម។ នាពេលខាងមុខ ភាគីទាំងពីរក៏បានឯកភាពពង្រីកកិច្ចសហប្រតិបត្តិការ ដែលមិនត្រឹមតែលើវិស័យពាណិជ្ជកម្មប៉ុណ្ណោះទេ ថែមទាំងចង់បានសហប្រតិបត្តិការវិនិយោគចូលមកគ្នាទៅវិញទៅមកផងដែរ ព្រមទាំងរៀបចំកិច្ចប្រជុំគណៈកម្មាធិការអន្តររដ្ឋាភិបាលនៃប្រទេសទាំងពីរក្នុងពេលឆាប់ៗនេះ ដើម្បីពង្រឹងការលើកកម្ពស់កិច្ចព្រមព្រៀងសហប្រតិបត្តិការរវាងប្រទេសទាំងពីរ។

នាពេលខាងមុខ លោក Ilham Aliyev ប្រធានាធិបតីអាស៊ែបៃហ្សង់ចង់ឱ្យមានតុល្យភាពរចនាសម្ព័ន្ធពាណិជ្ជកម្មរវាងប្រទេសទាំងពីរ ព្រមទាំងត្រូវការព័ត៌មានទាក់ទងនឹងគម្រោងជាក់លាក់ ដោយប្រកានេះវាមានសារៈសំខាន់សម្រាប់អង្គភាពអាជីវកម្មនៃប្រទេសទាំងពីរ។ ប្រសិនបើភាគីទាំងពីរផ្តល់ព័ត៌មានពេញលេញនោះការផ្លាស់ប្តូរទំនិញ និងពាណិជ្ជកម្មពិតជានឹងកើនឡើង។ ទោះបីជាភូមិសាស្រ្តនៅឆ្ងាយពីគ្នាក៏ដោយ ក៏ការពង្រឹងកិច្ចសហប្រតិបត្តិការលើវិស័យដែលភាគីទាំងពីរមានឧត្តមភាពនឹងនាំមកនូវប្រសិទ្ធភាពខ្ពស់ដូចជា ការអភិវឌ្ឍថាមពលថ្មី និងឧស្សាហកម្មការពារជាតិ រួម​ទាំងកិច្ចសហប្រតិបត្តិការដែលមានផលប្រយោជន៍ទៅវិញទៅមកនៅវេទិកាពហុភាគី អង្គការសហប្រជាជាតិ...

លោក To Lam អគ្គលេខាបក្ស និងលោក Ilham Aliyev ប្រធានាធិបតីអាស៊ែបៃហ្សង់ អញ្ជើញ​ចូល​រួម​សន្និសីទសារព័ត៌មានរួម ដើម្បីប្រកាសលទ្ធផលនៃកិច្ចពិភាក្សា (រូប​ថត៖ vnanet.vn)

លោកប្រធានាធិបតីអាស៊ែបៃហ្សង់ បានអះអាងថា នេះជាដំណើរទស្សនកិច្ចលើកដំបូងរបស់អគ្គលេខាបក្សកុម្មុយនិស្តវៀតណាមទៅកាន់អាស៊ែបៃហ្សង់ចាប់តាំងពីប្រទេសទាំងពីរបានបង្កើតទំនាក់ទំនងការទូតក្នុងឆ្នាំ១៩៩២មក។ ប្រកានោះបង្ហាញពីការគោរព និងការប្តេជ្ញាចិត្តរបស់វៀតណាមក្នុងការជំរុញកិច្ចសហប្រតិបត្តិការជាមួយអាស៊ែបៃហ្សង់លើគ្រប់វិស័យ សមស្របនឹងទំនាក់ទំនងមិត្តភាពជាប្រពៃណីល្អ និងសក្តានុពលសហប្រតិបត្តិការរវាងប្រទេសទាំងពីរ។

ថ្លែងទៅកាន់អ្នកសារព័ត៌មាន លោក To Lam អគ្គលេខាបក្ស បានថ្លែងអំណរគុណចំពោះការស្វាគមន៍យ៉ាងកក់ក្តៅ ដែលលោកប្រធានាធិបតី ថ្នាក់ដឹកនាំ និងមិត្តភ័ក្តិ នៃប្រទេសអាស៊ែបៃហ្សង់ ជូនចំពោះគណៈប្រតិភូជាន់ខ្ពស់វៀតណាម។ លោកអគ្គលេខាបក្សបានមានប្រសាសន៍ថា ភាគីទាំងពីរទើបតែបានជួបពិភាក្សាគ្នាប្រកបដោយជោគជ័យ និងបានឯកភាពគ្នាលើទិសដៅយុទ្ធសាស្ត្រជាច្រើនដើម្បីអភិវឌ្ឍទំនាក់ទំនងទ្វេភាគីនាពេលខាងមុខ។ ភាគីទាំងពីរមានសេចក្តីសោមនស្សរីករាយដែលឃើញថាទំនាក់ទំនងមិត្តភាពជាប្រពៃណីដ៏ល្អរវាងវៀតណាម និងអាស៊ែបៃហ្សង់ត្រូវបានបង្កើតឡើងក្នុងដំណើរទស្សនកិច្ចជាប្រវត្តិសាស្ត្ររបស់លោកប្រធានហូជីមិញទៅកាន់អាស៊ែបៃហ្សង់ក្នុងឆ្នាំ១៩៥៩ បន្ទាប់មកមានដំណើរទស្សនកិច្ចជាច្រើនលើករបស់ថ្នាក់ដឹកនាំជាន់ខ្ពស់នៃប្រទេសទាំងពីរ ហើយត្រូវបានពូនជ្រំជាបន្តបន្ទាប់ដោយការខិតខំប្រឹងប្រែងរបស់ប្រជាជននៃប្រទេសទាំងពីរនោះ សម្រេចបានសមិទ្ធិផលសំខាន់ៗជាច្រើនលើវិស័យនយោបាយ សន្តិសុខ ថាមពល ពាណិជ្ជកម្ម-វិនិយោគ ការអប់រំ-បណ្តុះបណ្តាល។ល។

ដោយផ្អែកលើសមិទ្ធិផលដ៏រឹងមាំ និងសក្តានុពលដ៏ធំធេងសម្រាប់កិច្ចសហប្រតិបត្តិការនោះ ភាគីទាំងពីរបានឯកភាពអនុម័តសេចក្តីប្រកាសរួមស្តីពីការបង្កើតទំនាក់ទំនងភាពជាដៃគូយុទ្ធសាស្ត្រ បើកដំណាក់កាលថ្មីនៃការអភិវឌ្ឍ​ក្នុងទំនាក់ទំនងទ្វេភាគី។ ក្របខណ្ឌនៃកិច្ចសហប្រតិបត្តិការនេះនឹងបង្កើតមូលដ្ឋានគ្រឹះដ៏រឹងមាំដើម្បីពង្រឹង និងពង្រីកទំនាក់ទំនងវៀតណាម-អាស៊ែបៃហ្សង់ឱ្យកាន់តែស៊ីជម្រៅ ទាញយកផលប្រយោជន៍ពីឧត្តមភាពរបស់គ្នាទៅវិញទៅមក ដើម្បីឲ្យប្រទេសទាំងពីរអាចបន្តអភិវឌ្ឍយ៉ាងឆាប់រហ័ស និងនិរន្តរភាពក្នុងស្ថានភាពថ្មី។

គួរំលឹកថាក្នុងក្របខ័ណ្ឌនៃដំណើរទស្សនកិច្ចផ្លូវរដ្ឋនៅសាធារណរដ្ឋកាហ្សាក់ស្ថាន នាថ្ងៃទី ៧ ឧសភា (ម៉ោងក្នុងតំបន់) លោក To Lam  អគ្គលេខាបក្ស និងលោកជំទាវ Ngo Phuong Ly និងគណៈប្រតិភូជាន់ខ្ពស់វៀតណាមបានអញ្ជើញចូលរួមពិធីរំលឹកខួបលើកទី ៨០ នៃទិវាជ័យជំនះលើហ្វាស៊ីស ដែលបានធ្វើឡើងនៅទីលានឯករាជ្យក្នុងរដ្ឋធានី Astana៕

បកប្រែដោយ Duy Hoan