លោក To Lam អគ្គលេខាបក្សកុម្មុយនិស្តវៀតណាមទទួលជួបនាយករដ្ឋមន្ត្រីជប៉ុន

នៅក្នុងជំនួប លោក To Lam អគ្គលេខាបក្ស បានលើកឡើងទិសដៅសំខាន់ៗចំនួន ៧ ដើម្បីពង្រឹងកិច្ចសហប្រតិបត្តិការយុទ្ធសាស្ត្ររវាងវៀតណាម និងជប៉ុននាពេលខាងមុខ រួមទាំងការបង្កើនការជឿទុកចិត្តផ្នែកនយោបាយ និងពង្រឹងកិច្ចសហប្រតិបត្តិការសន្តិសុខ និងការពារជាតិប្រកបដោយប្រសិទ្ធភាព និងជាក់ស្តែង ពង្រឹងកិច្ចសហប្រតិបត្តិការសេដ្ឋកិច្ចលើមូលដ្ឋានវិទ្យាសាស្ត្រ បច្ចេកវិទ្យា និងធនធានមនុស្សប្រកបដោយគុណភាពខ្ពស់។ លោក To Lam អគ្គលេខាបក្ស បានស្នើឱ្យជប៉ុនចូលរួមយ៉ាងសកម្មក្នុងគម្រោងហេដ្ឋារចនាសម្ព័ន្ធសំខាន់ៗ តាមរយៈដើមទុនជំនួយអភិវឌ្ឍន៍ផ្លូវការ (ODA) ជំនាន់ថ្មី។

លោក To Lam អគ្គលេខាបក្សកុម្មុយនិស្តវៀតណាម និងលោក Ishiba Shigeru នាយករដ្ឋមន្ត្រីជប៉ុន

លោក To Lam អគ្គលេខាបក្ស ក៏បានស្នើឲ្យភាគីទាំងពីរទាញយកសក្តានុពលថ្មីក្នុងកិច្ចសហប្រតិបត្តិការពលកម្ម បរិវត្តកម្មបៃតង បរិវត្តកម្មថាមពល និងកសិកម្មបច្ចេកវិទ្យាខ្ពស់ ព្រមទាំងធ្វើឲ្យស៊ីជម្រៅថែមទៀតនូវកិច្ចសហប្រតិបត្តិការរវាងមូលដ្ឋាននានា ការជួបប្រាស្រ័យរវាងប្រជាជន និងប្រជាជន និងការផ្លាស់ប្តូរវប្បធម៌។

លោក To Lam អគ្គលេខាបក្សកុម្មុយនិស្តវៀតណាមទទួលជួបលោក Ishiba Shigeru នាយករដ្ឋមន្ត្រីជប៉ុន

រីឯលោក Ishiba Shigeru នាយករដ្ឋមន្ត្រីជប៉ុន បានអះអាងថា វៀតណាមជាដៃគូមិនអាចខ្វះបានរបស់ជប៉ុន ព្រមទាំងសង្កត់ធ្ងន់ថា ជប៉ុននឹងបន្តរួមដំណើរ និងជួយឧបត្ថម្ភវៀតណាមក្នុងការកសាងខឿនសេដ្ឋកិច្ចឯករាជ្យម្ចាស់ការ អនុវត្តឧស្សាហូបនីយកម្ម ទំនើបកម្ម និងអនុវត្តគោលដៅយុទ្ធសាស្ត្រ និងផែនការអភិវឌ្ឍសេដ្ឋកិច្ចសង្គមក្នុងយុគសម័យថ្មីនៃការអភិវឌ្ឍ។ ទន្ទឹមនឹងនោះ សម្របសម្រួលយ៉ាងជិតស្និទ្ធដើម្បីនាំទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ វៀតណាម-ជប៉ុន ចូលទៅក្នុងដំណាក់កាលថ្មី។

លោកនាយករដ្ឋមន្ត្រីជប៉ុន បានសន្យាថា ជប៉ុននឹងធ្វើឱ្យស៊ីជម្រៅថែមទៀតនូវកិច្ចសហប្រតិបត្តិការសេដ្ឋកិច្ច ODA ការវិនិយោគ បង្កើនកិច្ចសហប្រតិបត្តិការសន្តិសុខ-ការពារជាតិ សន្តិសុខតាមអ៊ីនធឺណិត ការថែរក្សាសន្តិភាព វប្បធម៌ ការជួបប្រាស្រ័យរវាងប្រជាជន និងប្រជាជន និងជំរុញកិច្ចសហប្រតិបត្តិការលើវិស័យថ្មីៗដូចជា៖ ការធ្វើបរិវត្តកម្មឌីជីថល នវានុវត្តន៍ កង់ទិច semiconductors។ លោក Ishiba Shigeru នាយករដ្ឋមន្ត្រី  បានអះអាងនូវការគាំទ្ររបស់ជប៉ុនចំពោះការបណ្តុះបណ្តាលធនធានមនុស្សប្រកបដោយគុណភាពខ្ពស់នៅប្រទេសជប៉ុន និងនៅសាកលវិទ្យាល័យវៀតណាម-ជប៉ុន ដែលជានិមិត្តរូបនៃកិច្ចសហប្រតិបត្តិការរវាងប្រទេសទាំងពីរ។ លោកនាយករដ្ឋមន្ត្រីជប៉ុនក៏មានប្រសាសន៍ថា ជប៉ុននឹងបន្តជួយឧបត្ថម្ភ និងបង្កើតលក្ខខណ្ឌអំណោយផលសម្រាប់សហគមន៍អាណិកជនវៀតណាមជាង ៦០០,០០០ នាក់ដែលកំពុងរស់នៅ សិក្សា និងធ្វើការនៅប្រទេសជប៉ុន៕

បកប្រែដោយ Huyen Trang