លោក Luong Cuong ប្រធានរដ្ឋវៀតណាម បញ្ចប់ដំណើរទស្សនកិច្ចផ្លូវរដ្ឋនៅឡាវប្រកបដោយជោគជ័យ

ក្នុងដំណើរទស្សនកិច្ចនេះ លោក Luong Cuong ប្រធានរដ្ឋវៀតណាម បានជួបពិភាក្សាការងារជាមួយ លោក Thongloun Sisoulith អគ្គលេខាបក្ស និងជាប្រធានរដ្ឋឡាវ ជួបសវនាការជាមួយលោក Saysomphone Phomvihane ប្រធានរដ្ឋសភាឡាវ និងលោក Sonexay Siphandone នាយករដ្ឋមន្ត្រីឡាវ។

លោក Luong Cuong ប្រធានរដ្ឋ​វៀត​ណាម​នៅអាកាសយានដ្ឋានអន្តរជាតិ Wattay ទីក្រុងវៀងច័ន្ទ ប្រទេសឡាវ (រូបថត៖ vnanet.vn)

ក្នុងជំនួបពិភាក្សានិងសវនាការ ភាគីទាំងពីរបានពិភាក្សា និងឯកភាពលើទិសដៅសំខាន់ៗសម្រាប់ការអភិវឌ្ឍទំនាក់ទំនងទ្វេភាគីនាពេលខាងមុខ រួមទាំងការពង្រឹងទំនាក់ទំនងនយោបាយប្រកបដោយទំនុកចិត្ត និងជិតស្និទ្ធ រក្សាបាននូវដំណើរទស្សនកិច្ច និងការជួបជុំជាប្រចាំនៅគ្រប់កម្រិត ផ្តោតលើការជំរុញការផ្លាស់ប្ដូ កិច្ចសហប្រតិបត្តិការរវាងប្រជាជននៃប្រទេសទាំងពីរក្នុងទម្រង់សំបូរបែប និងអាចបត់បែនបាន។

ភាគីទាំងពីរក៏បានអះអាងពីការយកចិត្តទុកដាក់ និងផ្តល់អាទិភាពខ្ពស់បំផុតសម្រាប់ការពង្រឹង និងពង្រីកទំនាក់ទំនងមិត្តភាព សាមគ្គីភាពពិសេស និងកិច្ចសហប្រតិបត្តិការលើគ្រប់វិស័យរវាងវៀតណាម និងឡាវ ដោយចាត់ទុកថានេះជាទ្រព្យសម្បត្តិដែល មិនអាចកាត់ថ្លៃបាន និងជាកត្តាសំខាន់សម្រាប់បុព្វហេតុបដិវត្តន៍របស់ប្រទេសនីមួយៗ។

លោក Luong Cuong ប្រធានរដ្ឋ​វៀត​ណាម​នៅអាកាសយានដ្ឋានអន្តរជាតិ Wattay ទីក្រុងវៀងច័ន្ទ ប្រទេសឡាវ (រូបថត៖ vnanet.vn)

លោក Luong Cuong ប្រធានរដ្ឋវៀតណាម ក៏បានជួបជាមួយអតីតមេដឹកនាំជាន់ខ្ពស់ឡាវមួយចំនួន ព្រមទាំងជួបធ្វើការជាមួយស្ថានទូតវៀតណាមប្រចាំនៅឡាវ និងជួបសំណេះសំណាលជាមួយតំណាងសមាគម អាជីវករ បញ្ញវន្ត និងសហគមន៍វៀតណាមនៅឡាវ និងសកម្មភាពសំខាន់ៗមួយចំនួនទៀត។ ជាពិសេស លោក Luong Cuong ប្រធានរដ្ឋវៀតណាម និងលោក Thongloun Sisoulith អគ្គលេខាបក្ស និងជាប្រធានរដ្ឋឡាវ បានអញ្ជើញចូលរួមកម្មវិធីជួបប្រាស្រ័យមិត្តភាព ក្រោមប្រធានបទ “ចំណងមិត្តភាពដ៏ជ្រាលជ្រៅរបស់វៀតណាម និងឡាវ” ដោយមានវត្តមានអតីតយុទ្ធជន និងតំណាងនិស្សិតឡាវជាច្រើនដែលបានទៅសិក្សានៅប្រទេសវៀតណាម ក៏ដូចជានិស្សិតវៀតណាមនៅប្រទេសឡាវផងដែរ។ ព្រឹត្តិការណ៍នេះគឺជាសក្ខីភាពនូវទំនាក់ទំនងដ៏ជិតស្និទ្ធរវាងបក្ស និងប្រជាជននៃប្រទេសទាំងពីរ ក៏ដូចជា មនោសញ្ចេតនាដ៏ជ្រាលជ្រៅដែលភាគីទាំងពីរ ជូនចំពោះគ្នាទៅវិញទៅមកក្នុងប្រវត្តិសាស្ត្រនៃប្រទេសទាំងពីរ៕

បកប្រែដោយ Thanh Cong