លោក To Lam អគ្គលេខាបក្សជួបសំណេះសំណាលជាមួយម្ចាស់ឆ្នោតទីក្រុងហាណូយ

បន្ទាប់ពីបានស្តាប់យោបល់ពីម្ចាស់ឆ្នោតនោះ លោក To Lam អគ្គលេខាបក្ស បានវាយតម្លៃខ្ពស់ចំពោះមតិយោបល់របស់ម្ចាស់ឆ្នោត ព្រមទាំងសំដែងនូវក្ដីរំភើបចិត្ដចំពោះមនោសញ្ចេតនា ការគាំទ្ររបស់ប្រជាជនសម្រាប់គោលនយោបាយ និងគោលការណ៍ណែនាំសម្រាប់ការអភិវឌ្ឍប្រទេសជាតិរបស់បក្ស និងរដ្ឋ។

លោក To Lam អគ្គលេខាបក្ស មានប្រសាសន៍​ក្នុងជំនួប​ (រូបថត៖ vnanet.vn)

លោក To Lam អគ្គលេខាបក្ស បានចែករំលែកថា ក្នុងបរិបទដែលស្ថានភាពពិភពលោក និងតំបន់កំពុងមានការវិវឌ្ឍដ៏ស្មុគស្មាញ ហើយ​ថ្មីៗនេះគឺផល​ប៉ះពាល់យ៉ាងខ្លាំងពីគោលនយោបាយដំឡើងពន្ធរបស់សហរដ្ឋអាមេរិក។ ថ្នាក់មជ្ឈិមត្រូវតែពិនិត្យឡើងវិញ និងពិចារណាលើស្ថានភាពសេដ្ឋកិច្ច ដើម្បីពង្រឹងខឿនសេដ្ឋកិច្ច បង្កើនភាពធន់ និងបង្កើនទីផ្សារក្នុងស្រុក ព្រមទាំងពង្រីកទីផ្សារអន្តរជាតិ។ ទោះបីជាមានការលំបាកក៏ដោយ ក៏វៀតណាមប្ដេជ្ញាចិត្ដសម្រេចបានគោលដៅនៃកំណើនសេដ្ឋកិច្ចដែលបានកំណត់​។

ចំពោះការងាររៀបចំរដ្ឋបាល និង​ការរៀប​ចំ​អាជ្ញាធរមូលដ្ឋានពីរកម្រិតនោះ លោក To Lam អគ្គលេខាបក្ស មានប្រសាសន៍ថា ការងារពាក់ព័ន្ធទាំងអស់កំពុងត្រូវបានអនុវត្តន៍យ៉ាងប្រញាប់ប្រញាល់ ហើយវឌ្ឍនភាពការងារត្រូវបានត្រួតពិនិត្យជារៀងរាល់ថ្ងៃ។ អាជ្ញាធរមូលដ្ឋានបន្ទាប់ពីត្រូវ​បាន​​រៀបចំឡើង​វិញ​ត្រូវតែធានាឱ្យមានប្រសិទ្ធភាព ផ្ដល់ផល​ប្រយោជន៍ដល់ប្រជាជន បំពេញតម្រូវការនៃអភិបាលកិច្ចសង្គមទំនើប និងសម្រេចបាននូវគោលដៅកំណើនយ៉ាងឆាប់រហ័ស និងនិរន្តរភាព ព្រមទាំងបង្កើតកម្លាំងចលករថ្មីសម្រាប់ភារកិច្ចការពារជាតិ សន្តិសុខ និងកិច្ចការបរទេស និងបង្កើតសន្ទុះ និងកម្លាំងចលករសម្រាប់ការអភិវឌ្ឍសេដ្ឋកិច្ច។ ទន្ទឹមនឹងនោះ ថែទាំជីវភាពខាងសម្ភារៈ និងស្មារតីរបស់ប្រជាជន ឱ្យកាន់តែប្រសើរឡើង។

លោក To Lam អគ្គលេខាបក្ស  រួមទាំងសមាជិករដ្ឋសភា និងម្ចាស់ឆ្នោត (រូបថត៖ vnanet.vn)

លោក To Lam អគ្គលេខាបក្ស បានសង្កត់ធ្ងន់លើភារកិច្ចសំខាន់ៗចំនួនបីរបស់ប្រទេសជាតិ។ ទី ១ គឺ ការពារយ៉ាងរឹងមាំនូវមាតុភូមិវៀតណាមប្រកបដោយស្ថិរភាព និងសន្តិភាព។ ទី ២ គឺ ការអភិវឌ្ឍន៍ប្រទេសជាតិឲ្យសម្រេចបាននូវគោលដៅដែលបានកំណត់ត្រឹមឆ្នាំ ២០៣០ និងឆ្នាំ ២០៤៥  វៀតណាមក្លាយជាប្រទេសអភិវឌ្ឍន៍ដែលមានចំណូលខ្ពស់។ ទី ៣ គឺ ការលើកស្ទួយជីវភាពរស់នៅរបស់ប្រជាជនលើគ្រប់ទិដ្ឋភាព។

លោក To Lam អគ្គលេខាបក្ស បានកត់សម្គាល់ចំពោះលទ្ធផលដែលអាជ្ញាជរ និងប្រជាជនទីក្រុងហាណូយសម្រេចបាន ក្នុងរយៈពេលកន្លងមក និងបានរួមចំណែកដល់សមិទ្ធិផលអភិវឌ្ឍរួមរបស់ប្រទេសជាតិ។  លោក To Lam អគ្គលេខាបក្ស ចង់ឲ្យ​ទីក្រុងហាណូយបន្ដខិតខំប្រឹងប្រែង និងដោះស្រាយរាល់បញ្ហាចាំបាច់ ជាពិសេសបញ្ហា​កកស្ទះ​ចរាចរណ៍ និងការបំពុល​បរិស្ថាន...

បកប្រែដោយ Thanh Cong