វៀតណាមប្តេជ្ញាអភិវឌ្ឍប្រកបដោយចីរភាព និងធ្វើបរិវត្តកម្មថាមពល

មាគ៌ាអភិវឌ្ឍន៍របស់វៀតណាមមិនដាច់ពីនិន្នាការទូទៅរបស់ពិភពលោកទេ

សុន្ទរកថាសារគោលនយោបាយ លោក To Lam អគ្គលេខាបក្ស សង្កត់ធ្ងន់ថា ចំពោះមុខការផ្លាស់ប្តូរដ៏ធំធេង និងឆាប់រហ័សនៃពិភពលោកនាពេលបច្ចុប្បន្ននេះ វៀតណាមកំពុងខិតខំប្រឹងប្រែងឥតឈប់ឈរដើម្បីឈានទៅដល់យុគសម័យនៃការអភិវឌ្ឍប្រទេសជាតិដ៏រឹងមាំ និងវិបុលភាព ស្មើមុខស្មើមាត់នឹងមហាអំណាចនានាលើពិភពលោក កសាងសង្គមនិយមប្រកបដោយជោគជ័យ ដើម្បីគោលដៅប្រជាជនធូរធារ ប្រទេសខ្លាំងមាំមួន ប្រជាធិបតេយ្យ យុត្តិធម៌ អរិយធម៌ និងសុភមង្គល។ ដល់ឆ្នាំ ២០៣០ វៀតណាមនឹងក្លាយជាប្រទេសកំពុងអភិវឌ្ឍន៍ដែលមានឧស្សាហកម្មទំនើប និងប្រាក់ចំណូលជាមធ្យមខ្ពស់។ ដល់ឆ្នាំ ២០៤៥ វៀតណាមនឹងក្លាយជាប្រទេសសង្គមនិយមដែលមានប្រាក់ចំណូលខ្ពស់។

លោក To Lam អគ្គលេខាបក្ស ថ្លែងសុន្ទរកថាក្នុង​កិច្ចប្រជុំ​

លោក To Lam អគ្គលេខាបក្ស បានចែករំលែកថា ជាមួយនឹងបទពិសោធន៍នៃការផ្លាស់ប្តូរថ្មីជិត ៤០ ឆ្នាំមក វៀតណាមបានកំណត់ថា មាគ៌ាដើម្បីសម្រេចបាននូវគោលដៅខាងលើត្រូវធានានូវគោលការណ៍ “និរន្តរភាព បរិយាប័ន្ន និងសុខដុមរមនា” រួមមាន ការអភិវឌ្ឍឆាប់រហ័សត្រូវតែដើរទន្ទឹមគ្នាជាមួយនឹងនិរន្តរភាពនិងគុណភាពខ្ពស់ និងត្រូវមានភាពសុខដុមរមនារវាងការអភិវឌ្ឍសេដ្ឋកិច្ច និងវប្បធម៌ សង្គម ការការពារបរិស្ថាន និងការបន្សាំទៅនឹងការប្រែប្រួលអាកាសធាតុ។ ការអភិវឌ្ឍប្រទេសជាតិត្រូវតែដើរទន្ទឹមគ្នាជាមួយនឹងទំនួលខុសត្រូវអន្តរជាតិ រួមចំណែកកាន់តែច្រើនឡើងចំពោះសន្តិភាព ស្ថិរភាព និងការអភិវឌ្ឍក្នុងតំបន់ និងពិភពលោក ដើម្បីសុភមង្គលរបស់មនុស្សជាតិ និងអរិយធម៌ពិភពលោក។ កិច្ចសហប្រតិបត្តិការអន្តរជាតិលើគោលការណ៍ “ឈ្នះ-ឈ្នះ”។ ដំណើរការអភិវឌ្ឍត្រូវយកមនុស្សជាមជ្ឈភាព ជាគោលដៅ និងជាកម្លាំងចលករនៃគោលនយោបាយ និងយុទ្ធសាស្ត្រទាំងអស់ ប្រជាជនគឺជាអ្នកទទួលផលនៃការអភិវឌ្ឍ។

មេរៀនបទពិសោធន៍សំខាន់ៗចំនួន៣

ក្នុងសុន្ទរកថាបើក លោក Pham Minh Chinh នាយករដ្ឋមន្ត្រីវៀតណាម បានសង្កត់ធ្ងន់ថា ដំណើរការធ្វើបរិវត្តកម្មបៃតងរបស់ពិភពលោកនាពេលថ្មីៗនេះ បានបន្សល់ទុកនូវមេរៀនបទពិសោធន៍សំខាន់ៗចំនួនបី។ មួយគឺជាវិធីសាស្រ្តដ៏ទូលំទូលាយ សកល បរិយាប័ន្ត "គ្មាននរណាម្នាក់ត្រូវបានទុកចោល"។ ទីពីរគឺគោលការណ៍សមភាព យុត្តិធម៌ និងការទទួលខុសត្រូវ ដោយគិតដល់លក្ខខណ្ឌ និងសមត្ថភាពផ្សេងៗរបស់បណ្តាប្រទេស។ ទីបីគឺជាតួនាទីសំខាន់នៃវិទ្យាសាស្ត្រ បច្ចេកវិទ្យា នវានុវត្តន៍ និងការធ្វើបរិវត្តកម្មឌីជីថល។

លោក Pham Minh Chinh នាយករដ្ឋមន្ត្រីវៀតណាម ថ្លែង​សុន្ទរកថា​ក្នុង​កិច្ចប្រជុំ​

* បន្ទាប់ពីពិធីបើក លោក Pham Minh Chinh នាយករដ្ឋមន្ត្រីវៀតណាម បានធ្វើជាអធិបតីកិច្ចពិភាក្សាជាន់ខ្ពស់លើប្រធានបទ “ការធ្វើបរិវត្តកម្មបៃតងប្រកបដោយនិរន្តរភាព ផ្តោតលើប្រជាជន” នៃកិច្ចប្រជុំកំពូល P4G លើកទី៤។

* នារសៀលថ្ងៃដដែល Pham Minh Chinh នាយករដ្ឋមន្ត្រីវៀតណាម បានធ្វើជាសាក្សីក្នុងពិធីចុះហត្ថលេខាលើកិច្ចព្រមព្រៀងកម្ចី និងជំនួយ ដែលមានតម្លៃសរុបស្មើនឹង ៤០០ លានដុល្លារអាមេរិក ពីធនាគារពិភពលោក (WB) និងធនាគារអភិវឌ្ឍន៍អាស៊ី (ADB)។

* គួររំលឹកថា នារសៀលថ្ងៃទី ១៦ មេសា មុនពិធីបើកកិច្ចប្រជុំកំពូល P4G លើកទី៤ លោក Pham Minh Chinh នាយករដ្ឋមន្ត្រីវៀតណាមបានធ្វើជាអធិបតីក្នុងពិធីទទួលស្វាគមន៍ជាផ្លូវការចំពោះប្រធានគណៈប្រតិភូដែលចូលរួមកិច្ចប្រជុំ ហើយរួមជាមួយប្រតិភូចូលរួមក្នុងពិធីបើកការតាំងពិព័រណ៍ស្តីពីកំណើនបៃតងដែលបានធ្វើឡើងក្នុងក្របខ័ណ្ឌនៃកិច្ចប្រជុំ។

ជំរុញកិច្ចសហប្រតិបត្តិការរវាងវៀតណាម និងប្រទេសនានា

* នាថ្ងៃទី ១៦ មេសា នៅវិមានប្រធានរដ្ឋ លោក Luong Cuong ប្រធានរដ្ឋវៀតណាម បានទទួលជួបលោក Cho Tae-yul រដ្ឋមន្ត្រីការបរទេសកូរ៉េខាងត្បូង ក្នុងឱកាសអញ្ជើញបំពេញទស្សនកិច្ចជាផ្លូវការនៅវៀតណាម និងចូលរួមកិច្ចប្រជុំកំពូល P4G លើកទី៤។

នៅក្នុងជំនួប ភាគីទាំងពីរបានឯកភាពបន្តរក្សាកិច្ចសហប្រតិបត្តិការជិតស្និទ្ធ ការគាំទ្រ និងជំនួយគ្នាទៅវិញទៅមកនៅវេទិកាពហុភាគី ជាពិសេសក្នុងបរិបទនៃស្ថានការណ៍ក្នុងតំបន់ និងពិភពលោកដ៏ស្មុគស្មាញនាពេលបច្ចុប្បន្ន។

* នាថ្ងៃទី ១៦ មេសា នៅទីក្រុងហាណូយ លោក Pham Minh Chinh នាយករដ្ឋមន្ត្រីវៀតណាម បានជួបពិភាក្សាការងារជាមួយលោក Sonexay Siphandone នាយករដ្ឋមន្ត្រីឡាវ ក្នុងឱកាអញ្ជើញមកបំពេញទស្សនកិច្ចនៅវៀតណាម ដើម្បីចូលរួមកិច្ចប្រជុំកំពូល P4G លើកទី៤។

លោក Pham Minh Chinh នាយករដ្ឋមន្ត្រីវៀតណាម និងលោក Sonexay Siphandone នាយករដ្ឋមន្ត្រីឡាវ

នាយករដ្ឋមន្ត្រីទាំងពីរបានវាយតម្លៃថា ទំនាក់ទំនងពិសេសវៀតណាម-ឡាវបន្តអភិវឌ្ឍយ៉ាងល្អប្រសើរ រឹងមាំ និងមានប្រសិទ្ធភាពលើគ្រប់វិស័យ។ នាយករដ្ឋមន្ត្រីទាំងពីរបានឯកភាពដឹកនាំស្ថាប័នពាក់ព័ន្ធ ផ្តោតលើការអនុវត្តប្រកបដោយប្រសិទ្ធភាពនូវកិច្ចព្រមព្រៀងកម្រិតខ្ពស់ ពង្រឹងទំនាក់ទំនងនយោបាយ និងការជឿទុកចិត្តពិសេស កិច្ចសហប្រតិបត្តិការការពារជាតិ និងសន្តិសុខ ដើម្បីធានាសន្តិសុខ សណ្តាប់ធ្នាប់ និងសុវត្ថិភាពសង្គម។ នាយករដ្ឋមន្ត្រីទាំងពីឯកភាពពង្រឹងវិធានការជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ បង្កើតរបកគំហើញឆ្ពោះទៅរកទំហំពាណិជ្ជកម្មទ្វេភាគីចំនួន ៥ ពាន់លានដុល្លារ អនុវត្តប្រកបដោយប្រសិទ្ធភាពនូវគម្រោងធំៗ និងសំខាន់ៗរបស់សហគ្រាសវៀតណាមនៅឡាវ ពង្រឹងការតភ្ជាប់យ៉ាងទូលំទូលាយរវាងសេដ្ឋកិច្ចទាំងពីរ ជំរុញកិច្ចសហប្រតិបត្តិការលើវិស័យផ្សេងទៀត ដូចជាការអប់រំ និងបណ្តុះបណ្តាល វប្បធម៌ វិទ្យាសាស្ត្រ និងបច្ចេកវិទ្យា ទេសចរណ៍ និងការផ្លាស់ប្តូរប្រជាជន។

* នាថ្ងៃទី ១៦ មេសា នៅទីក្រុងហាណូយ លោក Pham Minh Chinh នាយករដ្ឋមន្ត្រីវៀតណាម បានទទួលជួប លោក នេត សាវឿន ឧបនាយករដ្ឋមន្ត្រី  នៃព្រះរាជាណាចក្រកម្ពុជា ក្នុងឱកាសអញ្ជើញមកបំពេញទស្សនកិច្ចនៅប្រទេសវៀតណាម ដើម្បីចូលរួមកិច្ចប្រជុំកំពូលកំពូល P4G លើកទី ៤។

លោក Pham Minh Chinh នាយករដ្ឋមន្ត្រីវៀតណាម ទទួលជួបលោក នេត សាវឿន ឧបនាយករដ្ឋមន្ត្រីកម្ពុជា (រូបថត៖ vnanet.vn)

លោក Pham Minh Chinh នាយករដ្ឋមន្ត្រី បានជូនពរកម្ពុជាបន្តទទួលបានសមិទ្ធិផលថ្មីៗកាន់តែច្រើនថែមទៀតនាពេលខាងមុខ។ លោក នេត សាវឿន ឧបនាយករដ្ឋមន្ត្រីកម្ពុជា បានថ្លែងអំណរគុណវៀតណាម ដែលតែងតែប្រកៀកស្មា និងជួយកម្ពុជាក្នុងគ្រប់កាលៈទេសៈ។ លោកបានសង្កត់ធ្ងន់ថា ការអភិវឌ្ឍរបស់វៀតណាមក៏ផ្តល់ផលប្រយោជន៍ដល់កម្ពុជាផងដែរ ទន្ទឹមនឹងនោះលោកបញ្ជាក់ថា កម្ពុជាមានមោទនភាពចំពោះទំនាក់ទំនងសហប្រតិបត្តិការរវាងប្រទេសទាំងពីរ ហើយប្តេជ្ញាអភិវឌ្ឍទំនាក់ទំនងទ្វេភាគីឱ្យកាន់តែរឹងមាំ និងមានប្រសិទ្ធភាព។

ទិដ្ឋភាពនៃជំនួប

ភាគីទាំងពីរបានឯកភាពពង្រឹងសាមគ្គីភាព និងកិច្ចសហប្រតិបត្តិការកាន់តែជិតស្និទ្ធថែមទៀត ព្រមទាំងបន្តលើកកម្ពស់កិច្ចសហប្រតិបត្តិការសេដ្ឋកិច្ច ការពារជាតិ សន្តិសុខ ការអប់រំ-បណ្តុះបណ្តាល និងការជួបប្រាស្រ័យរវាងប្រជាជន និងប្រជាជន។ លោក Pham Minh Chinh នាយករដ្ឋមន្ត្រី បានស្នើឲ្យភាគីទាំងពីរបន្តសម្របសម្រួលស្វែងរកវិធានការសមហេតុផលដើម្បីដោះស្រាយ ១៦% នៃការខ័ណ្ឌសីមាបោះបង្គោលព្រំដែនគោកដែលមិនទាន់រួចរាល់ សំដៅកសាងព្រំដែនសន្តិភាព ស្ថិរភាព សហប្រតិបត្តិការ និងអភិវឌ្ឍន៍ប្រកបដោយចីរភាពរវាងប្រទេសទាំងពីរ។ លោក Pham Minh Chinh នាយករដ្ឋមន្រ្ត ក៏បានស្នើឱ្យភាគីកម្ពុជាយកចិត្តទុកដាក់ដោះស្រាយបញ្ហាឋានៈតាមផ្លូវច្បាប់ ដើម្បីប្រជាពលរដ្ឋដែលមានដើមកំណើតវៀតណាមនៅកម្ពុជា មានស្ថិរភាពក្នុងជីវភាពរស់នៅ៕

បកប្រែដោយ Duy Hoan