លោក Pham Minh Chinh នាយករដ្ឋមន្ត្រីវៀតណាម ទទួលជួបប្រធានសាជីវកម្មយន្តហោះពាណិជ្ជកម្មចិន

នៅក្នុងជំនួប លោក Pham Minh Chinh នាយករដ្ឋមន្ត្រីវៀតណាម បានស្វាគមន៍ និងវាយតម្លៃខ្ពស់ចំពោះកិច្ចសហប្រតិបត្តិការយ៉ាងជិតស្និទ្ធរវាងសាជីវកម្ម COMAC និង Vietjet Air ក្នុងរយៈពេលកន្លងមក ក៏ដូចជាលទ្ធភាពពង្រីកកិច្ចសហប្រតិបត្តិការរវាង COMAC និងក្រុមហ៊ុនអាកាសចរណ៍វៀតណាមផ្សេងទៀតនាពេលអនាគត។ លោកនាយករដ្ឋមន្ត្រីបានមានប្រសាសន៍ថា សាជីវកម្ម COMAC ចាំបាច់ត្រូវផ្តោតលើការដោះស្រាយបញ្ហាផ្លូវច្បាប់សម្រាប់ការធ្វើអាជីវកម្មយន្តហោះនៃ COMAC នៅវៀតណាម ព្រមទាំងស្នើឲ្យសាជីវកម្មនេះមានការជួយឧបត្ថម្ភសម្រាប់ការអភិវឌ្ឍឧស្សាហកម្មអាកាសចរណ៍របស់វៀតណាម ជាពិសេសក្នុងការធ្វើអាជីវកម្មអវកាស និងសេដ្ឋកិច្ចអាកាសចរណ៍។  លោកនាយករដ្ឋមន្ត្រីបានសង្កត់ធ្ងន់ថា វៀតណាមនិងចិនត្រូវតែឆ្ពោះទៅមុខ គាំទ្រគ្នាទៅវិញទៅមក ផ្លាស់ប្តូរបទពិសោធន៍ និងជំរុញកំណើនថ្មី។

លោក Pham Minh Chinh នាយករដ្ឋមន្ត្រីវៀតណាម ទទួលជួបប្រធានសាជីវកម្មយន្តហោះពាណិជ្ជកម្មចិន (រូបថត៖ vnanet.vn)

រីឯលោក He Dongfeng ប្រធានសាជីវកម្ម COMAC បានវាយតម្លៃខ្ពស់ចំពោះការរួមចំណែកដ៏សំខាន់របស់លោក Pham Minh Chinh នាយករដ្ឋមន្ត្រី ក្នុងការពូនជ្រំទំនាក់ទំនង វៀតណាម-ចិន បង្កើតក្របខ័ណ្ឌច្បាប់អំណោយផលសម្រាប់ការធ្វើអាជីវកម្មយន្តហោះនៃ COMAC នៅវៀតណាម។ ដោយឯកភាពខ្ពស់ចំពោះការវាយតម្លៃរបស់លោក Pham Minh Chinh នាយករដ្ឋមន្ត្រី អំពីនិន្នាការអភិវឌ្ឍថ្មីលើពិភពលោក លោកប្រធាន COMAC មានបំណងចង់ពង្រីកកិច្ចសហប្រតិបត្តិការជាមួយដៃគូវៀតណាម មិនត្រឹមតែអភិវឌ្ឍការដឹកជញ្ជូនតាមផ្លូវអាកាសប៉ុណ្ណោះទេ ថែមទាំងឆ្ពោះទៅរកការអភិវឌ្ឍឧស្សាហកម្មអាកាសចរណ៍នៅវៀតណាមទៀតផង៕

បកប្រែដោយ Thanh Cong