លោក Tran Thanh Man ប្រធានរដ្ឋសភាវៀតណាម ថ្លែងសុន្ទរកថាក្នុងសម័យប្រជុំពេញអង្គជាន់ខ្ពស់ IPU-150

ក្នុងនាមជាថ្នាក់ដឹកនាំរដ្ឋសភាដំបូងដែលថ្លែងសុន្ទរកថាក្នុងសម័យប្រជុំនោះ លោក Tran Thanh Man ប្រធានរដ្ឋសភាបានវាយតំលៃខ្ពស់ចំពោះប្រធានបទ “សកម្មភាពសភាដើម្បីការអភិវឌ្ឍ និងយុត្តិធម៌សង្គម” ដែលមានសារៈសំខាន់ជាក់ស្តែង និងជាបន្ទាន់ក្នុងបរិបទដែលពិភពលោកកំពុងប្រឈមមុខនឹងការប្រែប្រួលដែលមិនអាចទាយទុកជាមុនបាន ចាប់ពីការប្រែប្រួលអាកាសធាតុ រហូតដល់វិសមភាព និងជម្លោះនយោបាយ សភានៃប្រទេសទាំងអស់មានតួនាទីដ៏សំខាន់ក្នុងការគាំទ្រ និងជំរុញការអភិវឌ្ឍប្រកបដោយចីរភាពដើម្បីដោះស្រាយបញ្ហាប្រឈមរួម។

លោក Tran Thanh Man ប្រធានរដ្ឋសភាវៀតណាម ថ្លែងសុន្ទរកថាក្នុងសម័យប្រជុំពេញអង្គជាន់ខ្ពស់ IPU-150

ដោយចែករំលែកអំពីកិច្ចខិតខំប្រឹងប្រែងរបស់វៀតណាមឆ្ពោះទៅគោលដៅនេះ លោកប្រធានរដ្ឋសភា បានអះអាងថា រដ្ឋសភាវៀតណាមបាន និងកំពុងខិតខំប្រឹងប្រែងបង្កើតប្រព័ន្ធច្បាប់ និងគោលនយោបាយយុត្តិធម៌ ជំរុញការចូលរួមរបស់ប្រជាជនក្នុងដំណើរការបង្កើត និងអនុវត្តគោលនយោបាយ។

ទិដ្ឋភាពនៃសម័យប្រជុំពេញអង្គជាន់ខ្ពស់ IPU-150

ដោយសង្កត់ធ្ងន់ថា វៀតណាមកំពុងឆ្ពោះទៅរកយុគសម័យថ្មីនៃការអភិវឌ្ឍ យុគសម័យនៃភាពរុងរឿង និងវិបុលភាព លោកប្រធានរដ្ឋសភា បានអះអាងថា រដ្ឋសភាវៀតណាមកំពុងខិតខំប្រឹងប្រែងបំពេញក្របខ័ណ្ឌច្បាប់ លុបបំបាត់រាល់ចំណុចខ្វះខាតរបស់ស្ថាប័ន ដើម្បីបញ្ចេញធនធាន អនុវត្តវិទ្យាសាស្ត្រ និងបច្ចេកវិទ្យា នាវានុវត្តន៍ បរិវត្តកម្មឌីជីថល អភិវឌ្ឍសេដ្ឋកិច្ចបៃតង និងបរិវត្តកម្មថាមពល នាំប្រទេសឱ្យមានការអភិវឌ្ឍយ៉ាងលឿន រឹងមាំ និងប្រកបដោយនិរន្តរភាព និងធានាយុត្តិធម៌សង្គម។ ដោយចែករំលែកទស្សនៈអំពីពិភពលោកដែលកំពុងប្រែប្រួលយ៉ាងឆាប់រហ័ស ហើយបញ្ហាប្រឈមនាពេលបច្ចុប្បន្ននឹងក្លាយជាបញ្ហាកាន់តែស្មុគស្មាញនៅក្នុងអនាគត លោកប្រធានរដ្ឋសភា បានលើកឡើងទិសដៅមួយចំនួនសម្រាប់សភាទាំងឡាយ ពង្រឹងកិច្ចសហប្រតិបត្តិការអន្តរជាតិ ចែករំលែកបទពិសោធន៍ និងគាំទ្រគ្នាទៅវិញទៅមកក្នុងការកសាងគោលនយោបាយអភិវឌ្ឍ ឆ្លើយតបដោយទាន់ពេលវេលា និងប្រកបដោយប្រសិទ្ធភាពចំពោះបញ្ហាប្រឈមនាពេលបច្ចុប្បន្ន។

នារសៀលថ្ងៃទី ៦ ខែមេសា ក្នុងក្របខ័ណ្ឌចូលរួមមហាសន្និបាត IPU-150 លោក Tran Thanh Man ប្រធានរដ្ឋសភាវៀតណាម បានទទួលជួបលោកស្រី Tulia Ackson ប្រធាន IPU។

នៅក្នុងជំនួប លោកស្រី Tulia Ackson ប្រធាន IPU បានឲ្យដឹងថា ក្នុងកិច្ចប្រជុំ និងកិច្ចពិភាក្សារបស់ IPU វៀតណាមតែងតែត្រូវបានលើកយកជាគំរូលេចធ្លោក្នុងការលើកកម្ពស់សមភាពយេនឌ័រ ការផ្តល់សិទ្ធិអំណាចដល់ស្ត្រី និងការផ្តល់សិទ្ធិអំណាចដល់សមាជិកសភាវ័យក្មេង។ លោកស្រីបានសម្តែងនូវការចាប់អារម្មណ៍ចំពោះសមិទ្ធិផលក្នុងការអភិវឌ្ឍរបស់វៀតណាម រួមទាំងការធានាយុត្តិធម៌សង្គម និងសុខុមាលភាពសង្គមសម្រាប់ប្រជាជន។

លោក Tran Thanh Man ប្រធានរដ្ឋសភាវៀតណាម និងលោកស្រី Tulia Ackson ប្រធាន IPU

ដោយចែករំលែកសមិទ្ធិផលក្នុងការអភិវឌ្ឍសេដ្ឋកិច្ចសង្គម និងការខិតខំប្រឹងប្រែងធានាសុខុមាលភាពសង្គម និងលើកកំពស់ជីវភាពរស់នៅរបស់ប្រជាជនក្នុងរយៈពេលកន្លងមក ក៏ដូចជាទិសដៅអភិវឌ្ឍសំខាន់ៗនាពេលខាងមុខ លោក Tran Thanh Man ប្រធានរដ្ឋសភា បានអះអាងថា រដ្ឋសភាវៀតណាមគាំទ្រជានិច្ចចំពោះតួនាទីរបស់ IPU និងពហុភាគីនិយម។ ភាគីទាំងពីរបានឯកភាពសម្របសម្រួលយ៉ាងជិតស្និទ្ធ ដើម្បីជំរុញទំនាក់ទំនងសហប្រតិបត្តិការ វៀតណាម-IPU នាពេលខាងមុខ។

* នារសៀលថ្ងៃដដែល លោក Tran Thanh Man ប្រធានរដ្ឋសភាវៀតណាមបានទទួលជួបលោក Martin Chungong អគ្គលេខាធិការ IPU។

ក្នុងឱកាសនេះ លោកប្រធានរដ្ឋសភាបានស្នើឱ្យភាគីទាំងពីរអនុវត្តយ៉ាងសកម្មនូវយុទ្ធសាស្ត្រសកម្មភាពរបស់ IPU ដំណាក់កាល ២០២២-២០២៦ ដោយផ្តោតលើការធ្វើនវានុវត្តន៍ និងបរិវត្តកម្មឌីជីថលក្នុងសកម្មភាពសភា។ លោកប្រធានរដ្ឋសភា ក៏បានស្នើឲ្យ IPU បន្តគាំទ្រវៀតណាមក្នុងការពិគ្រោះយោបល់អំពីគោលនយោបាយ និងជំនាញក្នុងការជំរុញ និងឃ្លាំមើលការអនុវត្តគោលដៅអភិវឌ្ឍន៍ប្រកបដោយចីរភាព (SDG)។ល។

លោក Tran Thanh Man ប្រធានរដ្ឋសភាវៀតណាម និងលោក Martin Chungong អគ្គលេខាធិការ IPU

លោក Martin Chungong អគ្គលេខាធិការ IPU បានវាយតំលៃខ្ពស់ចំពោះសំណើរបស់វៀតណាមចំពោះសកម្មភាពរបស់ IPU និងកិច្ចសហប្រតិបត្តិការអន្តរសភាពហុភាគីនិយាយរួម។ លោក Martin Chungong បានអះអាងថានឹងបន្តគាំទ្រ និងជួយឧបត្ថម្ភរដ្ឋសភាវៀតណាមក្នុងការកសាងសមត្ថភាពការទូតសភាពហុភាគី អនុវត្តវិទ្យាសាស្ត្រនិងបច្ចេកវិទ្យាក្នុងការងារ ក៏ដូចជាបន្តដើរតួនាទី និងរួមចំណែកយ៉ាងសកម្មកាន់តែខ្លាំងឡើងដល់ IPU។ លោកក៏បានវាយតំលៃខ្ពស់ចំពោះការត្រៀមខ្លួនជាស្រេចរបស់វៀតណាមក្នុងការធ្វើជាម្ចាស់ផ្ទះសកម្មភាពសំខាន់ៗរបស់ IPU នាពេលខាងមុខ៕

បកប្រែដោយ Huyen Trang