លោក Tran Thanh Man ប្រធានរដ្ឋសភាវៀតណាម ចាប់ផ្តើមចូលរួម IPU-150 និងបំពេញទស្សនកិច្ចផ្លូវការនៅសាធារណរដ្ឋអ៊ូសបេគីស្ថាន

វៀតណាមជាដៃគូសំខាន់របស់អ៊ូសបេគីស្ថាននៅអាស៊ីអាគ្នេយ៍

បន្ទាប់ពីពិធីទទួលបដិសណ្ឋារកិច្ចជាផ្លូវការនៅអគាររដ្ឋសភា Uzbekistan លោក Tran Thanh Man ប្រធានរដ្ឋសភាវៀតណាម បានជួបពិភាក្សាការងារជាមួយលោកស្រី Tanzila Narbaeva ប្រធានព្រឹទ្ធសភាអ៊ូសបេគីស្ថាន។

លោកស្រី Tanzila Narbaeva ប្រធានព្រឹទ្ធសភាអ៊ូសបេគីស្ថាន និងលោក Tran Thanh Man ប្រធានរដ្ឋសភាវៀតណាម

លោកស្រី Tanzila Narbaeva ប្រធានព្រឹទ្ធសភាអ៊ូសបេគីស្ថាន បានសង្កត់ធ្ងន់លើសារៈសំខាន់នៃដំណើរទស្សនកិច្ចលើកដំបូងរបស់ប្រធានរដ្ឋសភាវៀតណាមចាប់តាំងពីប្រទេសទាំងពីរបានបង្កើតទំនាក់ទំនងការទូតមក ព្រមទាំងបានសម្តែងនូវទំនុកចិត្តថា ដំណើរទស្សនកិច្ចនេះនឹងបើកឱកាសសហប្រតិបត្តិការប្រកបដោយជោគជ័យសម្រាប់ប្រទេសទាំងពីរ រួមចំណែកជាវិជ្ជមានដល់ការអភិវឌ្ឍ និងការកសាងប្រទេសរបស់ប្រទេសនីមួយៗ។

លោកស្រី Tanzila Narbaeva ប្រធានព្រឹទ្ធសភា បានបញ្ជាក់ថា ចម្ងាយភូមិសាស្ត្រមិនអាចជាឧបសគ្គសម្រាប់ប្រទេសទាំងពីរអភិវឌ្ឍទំនាក់ទំនងលើគ្រប់វិស័យទេ ព្រមទាំងបានបញ្ជាក់ថា អ៊ូសបេគីស្ថានវាយតម្លៃខ្ពស់ចំពោះទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការលើគ្រប់វិស័យជាមួយវៀតណាម និងចាត់ទុកវៀតណាមជាដៃគូសំខាន់របស់អ៊ូសបេគីស្ថានក្នុងតំបន់អាស៊ីអាគ្នេយ៍។

ទិដ្ឋភាពនៃជំនួបពិភាក្សាការងារ

លោក Tran Thanh Man ប្រធានរដ្ឋសភាវៀតណាម បានសម្តែងការគោរពចំពោះទំនាក់ទំនងមិត្តភាពជាប្រពៃណីដ៏យូរអង្វែង ហើយមានបំណងចង់ជំរុញកិច្ចសហប្រតិបត្តិការលើគ្រប់វិស័យជាមួយអ៊ូសបេគីស្ថានដើម្បីរួមចំណែកអភិវឌ្ឍន៍ប្រទេសនីមួយៗ ព្រមទាំងអះអាងថា វៀតណាមចងចាំជានិច្ចនូវជំនួយរបស់ប្រជាជនអ៊ូសបេគីស្ថានជូនចំពោះវៀតណាមក្នុងការតស៊ូរំដោះជាតិកាលពីមុន និងក្នុងការកសាង និងអភិវឌ្ឍប្រទេសជាតិ នាពេលបច្ចុប្បន្ន។

ភាគីទាំងពីរបានសង្កត់ធ្ងន់ថា ប្រទេសទាំងពីរចាំបាច់ត្រូវលើកកម្ពស់តម្លៃដ៏ល្អនៃប្រវត្តិសាស្រ្តទំនាក់ទំនងទ្វេភាគី និងបន្តធ្វើឱ្យស៊ីជម្រៅកិច្ចសហប្រតិបត្តិការវៀតណាម-អ៊ូសបេគីស្ថានយ៉ាងទូលំទូលាយលើគ្រប់វិស័យ និងគ្រប់បណ្តាញ ព្រមទាំងលើកកំពស់តួនាទីត្រួតពិនិត្យ និងជំរុញការអនុវត្តកិច្ចព្រមព្រៀងសហប្រតិបត្តិការ ដែលបានចុះហត្ថលេខាដោយរដ្ឋាភិបាលទាំងពីរ។

ដោយវាយតម្លៃថា កិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងវៀតណាម និងអ៊ូសបេគីស្ថាន នៅតែមានសក្ដានុពល និងគុណសម្បត្តិជាច្រើនដែលមិនអាចកាត់ថ្លៃបាននោះ មេដឹកនាំទាំងពីរបានឯកភាពផ្តោតការយកចិត្តទុកដាក់លើទិសដៅសំខាន់ៗមួយចំនួន នាពេលខាងមុខ ដើម្បីផ្តោតលើការអភិវឌ្ឍកិច្ចសហប្រតិបត្តិការទ្វេភាគីដែលមានផលប្រយោជន៍ទៅវិញទៅមកព្រមទាំងចាំបាច់ត្រូវបង្កើនការផ្លាស់ប្តូរព័ត៌មានស្តីពីគោលនយោបាយ និងទីផ្សារ បង្កើតលក្ខខណ្ឌអំណោយផលសម្រាប់ធុរកិច្ចនៃប្រទេសទាំងពីរចូលរួមសកម្មភាពវិនិយោគ និងជំរុញពាណិជ្ជកម្ម ជំរុញកិច្ចសហប្រតិបត្តិការលើវិស័យថាមពល-ប្រេង និងឧស្ម័ន និងវិស័យនានាដែលភាគីទាំងពីរមានសក្ដានុពល និងតម្រូវការ ជាពិសេសក្នុងបរិបទដែលត្រូវការធ្វើពិពិធកម្មដៃគូវិនិយោគ...

លោក Tran Thanh Man ប្រធានរដ្ឋសភាវៀតណាម និងលោកស្រី Tanzila Narbaeva ប្រធានព្រឹទ្ធសភាអ៊ូសបេគីស្ថាន ចុះហត្ថលេខាលើកិច្ចព្រមព្រៀងសហប្រតិបត្តិការរវាងសភានៃប្រទេសទាំងពីរ

ភាគីទាំងពីរបានឯកភាពបន្តពង្រឹងការសម្របសម្រួល និងគាំទ្រគ្នាទៅវិញទៅមកនៅវេទិកាពហុភាគី ក្នុងក្របខ័ណ្ឌអង្គការសហប្រជាជាតិ និងអង្គការអន្តរជាតិដែលប្រទេសទាំងពីរជាសមាជិក។ លោក Tran Thanh Man ប្រធានរដ្ឋសភាវៀតណាម បានស្នើឱ្យអ៊ូសបេគីស្ថាន គាំទ្រគោលជំហរអាស៊ាន និងវៀតណាមក្នុងការដោះស្រាយជម្លោះនៅសមុទ្រខាងកើតដោយសន្តិវិធី ឈរលើមូលដ្ឋានច្បាប់អន្តរជាតិ ជាពិសេសអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ ១៩៨២ (UNCLOS 1982)។

ប្រតិភូទាំង​ឡាយ​ថតរូប​ជុំ​គ្នា

លោកស្រី Tanzila Narbaeva ប្រធានព្រឹទ្ធសភា អ៊ូសបេគីស្ថាន បានឯកភាពតាមសំណើរបស់លោក Tran Thanh Man ប្រធានរដ្ឋសភាវៀតណាម អំពីការយកចិត្តទុកដាក់ គាំទ្រ និងបង្កលក្ខណៈងាយស្រួលសម្រាប់សហគមន៍វៀតណាមក្នុងការរស់នៅ សិក្សា និងធ្វើអាជីវកម្មប្រកបដោយស្ថិរភាពនៅក្នុងប្រទេសសាមី រួមចំណែកក្នុងការអភិវឌ្ឍប្រទេសអ៊ូសបេគីស្ថាន និងជាស្ពានសំខាន់ដើម្បីជំរុញទំនាក់ទំនងមិត្តភាពរវាងប្រទេសទាំងពីរ។

បន្ទាប់ពីជំនួបពិភាក្សា លោក Tran Thanh Man ប្រធានរដ្ឋសភាវៀតណាម និងលោកស្រី Tanzila Narbaeva ប្រធានព្រឹទ្ធសភាអ៊ូសបេគីស្ថាន បានចុះហត្ថលេខាលើកិច្ចព្រមព្រៀងសហប្រតិបត្តិការរវាងសភានៃប្រទេសទាំងពីរ៕

បកប្រែដោយ Duy Hoan