ថ្នាក់ដឹកនាំជាន់ខ្ពស់វៀតណាម អញ្ជើញចូលរួមពិធីគោរពវិញ្ញាណក្ខន្ធ និងចារលើសៀវភៅក្រាំងមាសមរណទុក្ខគោរពវិញ្ញាណក្ខន្ធលោក Khamtay Siphandone

លោក Luong Cuong ប្រធានរដ្ឋ ចារលើសៀវភៅក្រាំងមាសមរណទុក្ខគោរពវិញ្ញាណក្ខន្ធលោក Khamtay Siphandone នៅស្ថានទូតឡាវប្រចាំទីក្រុងហាណូយ

ក្នុងសៀវភៅក្រាំងមាស លោក Luong Cuong ប្រធានរដ្ឋ បានសម្តែងនូវក្តីទុក្ខសោកចំពោះមរណភាពរបស់លោក Khamtay Siphandone អតីតប្រធានបក្សប្រជាជនបដិវត្តន៍ឡាវ និងជាអតីតប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ ជាមេដឹកនាំឆ្នើមរបស់ប្រជាជាតិឡាវ យុទ្ធជនបដិវត្តន៍ដែលបានលះបង់ពេញមួយជីវិតដើម្បីឯករាជ្យភាព សេរីភាព និងការអភិវឌ្ឍ និងវិបុលភាពរបស់ប្រទេសឡាវ។

លោក Pham Minh Chinh នាយករដ្ឋមន្ត្រី អញ្ជើញចូលរួមពិធីគោរពវិញ្ញាណក្ខន្ធលោក Khamtay Siphandone អតីតប្រធានបក្សប្រជាជនបដិវត្តន៍ឡាវ និងជាអតីតប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ (រូបថត៖ vnanet.vn)

លោក Pham Minh Chinh នាយករដ្ឋមន្ត្រី បានចារលើសៀវភៅក្រាំងមាសមរណទុក្ខថា មរណភាពរបស់លោក Khamtay Siphandone គឺជាការបាត់បង់ដ៏ធំធេងនៃបក្ស រដ្ឋ និងប្រជាជនឡាវ។ ថ្នាក់ដឹកនាំ និងប្រជាជនវៀតណាមបានបាត់បង់មិត្តល្អម្នាក់ ដែលជាសមមិត្តដ៏ជិតស្និត រហូតក្នុងការតស៊ូដើម្បីបុព្វហេតុបដិវត្តន៍របស់ប្រទេសជាតិទាំងពីរ និងទំនាក់ទំនងពិសេសឡាវ និងវៀតណាម។

* នារសៀលថ្ងៃទី ៤ ខែមេសា លោកឧត្តមសេនីយ៍ឯក Trinh Van Quyet លេខាគណៈកម្មាធិការមជ្ឈិមបក្ស សមាជិកអចិន្ត្រៃយ៍នៃគណៈកម្មាធិការបក្សយោធាមជ្ឈិម ប្រធានអគ្គស្នងការនយោបាយនៃកងទ័ពប្រជាជនវៀតណាម បានចូលរួមពិធីគោរពវិញ្ញាណក្ខន្ធ និងចារលើសៀវភៅក្រាំងមាសមរណទុក្ខគោរពវិញ្ញាណក្ខន្ធលោក Khamtay Siphandone នៅស្ថានទូតសាធារណរដ្ឋប្រជាធិបតេយ្យប្រជាមានិតឡាវប្រចាំហាណូយ។

ក្នុងសៀវភៅក្រាំងមាស ក្នុងនាមក្រសួងការពារប្រទេសវៀតណាម លោកឧត្តមសេនីយ៍ឯក Trinh Van Quyet បានសម្តែងនូវក្តីទុក្ខសោកចំពោះមរណភាពរបស់លោក Khamtay Siphandone និងសូមចូលរួមរំលែកទុក្ខយ៉ាងក្រៀមក្រំបំផុតចំពោះថ្នាក់ដឹកនាំជាន់ខ្ពស់ឡាវ ប្រជាជនឡាវទាំងអស់ និងក្រុមគ្រួសារលោក Khamtay Siphandone។ លោកឧត្តមសេនីយ៍ឯក Trinh Van Quyet បានសង្កត់ធ្ងន់ថា លោក Khamtay Siphandone គឺជាជាមេដឹកនាំឆ្នើម និងលះបង់ពេញមួយជីវិតដើម្បីបុព្វហេតុបដិវត្តន៍ ដើម្បីប្រទេសជាតិ កងទ័ព និងប្រជាជនឡាវ។ លោកឧត្តមសេនីយ៍ឯក Trinh Van Quyet ជឿជាក់ថា បក្ស រដ្ឋ កងទ័ព និងប្រជាជនឡាវនឹងបង្វែរការឈឺចាប់ឲ្យក្លាយជាកម្លាំង ដើម្បីជំនះរាល់ការលំបាក និងបញ្ហាប្រឈម ដើម្បីជម្រុញឲ្យប្រទេសឡាវ កាន់តែអភិវឌ្ឍ និងមានតួនាទីកាន់តែសំខាន់នៅលើឆាកអន្តរជាតិ។

*នាថ្ងៃទី ៤ ខែមេសា គណៈប្រតិភូនៃក្រសួង ស្ថាប័ន អង្គភាព និងមូលដ្ឋានមួយចំនួនរបស់វៀតណាម បានចូលរួមពិធីគោរពវិញ្ញាណក្ខន្ធ និងចារលើសៀវភៅក្រាំងមាសមរណទុក្ខគោរពវិញ្ញាណក្ខន្ធលោក Khamtay Siphandone នៅស្ថានទូតសាធារណរដ្ឋប្រជាធិបតេយ្យប្រជាមានិតឡាវប្រចាំហាណូយ ស្ថានអគ្គកុងស៊ុលឡាវប្រចាំទីក្រុង Da Nang និងទីក្រុងហូជីមិញ៕

បកប្រែដោយ Thanh Cong