ថ្នាក់ដឹកនាំវៀតណាមជួបពិភាក្សា និងជួបសវនាការជាមួយប្រធានាធិបតីនៃសាធារណរដ្ឋប៊ូរុនឌី

វៀតណាម និងប៊ូរុនឌី មានភាពស្រដៀងគ្នា និងគោលដៅរួមជាច្រើន

លោក To Lam អគ្គលេខាបក្ស បានវាយតំលៃខ្ពស់ចំពោះដំណើរទស្សនកិច្ចជាផ្លូវការនៅវៀតណាមរបស់លោក Évariste Ndayishimiye ប្រធានាធិបតី ដែលប្រព្រឹត្តទៅក្នុងបរិបទដែលប្រទេសទាំងពីរកំពុងត្រៀមរៀបចំដើម្បីអបអរសាទរខួបលើកទី ៥០ នៃការបង្កើតទំនាក់ទំនងការទូត (ថ្ងៃទី ១៦ ខែមេសា ឆ្នាំ១៩៧៥ / ថ្ងៃទី ១៦ ខែមេសា ឆ្នាំ២០២៥) តាមរយៈនោះ រួមចំណែកពង្រឹងទំនាក់ទំនងមិត្តភាពរវាងបក្សកុម្មុយនិស្តវៀតណាម និងគណបក្សក្រុមប្រឹក្សាជាតិការពារប្រជាធិបតេយ្យ កងកម្លាំងការពារលទ្ធិប្រជាធិបតេយ្យ (CNDD-FDD) ក៏ដូចជាទំនាក់ទំនងមិត្តភាព និងកិច្ចសហប្រតិបត្តិការល្អរវាងប្រទេសទាំងពីរ។

លោក To Lam អគ្គលេខាបក្ស ទទួលជួបលោក Évariste Ndayishimiye ប្រធានាធិបតីប៊ូរុនឌី

លោក To Lam អគ្គលេខាបក្ស បានសង្កត់ធ្ងន់ថា វៀតណាមតែងតែវាយតម្លៃខ្ពស់ចំពោះទំនាក់ទំនងមិត្តភាព និងកិច្ចសហប្រតិបត្តិការជាមួយបណ្ដាប្រទេសអាហ្រ្វិក រួមទាំងប៊ូរុនឌី ហើយមានបំណងជំរុញឲ្យទំនាក់ទំនងសហប្រតិបត្តិការរវាងប្រទេសទាំងពីរចូលក្នុងដំណាក់កាលថ្មី។

លោក Évariste Ndayishimiye ប្រធានាធិបតី បានសម្តែងនូវសេចក្តីរីករាយចំពោះទំនាក់ទំនងរវាងបក្សទាំងពីរដែលកាន់តែជិតស្និទ្ធ នាពេលកន្លងមក។ លោក Évariste Ndayishimiye ប្រធានាធិបតី សង្កត់ធ្ងន់លើបំណងប្រាថ្នារបស់គណបក្ស រដ្ឋ និងរដ្ឋាភិបាលប៊ូរុនឌី ក្នុងការអភិវឌ្ឍទំនាក់ទំនងសហប្រតិបត្តិការលើវិស័យជាច្រើនជាមួយវៀតណាម ជាពិសេសលើវិស័យវិនិយោគ វិទ្យាសាស្ត្រ-បច្ចេកវិទ្យា កសិកម្ម អប់រំ-បណ្តុះបណ្តាល...។

ភាគីទាំងពីរបានឯកភាពបន្តបង្កើនការផ្លាស់ប្តូរគណៈប្រតិភូគ្រប់លំដាប់ថ្នាក់ និងគ្រប់បណ្តាញ ដើម្បីពង្រឹងទំនុកចិត្តផ្នែកនយោបាយ និងបង្កើតសន្ទុះថ្មីសម្រាប់កិច្ចសហប្រតិបត្តិការ។ បក្សទាំងពីរបង្កើនជំនួប និងលើកកម្ពស់ការយោគយល់គ្នាទៅវិញទៅមក រឹតបន្តឹងទំនាក់ទំនងរវាងបក្សទាំងពីរ ហើយលើកទឹកចិត្តដល់អង្គការស្ត្រី និងអង្គការយុវជននៃបក្សទាំងពីរ បង្កើនការផ្លាស់ប្តូរ ដើម្បីជម្រុញចំណងមិត្តភាព និងលើកកម្ពស់ការយោគយល់គ្នារវាងប្រជាជននៃប្រទេសទាំងពីរ ជាពិសេសយុវជនជំនាន់ក្រោយ។ ថ្នាក់ដឹកនាំទាំងពីរបានអះអាងថា ប្រទេសទាំងពីរនឹងបន្តសហការយ៉ាងជិតស្និទ្ធ និងគាំទ្រគ្នាទៅវិញទៅមក ជាពិសេសនៅអង្គការសហប្រជាជាតិ អង្គការអន្តរជាតិនិយាយភាសាបារាំង (OIF) ជំរុញទំនាក់ទំនងជាមួយអង្គការសំខាន់ៗដែលភាគីទាំងពីរជាសមាជិកដូចជាអាស៊ាន និងសហភាពអាហ្វ្រិក (AU) ព្រមទាំង បញ្ជាក់ពីការគាំទ្រការដោះស្រាយវិវាទដោយសន្តិវិធី ឈរលើមូលដ្ឋានគោរពច្បាប់អន្តរជាតិ ដើម្បីរក្សាស្ថិរភាព និងសន្តិសុខក្នុងតំបន់នីមួយៗ។

កិច្ចសហប្រតិបត្តិការរវាងវៀតណាម និងប៊ូរុនឌី នៅតែមានសក្ដានុពលជាច្រើន

នាព្រឹកថ្ងៃទី ៤ ខែមេសា នៅវិមានប្រធានរដ្ឋ លោក Luong Cuong ប្រធានរដ្ឋ និងលោកជំទាវ បានអញ្ជើញជាអធិបតីក្នុងពិធីទទួលបដិសណ្ឋារកិច្ចលោក Évariste Ndayishimiye ប្រធានាធិបតីនៃសាធារណរដ្ឋប៊ូរុនឌី និងលោកជំទាវ។ បន្ទាប់ពីពិធីទទួលបដិសណ្ឋារកិច្ច លោក Luong Cuong ប្រធានរដ្ឋបានជួបពិភាក្សាជាមួយលោក Évariste Ndayishimiye ប្រធានាធិបតី។

ទិដ្ឋភាពនៃកិច្ចពិភាក្សា

ក្នុងកិច្ចពិភាក្សា ភាគីទាំងពីរបានឯកភាពបង្កើនការផ្លាស់ប្តូរគណៈប្រតិភូជាន់ខ្ពស់លើគ្រប់បណ្តាញ ដើម្បីពង្រឹងទំនុកចិត្តផ្នែកនយោបាយ និងអនុវត្តយន្តការសហប្រតិបត្តិការទ្វេភាគីប្រកបដោយប្រសិទ្ធភាព។ ភាគីទាំងពីរវាយតម្លៃថា ការជម្រុញទំហំពាណិជ្ជកម្មទ្វេភាគីនៅមានសក្ដានុពលជាច្រើន ហើយឯកភាពជំរុញការផ្លាស់ប្តូរព័ត៌មានអំពីតម្រូវការនៃទីផ្សារ ឱកាសវិនិយោគ និងបង្កើតលក្ខខណ្ឌអំណោយផលសម្រាប់ធុរកិច្ចនៃប្រទេសទាំងពីរក្នុងការតភ្ជាប់ កិច្ចសហប្រតិបត្តិការ ការធ្វើពិពិធកម្មផលិតផលពាណិជ្ជកម្ម និងបង្កើតលក្ខណៈងាយស្រួលសម្រាប់ទំនិញដែលមានប្រៀបខ្លាំងរបស់ប្រទេសនីមួយៗ។ ថ្នាក់ដឹកនាំទាំងពីរបានឯកភាពបន្តផ្តោតលើការជំរុញកិច្ចសហប្រតិបត្តិការលើវិស័យដែលមានប្រៀបខ្លាំង និងមានការយកចិត្តទុកដាក់ដូចគ្នា។ល។ ថ្នាក់ដឹកនាំទាំងពីរក៏បានឯកភាពបង្កើនកិច្ចសហប្រតិបត្តិការ និងការជួយគាំទ្រគ្នាទៅវិញទៅមកនៅអង្គការអន្តរជាតិ វេទិកាពហុភាគី និងអន្តរតំបន់។

ចំពោះបញ្ហាសមុទ្រខាងកើត លោក Luong Cuong ប្រធានរដ្ឋ បានស្នើឲ្យប្រទេសប៊ូរុនឌី គាំទ្រគោលជំហររបស់អាស៊ាន ក្នុងការដោះស្រាយជម្លោះដែនសមុទ្រដោយសន្តិវិធី ឈរលើមូលដ្ឋានគោរពច្បាប់អន្តរជាតិ ជាពិសេស UNCLOS ឆ្នាំ១៩៨២ និងការខិតខំប្រឹងប្រែងរបស់អាស៊ាន ដើម្បីកសាងសមុទ្រខាងកើតប្រកបដោយសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍប្រកបដោយចីរភាព។

បន្ទាប់ពីកិច្ចពិភាក្សា លោក Luong Cuong ប្រធានរដ្ឋ និងលោក Évariste Ndayishimiye ប្រធានាធិបតី បានអញ្ជើញជាសាក្សីក្នុងពិធីចុះហត្ថលេខាលើឯកសារកិច្ចសហប្រតិបត្តិការចំនួនពីរ។

* នារសៀលថ្ងៃទី៤ ខែមេសា លោក Pham Minh Chinh នាយករដ្ឋមន្ត្រីវៀតណាម បានជួបសវនាការជាមួយលោក Évariste Ndayishimiye ប្រធានាធិបតី។

លោក Pham Minh Chinh នាយករដ្ឋមន្ត្រី បានអបអរសាទរចំពោះសមិទ្ធផលសំខាន់ៗដែលប្រទេស និងប្រជាជនប៊ូរុនឌី សម្រេចបានក្រោមការដឹកនាំរបស់លោក Évariste Ndayishimiye ប្រធានាធិបតី។

លោក Pham Minh Chinh នាយករដ្ឋមន្ត្រី និងលោក Évariste Ndayishimiye ប្រធានាធិបតី

លោក Évariste Ndayishimiye ប្រធានាធិបតី វាយតំលៃខ្ពស់ និងអបអរសាទរចំពោះលទ្ធផលនៃការគ្រប់គ្រងសេដ្ឋកិច្ចសង្គមដែលរដ្ឋាភិបាលវៀតណាមសម្រេចបាននាពេលថ្មីៗនេះ ហើយអះអាងថា វៀតណាមជាមិត្តជិតស្និទ្ធ និងជាដៃគូដ៏គួរឱ្យទុកចិត្តរបស់ប៊ូរុនឌី ក្នុងតំបន់អាស៊ី។

ថ្នាក់ដឹកនាំទាំងពីរបានឯកភាពជំរុញការផ្លាស់ប្តូរគណៈប្រតិភូគ្រប់លំដាប់ថ្នាក់ ពង្រឹងកិច្ចសហប្រតិបត្តិការលើវិស័យពាណិជ្ជកម្ម និងវិនិយោគ វិទ្យាសាស្ត្រ និងបច្ចេកវិទ្យា ហើយពង្រីកកិច្ចសហប្រតិបត្តិការលើវិស័យថ្មីដូចជា កសិកម្ម រ៉ែ ទេសចរណ៍ សាងសង់ហេដ្ឋារចនាសម្ព័ន្ធ សម្ភារសំណង់...

ថ្នាក់ដឹកនាំទាំងពីរបានវាយតម្លៃចំពោះការចុះហត្ថលេខាលើកិច្ចព្រមព្រៀងក្របខណ្ឌស្ដីពីកិច្ចសហប្រតិបត្តិការរវាងរដ្ឋាភិបាលទាំងពីរ ក៏ដូចជាអនុស្សរណៈនៃការយោគយល់គ្នាស្តីពីការបង្កើតយន្តការពិគ្រោះយោបល់នយោបាយ និងការបរទេស ព្រមទាំងបានអះអាងថា ស្ថាប័ននៃប្រទេសទាំងពីរនឹងបន្តការចរចាដើម្បីចុះហត្ថលេខាលើឯកសារជាច្រើនថែមទៀត ក្នុងបំណងបង្កើតលក្ខខណ្ឌអំណោយផលសម្រាប់ការជំរុញកិច្ចសហប្រតិបត្តិការទ្វេភាគី។ ទន្ទឹមនឹងនោះ ភាគីទាំងពីរគប្បីលើកកម្ពស់ការយោគយល់គ្នា ជម្រុញកិច្ចសហប្រតិបត្តិការលើវិស័យបណ្តុះបណ្តាល ការផ្លាស់ប្តូរ ការតភ្ជាប់រវាងប្រជាជននិងប្រជាជន និងរវាងធុរកិច្ចនៃប្រទេសទាំងពីរ...

ចំពោះកិច្ចសហប្រតិបត្តិការពហុភាគី ភាគីទាំងពីរបានឯកភាពបង្កើនកិច្ចសហការ និងការជួយគាំទ្រគ្នាទៅវិញទៅមកនៅវេទិកា និងអង្គការអន្តរជាតិ រួមចំណែករក្សាសន្តិភាព ស្ថិរភាព និងកិច្ចសហប្រតិបត្តិការក្នុងតំបន់នីមួយៗ និងលើពិភពលោក៕

បកប្រែដោយ Thuy Anh