ភាពជាដៃគូយុទ្ធសាស្ត្រវៀតណាម - អេស្ប៉ាញ ឆ្ពោះទៅអនាគតកាន់តែសំខាន់ និងទូលំទូលាយ

តបតាមការអញ្ជើញរបស់ លោក Pham Minh Chinh នាយករដ្ឋមន្ត្រីវៀតណាម ចាប់ពីថ្ងៃទី ៨ ដល់ថ្ងៃទី ១០ មេសា លោក Pedro Sanchez នាយករដ្ឋមន្ត្រីអេស្ប៉ាញ នឹងអញ្ជើញមកបំពេញទស្សនកិច្ចជាផ្លូវការនៅវៀតណាម។ លោក Doan Thanh Song ឯកអគ្គរដ្ឋទូតវៀតណាមប្រចាំនៅអេស្ប៉ាញ បានឲ្យដឹងថា នេះជាលើកទីមួយហើយដែលនាយករដ្ឋមន្ត្រីអេស្ប៉ាញអញ្ជើញមកបំពេញទស្សនកិច្ចជាផ្លូវការនៅវៀតណាម ចាប់តាំងពីប្រទេសទាំងពីរបានបង្កើតទំនាក់ទំនងការទូតក្នុងឆ្នាំ១៩៧៧មក ហើយក៏ជាដំណើរទស្សនកិច្ចផ្លូវការលើកដំបូងនៅវៀតណាមរបស់មេដឹកនាំជាន់ខ្ពស់អេស្ប៉ាញ ចាប់តាំងពីព្រះរាជទស្សនកិច្ច​​របស់ព្រះមហាក្សត្រអេស្ប៉ាញ Juan Carlos និងម្ចាស់ក្សត្រី Sofia ក្នុងឆ្នាំ២០០៦។

លោក Pham Minh Chinh នាយករដ្ឋមន្ត្រីវៀតណាម ជួបជាមួយ លោក Pedro Sanchez នាយករដ្ឋមន្ត្រីអេស្ប៉ាញ នៅខាងក្រៅកិច្ចប្រជុំកំពូល G20 នៅប្រទេសប្រេស៊ីល ខែវិច្ឆិកា ឆ្នាំ ២០២៤ (រូបថត៖ VGP)

ក្នុងអំឡុងពេលទស្សនកិច្ចនៅប្រទេសវៀតណាម  លោក Pedro Sanchez នាយករដ្ឋមន្ត្រី នឹងមានសកម្មភាពជាច្រើនទាំងនៅទីក្រុងហាណូយ និងទីក្រុងហូជីមិញ។ ភាគីទាំងពីរនឹងផ្តោតលើការផ្លាស់ប្តូរវិធានការជំរុញកិច្ចសហប្រតិបត្តិការដើម្បីបង្កើនទំនុកចិត្តនយោបាយ ពង្រឹងមូលដ្ឋានទំនាក់ទំនងដែលមានស្រាប់ និងបើកឱកាសថ្មីក្នុងវិស័យសក្តានុពល ជាពិសេសក្នុងវិស័យនយោបាយ - ការទូត សេដ្ឋកិច្ច - ពាណិជ្ជកម្ម - វិនិយោគ វិទ្យាសាស្ត្រ និងបច្ចេកវិទ្យា ហេដ្ឋារចនាសម្ព័ន្ធ ការដឹកជញ្ជូនក្នុងទីក្រុង ការអភិវឌ្ឍប្រកបដោយចីរភាព ថាមពលកកើតឡើងវិញ ... ភាគីទាំងពីរក៏រំពឹងថានឹងចុះហត្ថលេខាលើឯកសារមួយចំនួនដើម្បីជំរុញកិច្ចសហប្រតិបត្តិការទ្វេភាគីផងដែរ។

នៅមុនដំណើរទស្សនកិច្ចនេះ លោក Pedro Sánchez នាយករដ្ឋមន្ត្រី បានសង្កត់ធ្ងន់ថា “វៀតណាមបានក្លាយជាមេដែកសម្រាប់ការវិនិយោគបរទេស” និងបានអះអាងថា “ដោយសារមានកិច្ចព្រមព្រៀងពាណិជ្ជកម្មសេរីជាមួយសហភាពអឺរ៉ុប បានជាក្រុមហ៊ុនអេស្ប៉ាញ ថ្នាក់ដឹកនាំក្នុងវិស័យដូចជាហេដ្ឋារចនាសម្ព័ន្ធ និងថាមពលកកើតឡើងវិញ នឹងអាចអភិវឌ្ឍឱកាសអាជីវកម្មសំខាន់ៗនៅវៀតណាម”។ យោងតាមឯកអគ្គរដ្ឋទូត Doan Thanh Son ឲ្យ​ដឹង​ថា ប្រសាសន៍ពោលខាង​លើនេះ រួមជាមួយនឹងដំណើរទស្សនកិច្ចរបស់លោកនាយករដ្ឋមន្ត្រីនៅវៀតណាម នឹងជួយតម្រង់ទិសអាទិភាពរបស់ប្រជាជនអេស្ប៉ាញ និងសហគមន៍ធុរកិច្ចនៅវៀតណាម បើកឱកាសសហប្រតិបត្តិការជាច្រើនទៀត។

លោកឯកអគ្គរដ្ឋទូត Doan Thanh Song បានឲ្យដឹងថា ជាមួយនឹងការប្តេជ្ញាចិត្តនយោបាយ ការប្តេជ្ញាចិត្ត និងទំនុកចិត្តរវាងប្រទេសទាំងពីរ រួមជាមួយនឹងថ្នាក់ដឹកនាំនៃសាជីវកម្មឈានមុខគេរបស់អេស្ប៉ាញជិត ២០ ដែលអមដំណើរនាយករដ្ឋមន្រ្តីក្នុងដំណើរទស្សនកិច្ចនេះ ទំនាក់ទំនងសេដ្ឋកិច្ច និងពាណិជ្ជកម្មរវាងប្រទេសទាំងពីរនាពេលខាងមុខសន្យាថានឹងមានការផ្លាស់ប្តូរជាវិជ្ជមានជាច្រើន។

បកប្រែដោយ Thanh Cong