លោកអគ្គលេខាបក្ស To Lam អញ្ជើញចូលរួមពិធីរំលឹកខួបលើកទី ៣០ នៃការចូលជាសមាជិកអាស៊ាន

នៅក្នុងសុន្ទរកថាគោលនយោបាយ លោកអគ្គលេខាបក្ស To Lam បានលើកឡើងអំពីសមិទ្ធិផលរបស់អាស៊ានក្នុងរយៈពេល ៦០ ឆ្នាំកន្លងមក ក៏ដូចជាការរួមចំណែកដ៏សំខាន់របស់សមាគម និងតួនាទីស្នូលក្នុងការរក្សាសន្តិភាព ស្ថិរភាព និងការលើកកម្ពស់កិច្ចសហប្រតិបត្តិការក្នុងតំបន់។ ទន្ទឹមនឹងនោះ លោកអគ្គលេខាបក្សក៏បានចង្អុលបង្ហាញពីបញ្ហាប្រឈម និងឱកាសថ្មីៗសម្រាប់អាស៊ានក្នុងបរិបទដែលស្ថានភាពពិភពលោកកំពុងផ្លាស់ប្តូរឆ្ពោះទៅរកពហុភាគី និងពហុមជ្ឈិម។ ការផ្ទុះនៃវិទ្យាសាស្រ្ត បច្ចេកវិទ្យានាំឱ្យមានការផ្លាស់ប្តូរជាមូលដ្ឋាននៅក្នុងជីវភាពសេដ្ឋកិច្ច និងសង្គម; និងការកើនឡើងនៃបញ្ហាសន្តិសុខមិនប្រពៃណី ដូចជាការប្រែប្រួលអាកាសធាតុ និងសន្តិសុខតាមអ៊ីនធឺណិត។

លោកអគ្គលេខាបក្ស To Lam ថ្លែងក្នុងពិធីនេះ (រូបថត៖ vnanet.vn)

ឆ្ពោះទៅរកអនាគត លោកអគ្គលេខាបក្សបានលើកឡើងទិសដៅសំខាន់ៗមួយចំនួន ដើម្បីជួយអាស៊ានឱ្យកាន់តែរឹងមាំ និងពង្រឹងតួនាទីមជ្ឈភាពរបស់ខ្លួននៅក្នុងរចនាសម្ព័ន្ធតំបន់។ ដោយឈរលើមូលដ្ឋាននៃការទទួលមរតក និងបន្តសមិទ្ធិផលក្នុងរយៈពេល ៦០ ឆ្នាំកន្លងមក អាស៊ានចាំបាច់ត្រូវមានគំនិត និងយុទ្ធសាស្ត្រមុតស្រួច ដើម្បីបង្កើតរបកគំហើញសម្រាប់ការតភ្ជាប់ និងកិច្ចសហប្រតិបត្តិការក្នុងតំបន់។

លោកអគ្គលេខាបក្សបានសង្កត់ធ្ងន់លើសារៈសំខាន់នៃការបន្តពង្រឹងសាមគ្គីភាពក្នុងប្លុក និងស្វ័យភាពជាយុទ្ធសាស្ត្រ បង្កើនភាពធន់នឹងសេដ្ឋកិច្ចតាមរយៈដំណោះស្រាយអភិវឌ្ឍន៍ប្រកបដោយភាពច្នៃប្រឌិត លើកកម្ពស់អត្តសញ្ញាណអាស៊ាន លើកកំពស់ប្រសិទ្ធភាពនៃការកសាងស្តង់ដារនៃការប្រព្រឹត្ត និងការលើកកម្ពស់ប្រសិទ្ធភាពប្រតិបត្តិការរបស់លេខាធិការដ្ឋានអាស៊ាន និងទីភ្នាក់ងារជំនាញ។

លោកអគ្គលេខាបក្ស To Lam និងលោកជំទាវ រួមជាមួយលោកអគ្គលេខាធិការអាស៊ាន  កៅ គឹមហួន និងលោកជំទាវ ធ្វើពិធីគោរពទង់អាស៊ាន

កម្មវិធីសិល្បៈដើម្បីអបអរសាទរខួបអនុស្សាវរីយ៍

លោកអគ្គលេខាបក្សក៏បានអះអាងដែរថា អាស៊ានគឺជាសសរស្តម្ភសំខាន់ក្នុងគោលនយោបាយការបរទេសរបស់វៀតណាម និងជាផ្នែកមិនអាចកាត់ផ្តាច់បាននៃយុទ្ធសាស្ត្រអភិវឌ្ឍន៍ និងសមាហរណកម្មរបស់វៀតណាម។

ដោយមានអាស៊ានជាចំណុចចាប់ផ្តើមនោះ វៀតណាមបានធ្វើសមាហរណកម្មកាន់តែខ្លាំងឡើងក្នុងសហគមន៍អន្តរជាតិ ហើយរហូតមកដល់ពេលនេះបានបង្កើតទំនាក់ទំនងការទូតជាមួយប្រទេសចំនួន ១៩៤ រួមទាំងការបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយជាមួយប្រទេសចំនួន ៣៥ រួមទាំងសមាជិកអាស៊ានទាំងអស់ និងដៃគូសំខាន់ៗ របស់អាស៊ានផងដែរ។ វៀតណាមក៏ជាសមាជិកនៃវេទិកា/អង្គការតំបន់/អន្តរជាតិជាង ៧០ និងមានបណ្តាញ FTA ជាមួយប្រទេស និងសេដ្ឋកិច្ចជាង ៦០ ដោយហេតុនេះក្លាយជាប្រទេសមួយក្នុងចំណោម ៤០ ប្រទេសដែលមានសេដ្ឋកិច្ចធំជាងគេលើពិភពលោក និងជាប្រទេសដែលមានសេដ្ឋកិច្ចកំពូលទាំង ២០ លើពិភពលោកទាក់ទងនឹងការទាក់ទាញការវិនិយោគពីបរទេស និងទំហំពាណិជ្ជកម្ម។

លោកអគ្គលេខាបក្ស To Lam និងលោកអគ្គលេខាធិការអាស៊ាន កៅ គឹមហួន ថតរូបជាមួយក្រុមសិល្បៈសម្តែងក្នុងពិធី

ចែករំលែកអំពីគោលនយោបាយការបរទេស និងគោលការណ៍ណែនាំរបស់វៀតណាមក្នុងយុគសម័យថ្មី លោកអគ្គលេខាបក្សបានអះអាងថា វៀតណាមត្រៀមខ្លួនជាស្រេចក្នុងការរួមចំណែកយ៉ាងសកម្មថែមទៀតចំពោះនយោបាយពិភពលោក សេដ្ឋកិច្ចពិភពលោក និងអរិយធម៌មនុស្ស។ ជាពិសេស ដោយកំណត់អាស៊ានជាយន្តការសហប្រតិបត្តិការពហុភាគីផ្ទាល់ និងមានសារៈសំខាន់បំផុត វៀតណាមនឹងលើកកំពស់ស្មារតីទទួលខុសត្រូវ រួមចំណែកយ៉ាងសកម្មក្នុងការងាររួមរបស់សមាគមដោយបាវចនានៃភាពច្នៃប្រឌិតក្នុងគំនិត ការច្នៃប្រឌិតក្នុងវិធីសាស្រ្ត ភាពបត់បែនក្នុងការអនុវត្ត ប្រសិទ្ធភាពក្នុងរបៀបធ្វើ និងការប្តេជ្ញាចិត្តក្នុងសកម្មភាព។

លោក កៅ គឹមហួន អគ្គលេខាធិការអាស៊ាន

ថ្លែងមតិក្នុងពិធីនេះ លោក កៅ គឹមហួន អគ្គលេខាធិការអាស៊ាន ឯកអគ្គរដ្ឋទូត ប្រធានគណៈប្រតិភូនៃប្រទេសសមាជិកមួយចំនួន និងដៃគូក្នុងអាស៊ាន និងនាយកប្រតិបត្តិសាលាគោលនយោបាយសាធារណៈ ERIA បានវាយតម្លៃខ្ពស់ចំពោះតួនាទីសកម្ម និងវិជ្ជមានរបស់វៀតណាមក្នុងអាស៊ានក្នុងរយៈពេល ៣០ ឆ្នាំកន្លងមក។ ឯកអគ្គរដ្ឋទូតនានាបានវាយតំលៃខ្ពស់ចំពោះសុន្ទរកថាគោលនយោបាយរបស់លោកអគ្គលេខាធិកា To Lam ជាមួយនឹងការវាយតម្លៃយ៉ាងជ្រាលជ្រៅ និងចក្ខុវិស័យរបស់វៀតណាមចំពោះអាស៊ាន។

លោកអគ្គលេខាបក្ស To Lam និងលោកជំទាវ រួមជាមួយនឹង លោក កៅ គឹមហួន អគ្គលេខាធិការអាស៊ាន និងលោកជំទាវ បានកាត់នំខេក ដើម្បីអបអរសាទរខួប ៣០ឆ្នាំ ដែលវៀតណាមចូលជាសមាជិកអាស៊ាន

លោកអគ្គលេខាធិកា និងឯកអគ្គរដ្ឋទូតបានចែករំលែកការវាយតម្លៃជាវិជ្ជមានអំពីការរួមវិភាគទានសំខាន់ៗរបស់វៀតណាមក្នុងដំណើរការកសាងសហគមន៍អាស៊ាន ជាពិសេសតាមរយៈអាណត្តិទាំងបីរបស់ខ្លួនក្នុងនាមជាប្រធានអាស៊ាន។ លោកអគ្គលេខាធិកា និងឯកអគ្គរដ្ឋទូតក៏បានទទួលស្គាល់ការខិតខំប្រឹងប្រែងរបស់វៀតណាមក្នុងការជំរុញកិច្ចសហប្រតិបត្តិការសេដ្ឋកិច្ច និងពាណិជ្ជកម្មក្នុងប្លុក និងជាមួយប្រទេសក្រៅតំបន់ បង្កើតគំនិតច្នៃប្រឌិតថ្មី ឆ្លើយតបនឹងបញ្ហាប្រឈមសកល និងរួមចំណែកយ៉ាងសកម្មក្នុងការរក្សាសន្តិភាព និងស្ថិរភាពក្នុងតំបន់។

ប្រទេសនានាបានសម្តែងនូវជំនឿរបស់ខ្លួនថា ដោយមានការប្ដេជ្ញាចិត្តយ៉ាងមុតមាំ និងការដឹកនាំដ៏ឈ្លាសវៃរបស់លោកអគ្គលេខាបក្ស To Lam វៀតណាមនឹងបន្តអភិវឌ្ឍប្រកបដោយវិបុលភាព និងជាកម្លាំងចលករដ៏សំខាន់មួយដើម្បីនាំអាស៊ានបោះជំហានយ៉ាងរឹងមាំទៅក្នុងដំណាក់កាលអភិវឌ្ឍន៍ថ្មី។

ភ្លាមៗបន្ទាប់ពីពិធីរំលឹកខួបលើកទី ៣០ នៃទិវាវៀតណាមចូលជាសមាជិកអាស៊ាន កម្មវិធីសិល្បៈពិសេសមួយត្រូវបានប្រារព្ធឡើង ដែលសំដែងដោយសិល្បករវៀតណាម។

បកប្រែដោយ Thanh Cong