លោកអគ្គលេខាបក្ស To Lam អញ្ជើញជាអធិបតីក្នុងកិច្ចប្រជុំធ្វើការជាមួយថ្នាក់ដឹកនាំសំខាន់ៗនៃខេត្ត Gia Lai

នាព្រឹកថ្ងៃទី៦ ខែមករា នៅខេត្ត Gia Lai លោកអគ្គលេខាបក្ស To Lam បានអញ្ជើញជាអធិបតីក្នុងកិច្ចប្រជុំធ្វើការជាមួយថ្នាក់ដឹកនាំសំខាន់ៗរបស់ខេត្តអំពីលទ្ធផលនៃការអនុវត្តសេចក្តីសម្រេចចិត្តរបស់បក្សស្តីពីការអភិវឌ្ឍសេដ្ឋកិច្ចសង្គមនៅមូលដ្ឋាន និងត្រៀមរៀបចំមហាសន្និបាតបក្សគ្រប់លំដាប់ថ្នាក់ លើកទី១៤។

លោកអគ្គលេខាបក្ស To Lam ថ្លែងក្នុងកិច្ចប្រជុំ (រូប​ថត៖ vnanet.vn)

នៅក្នុងជំនួបនេះ លោកអគ្គលេខាបក្ស To Lam បានទទួលស្គាល់ការខិតខំប្រឹងប្រែង និងលទ្ធផលដែលខេត្ត Gia Lai សម្រេចបានក្នុងរយៈពេលថ្មីៗនេះ។ ទាក់ទិននឹងទិសដៅនាពេលខាងមុខ លោកអគ្គលេខាបក្សបានសង្កត់ធ្ងន់ថា ខេត្ត Gia Lai ចាំបាច់ត្រូវអភិវឌ្ឍសេដ្ឋកិច្ចរបស់ខ្លួនយ៉ាងស៊ីជម្រៅ គ្រប់ជ្រុងជ្រោយ និងប្រកបដោយបរិយាប័ន្នដោយឈរលើការអភិវឌ្ឍន៍បច្ចេកវិទ្យាខ្ពស់ កសិកម្មសរីរាង្គ និងនិរន្តរភាព។ ក្រៅពីនេះ ខេត្ត Gia Lai ក៏ត្រូវជំរុញឧស្សាហូបនីយកម្ម និងទំនើបកម្មកសិកម្មជនបទតាមវិធីសាស្ដ្រ ដោយភ្ជាប់ជាមួយការការពារធនធានធម្មជាតិ និងជីវចម្រុះ អភិវឌ្ឍឧស្សាហកម្មមានឧត្តមភាព អភិវឌ្ឍវិស័យទេសចរណ៍ឱ្យក្លាយជាវិស័យសេដ្ឋកិច្ចបៃតង ជាវិស័យសេដ្ឋកិច្ចដ៏សំខាន់ ប្រកបដោយនិរន្តរភាព គុណភាព  បង្ហាញពីអត្តសញ្ញាណនៃតំបន់ខ្ពង់រាប Tay Nguyen។

ទិដ្ឋភាពនៃកិច្ចប្រជុំ (រូប​ថត៖ vnanet.vn)

ដើម្បីដាក់ពង្រាយសសរស្តម្ភទាំងបីនេះឱ្យមានប្រសិទ្ធភាព លោកអគ្គលេខាបក្ស To Lam បានសង្កត់ធ្ងន់ថា៖ “ខេត្តចាំបាច់ត្រូវកែលម្អយ៉ាងខ្លាំងនូវបរិយាកាសវិនិយោគ និងធ្វើអាជីវកម្មឲ្យមានតម្លាភាព ងាយស្រួល និងចំណាយតិច។ ជំរុញការអភិវឌ្ឍន៍សេដ្ឋកិច្ចឌីជីថល និងការច្នៃប្រឌិត កែលម្អហេដ្ឋារចនាសម្ព័ន្ធដឹកជញ្ជូនតភ្ជាប់តំបន់ទីក្រុង តំបន់មានកម្លាំងចលករ តំបន់វត្ថុធាតុដើម មជ្ឈមណ្ឌលសេដ្ឋកិច្ច ហេដ្ឋារចនាសម្ព័ន្ធធារាសាស្ត្រ ហេដ្ឋារចនាសម្ព័ន្ធឧស្សាហកម្ម សេវាកម្ម និងការអភិវឌ្ឍន៍ទេសចរណ៍”។

លោកអគ្គលេខាបក្ស To Lam ក៏បានកត់សម្គាល់ផងដែរថា ខេត្ត Gia Lai ចាំបាច់ត្រូវភ្ជាប់ទំនាក់ទំនងអភិវឌ្ឍន៍សេដ្ឋកិច្ចយ៉ាងជិតស្និទ្ធជាមួយធានាសន្តិសុខ ការពារជាតិ ការពារអធិបតេយ្យភាព បូរណភាពទឹកដី សន្តិសុខព្រំដែន និងទប់ស្កាត់ប្រកបដោយប្រសិទ្ធភាពនូវការឆ្លងដែនខុសច្បាប់ ការរត់ពន្ធ ឧក្រិដ្ឋកម្មឆ្លងដែន។

លោកអគ្គលេខាបក្ស To Lam ប្រគល់គិលានដ្ឋានជូនឃុំ Glar ស្រុក Dak Doa

គួររំលឹកថា នាព្រឹកថ្ងៃទី៦ មករា លោកអគ្គលេខាបក្ស To Lam បានប្រគល់គិលានដ្ឋានជូនឃុំ Glar ស្រុក Dak Doa មានតម្លៃ ៥ ពាន់លានដុង (២០០,០០០ ដុល្លារអាមេរិក) ដើម្បីមូលដ្ឋានអនុវត្តការងារថែទាំសុខភាពរបស់បណ្តាជនជាតិរស់នៅក្នុងតំបន់៕

បកប្រែដោយ Duy Hoan