ទំនាក់ទំនងសាមគ្គីភាពពិសេសរវាងវៀតណាម និងឡាវកាន់តែស៊ីជម្រៅ

លោក Bui Thanh Son បានពាំនាំការអបអរសាទរពីថ្នាក់ដឹកនាំជាន់ខ្ពស់វៀតណាម ជូនចំពោះថ្នាក់ដឹកនាំជាន់ខ្ពស់ឡាវ ក្នុងឱកាសរំលឹកខួបលើកទី៤៩ នៃទិវាបុណ្យឯករាជ្យជាតិឡាវ និងខួបលើកទី១០៤ នៃថ្ងៃកំណើតលោកប្រធាន Kaysone Phomvihane។ លោក Thongsavanh Phomvihane បានថ្លែងអំណរគុណចំពោះជំនួយដ៏មានតម្លៃ និងមានប្រសិទ្ធភាពដែលវៀតណាមផ្តល់ដល់ប្រទេសឡាវក្នុងរយៈពេលកន្លងមក ជាពិសេសក្នុងឆ្នាំ២០២៤ ដែលឡាវកាន់តំណែងជាប្រធានអាស៊ាន។

លោក Bui Thanh Son ជួបសន្ទនាតាមប្រព័ន្ធវីដេអូជាមួយលោក Thongsavanh Phomvihane (រូបថត៖ ក្រសួងការបរទេសវៀតណាម)

ភាគីទាំងពីររីករាយដោយបានឃើញថា ទំនាក់ទំនងមិត្តភាព សាមគ្គីភាពពិសេស និងកិច្ចសហប្រតិបត្តិការលើគ្រប់វិស័យរវាងវៀតណាម និងឡាវកាន់តែស៊ីជម្រៅ នាំមកនូវផលប្រយោជន៍ជាក់ស្តែង ជូនប្រជាជននៃប្រទេសទាំងពីរ។ ភាគីទាំងពីរបានវាយតម្លៃខ្ពស់ចំពោះកិច្ចសហប្រតិបត្តិការជិតស្និទ្ធ និងមានប្រសិទ្ធភាពរវាងក្រសួងការបរទេសទាំងពីរនាពេលកន្លងមក។ លោក Bui Thanh Son បានស្នើថា ភាគីទាំងពីរបន្តសហការជាមួយក្រសួង ស្ថាប័នពាក់ព័ន្ធ ដើម្បីជំរុញការអនុវត្តកិច្ចព្រមព្រៀងកម្រិតខ្ពស់ ជាពិសេសដោះស្រាយការលំបាក និងឧបសគ្គនៃគម្រោងសំខាន់ៗ តាមរយៈនោះ រួមចំណែកលើកកម្ពស់ប្រសិទ្ធភាពនៃកិច្ចសហប្រតិបត្តិការសេដ្ឋកិច្ចទ្វេភាគី។ ភាគីទាំងពីរបានឯកភាពបន្តអនុវត្តប្រកបដោយប្រសិទ្ធភាពនូវឯកសារច្បាប់ស្តីពីព្រំដែន និងកិច្ចព្រមព្រៀងអន្តរជាតិពាក់ព័ន្ធ ដោយផ្តល់អាទិភាពដល់ការបើកថ្មី និងដំឡើងច្រកទ្វារព្រំដែន ដើម្បីបង្កើនការតភ្ជាប់ បន្តសហការយ៉ាងជិតស្និទ្ធក្នុងការងារកុងស៊ុល និងការការពារប្រជាពលរដ្ឋនៃប្រទេសទាំងពីរ រក្សា និងបង្កើនសកម្មភាពផ្លាស់ប្តូរព័ត៌មាន និងការផ្លាស់ប្ដូររវាងអង្គភាពពាក់ព័ន្ធ។ លោក Bui Thanh Son បានស្នើថា ភាគីទាំងពីរបន្តសហការយ៉ាងជិតស្និទ្ធ និងគាំទ្រគ្នាទៅវិញទៅមកនៅវេទិកាអន្តរជាតិ និងតំបន់ បង្កើនការចែករំលែកទស្សនៈលើបញ្ហាអន្តរជាតិ និងតំបន់ដែលភាគីទាំងពីរមានការយកចិត្តទុកដាក់ដូចគ្នា៕

បកប្រែដោយ Thuy Anh