ជំរុញកិច្ចសហប្រតិបត្តិការរវាងបណ្ដាមូលដ្ឋានវៀតណាម និងខេត្ត Gunma (ជប៉ុន)
កប.អនឡាញ - នារសៀលថ្ងៃទី ១៤ ខែតុលា នៅទីស្នាក់ការរដ្ឋាភិបាល លោក Pham Minh Chinh នាយករដ្ឋមន្ត្រីវៀតណាម បានទទួលជួបលោក Yamamoto Ichita អភិបាលខេត្ត Gunma (ជប៉ុន) និងគណៈប្រតិភូធុរកិច្ចគំរូចំនួន ២៥ របស់ខេត្តដែលកំពុងបំពេញទស្សនកិច្ចការងារនៅវៀតណាម ក្នុងបំណងបន្តអនុវត្តយោបល់របស់លោក Pham Minh Chinh នាយករដ្ឋមន្ត្រីវៀតណាម ក្នុងដំណើរទស្សនកិច្ចនៅខេត្ត Gunma នាខែធ្នូ ឆ្នាំ២០២៣ ស្តីពីការបង្កើនទំនាក់ទំនងរវាងខេត្ត Gunma និងវៀតណាម។
លោកនាយករដ្ឋមន្ត្រីជឿជាក់ថា ដំណើរទស្សនកិច្ចនេះនឹងរួមចំណែកជម្រុញទំនាក់ទំនងសហប្រតិបត្តិការរវាងខេត្ត Gunma និងវៀតណាមនាពេលខាងមុខ និងអនុវត្តក្របខណ្ឌនៃទំនាក់ទំនងភាពជាដៃគូយុទ្ធសាស្ត្រលើគ្រប់ជ្រុងជ្រោយវៀតណាម-ជប៉ុន ដែលបង្កើតឡើងនៅចុងឆ្នាំ២០២៣។
|
|
លោក Pham Minh Chinh និងលោក Yamamoto Ichita (រូបថត៖ vnanet.vn) |
លោកនាយករដ្ឋមន្ត្រីបានវាយតម្លៃខ្ពស់ចំពោះការប្តេជ្ញាចិត្តរបស់អភិបាលខេត្ត ក៏ដូចជាអាជ្ញាធរខេត្ត Gunma ក្នុងការជំរុញទំនាក់ទំនងជាមួយវៀតណាមនាពេលកន្លងមក។ នាពេលខាងមុខ លោកនាយករដ្ឋមន្ត្រីបានស្នើឲ្យអាជ្ញាធរខេត្ត Gunma និងលោក Yamamoto Ichita បន្តជំរុញកិច្ចសហប្រតិបត្តិការជាមួយបណ្ដាមូលដ្ឋានរបស់វៀតណាម រួមទាំងខេត្ត Ha Nam តាមរយៈគម្រោងសហប្រតិបត្តិការជាក់លាក់។ លោក Pham Minh Chinh បានអះអាងថា វៀតណាមនឹងបង្កើតគ្រប់លក្ខខណ្ឌអំណោយផលសម្រាប់ធុរកិច្ចខេត្ត Gunma ក្នុងការវិនិយោគ និងធ្វើអាជីវកម្មប្រកបដោយជោគជ័យនៅវៀតណាម។ លោកស្នើឲ្យខេត្ត Gunma លើកទឹកចិត្តធុរកិច្ចខេត្តមកបណ្តាក់ទុនកាន់តែច្រើននៅវៀតណាមលើវិស័យដែលខេត្តមានប្រៀបខ្លាំង ពង្រឹងកិច្ចសហប្រតិបត្តិការក្នុងការបណ្តុះបណ្តាលធនធានមនុស្សប្រកបដោយគុណភាពខ្ពស់ កិច្ចសហប្រតិបត្តិការក្នុងការអភិវឌ្ឍវប្បធម៌ និងឧស្សាហកម្មវប្បធម៌ ជំរុញការផ្លាស់ប្តូរវប្បធម៌ និងជំនួបប្រាស្រ័យរវាងប្រជាជននិងប្រជាជន តភ្ជាប់បណ្ដាសាកលវិទ្យាល័យ Gunma និងវៀតណាម។ល។
លោក Yamamoto Ichita សម្ដែងនូវបំណងចង់ជំរុញកិច្ចសហប្រតិបត្តិការជាមួយវៀតណាម ជាពិសេសលើវិស័យបណ្តុះបណ្តាលធនធានមនុស្សប្រកបដោយគុណភាពខ្ពស់។ លោកអភិបាលខេត្តបានប្រកាសថា ធុរកិច្ចជាច្រើននៃគណៈប្រតិភូ និងធុរកិច្ចជាច្រើនផ្សេងទៀតនៃខេត្ត Gunma ចង់វិនិយោគនៅវៀតណាម ជាពិសេសនៅទីក្រុងហូជីមិញ និងទីក្រុងហាណូយ។ លោកអភិបាលខេត្ត Gunma បានឲ្យដឹងថា លោកនឹងបន្តពិភាក្សាជាមួយដៃគូវៀតណាម ដើម្បីអនុវត្តខ្លឹមសារសហប្រតិបត្តិការប្រកបដោយប្រសិទ្ធភាពថែមទៀតនាពេលខាងមុខ៕
បកប្រែដោយ Thuy Anh