លោកប្រធានរដ្ឋ To Lam ទទួលជួបឯកអគ្គរដ្ឋទូតកាណាដា និងឯកអគ្គរដ្ឋទូតកូរ៉េខាងត្បូង

ក្នុងជំនួបជាមួយលោក Shawn Steil ឯកអគ្គរដ្ឋទូតកាណាដាប្រចាំវៀតណាម លោកប្រធានរដ្ឋ To Lam បានអះអាងថា វៀតណាមយកចិត្តទុកដាក់យ៉ាងខ្លាំងចំពោះទំនាក់ទំនងភាពជាដៃគូគ្រប់ជ្រុងជ្រោយជាមួយកាណាដា ហើយនឹងបន្តសម្របសម្រួលជាមួយកាណាដាដើម្បីអនុវត្តកិច្ចសន្យារបស់ថ្នាក់ដឹកនាំជាន់ខ្ពស់នៃប្រទេសទាំងពីរ សំដៅពង្រឹងទំនាក់ទំនងទ្វេភាគី វៀតណាម-កាណាដា ដោយឈរលើមូលដ្ឋាននៃផលប្រយោជន៍ទៅវិញទៅមក រួមចំណែករក្សាសន្តិភាព ស្ថិរភាព និងការអភិវឌ្ឍក្នុងតំបន់ និងលើពិភពលោក។ លោកប្រធានរដ្ឋ To Lam បានថ្លែងអំណរគុណចំពោះការចូលរួមរំលែកទុក្ខរបស់កាណាដា ចំពោះការទទួលមរណភាពរបស់លោក Nguyen Phu Trong អគ្គលេខាបក្សកុម្មុយនិស្តវៀតណាម។

លោកប្រធានរដ្ឋ To Lam ទទួលជួបលោក Shawn Steilឯកអគ្គរដ្ឋទូតកាណាដា (រូបថត៖ vnanet.vn)

លោកឯកអគ្គរដ្ឋទូត Shawn Steil បានអះអាងថា កាណាដាយកចិត្តទុកដាក់យ៉ាងខ្លាំងចំពោះទំនាក់ទំនងភាពជាដៃគូគ្រប់ជ្រុងជ្រោយជាមួយវៀតណាមក្នុងយុទ្ធសាស្ត្ររបស់កាណាដាសម្រាប់តំបន់ឥណ្ឌូប៉ាស៊ីហ្វិក ព្រមទាំងសន្យាគាំទ្រតួនាទីជាមជ្ឈភាពរបស់អាស៊ានក្នុងរចនាសម្ព័ន្ធតំបន់។ លោកក៏បានអះអាងថា នឹងបន្តសម្របសម្រួលជាមួយវៀតណាមក្នុងការដោះស្រាយបញ្ហាតំបន់ និងអន្តរជាតិដែលភាគីទាំងពីរមានការយកចិត្តទុកដាក់ដូចគ្នា។

លោកប្រធានរដ្ឋ To Lam ទទួលជួបលោក Choi Youngsam ឯកអគ្គរដ្ឋទូតកូរ៉េខាងត្បូង (រូបថត៖ vnanet.vn)

ក្នុងជំនួបជាមួយលោក Choi Youngsam ឯកអគ្គរដ្ឋទូតកូរ៉េខាងត្បូងប្រចាំវៀតណាម លោកប្រធានរដ្ឋ To Lam បានវាយតំលៃខ្ពស់ចំពោះកិច្ចខិតខំប្រឹងប្រែងរបស់លោកឯកអគ្គរដ្ឋទូត និងស្ថានទូតកូរ៉េខាងត្បូងក្នុងការសម្របសម្រួលជាមួយក្រសួង ស្ថាប័នពាក់ព័ន្ធនានារបស់វៀតណាម ក្នុងការជំរុញទំនាក់ទំនងរវាងប្រទេសទាំងពីរនាពេលកន្លងមក។ លោកប្រធានរដ្ឋ To Lam បានសង្កត់ធ្ងន់លើទិសដៅសំខាន់ៗមួយចំនួនដែលលោកឯកអគ្គរដ្ឋទូត Choi Young Sam ជំរុញការអនុវត្តក្នុងអំឡុងពេលអាណត្តិរបស់ខ្លួន រួមទាំងការរក្សាដំណើរទស្សនកិច្ច និងជំនួបថ្នាក់ជាន់ខ្ពស់ជាប្រចាំ; ឆាប់សម្រេចបានគោលដៅបង្កើនទំហំពាណិជ្ជកម្មឡើងដល់ ១០០ ពាន់លានដុល្លារអាមេរិក និងផ្តោតលើគោលដៅ ១៥០ ពាន់លានដុល្លារអាមេរិកត្រឹមឆ្នាំ ២០៣០; ជំរុញសហគ្រាសកូរ៉េខាងត្បូង បន្តពង្រីកទំហំវិនិយោគនៅវៀតណាម ដោយហេតុនោះបង្កើតរលកថ្មីនៃការវិនិយោគលើវិស័យដូចជា បច្ចេកវិទ្យាខ្ពស់ ការផលិត semiconductor បរិវត្តកម្មឌីជីថល បរិវត្តកម្មបៃតង និងថាមពលកកើតឡើងវិញ; ពង្រឹងកិច្ចសហប្រតិបត្តិការលើវិស័យអប់រំ វប្បធម៌ ទេសចរណ៍ កិច្ចសហប្រតិបត្តិការថ្នាក់មូលដ្ឋាន និងការជួបប្រាស្រ័យរវាងប្រជាជននិងប្រជាជនរបស់ប្រទេសទាំងពីរ; ព្រមទាំងពង្រីកកិច្ចសហប្រតិបត្តិការ និងការគាំទ្រគ្នាទៅវិញទៅមកក្នុងបញ្ហាអន្តរជាតិ និងតំបន់ដែលភាគីទាំងពីរមានការយកចិត្តទុកដាក់ដូចគ្នា៕

បកប្រែដោយ Thanh Cong