ថ្នាក់ដឹកនាំវៀតណាមទទួលជួបបណ្ដាគណៈប្រតិភូអន្តរជាតិដែលអញ្ជើញមកចូលរួមពិធីគោរពវិញ្ញាណក្ខន្ធលោកអគ្គលេខាបក្ស Nguyen Phu Trong
កប.អនឡាញ - នាថ្ងៃទី ២៥ ខែកក្កដា នៅវិមានប្រធានរដ្ឋ លោក To Lam ប្រធានរដ្ឋវៀតណាម បានទទួលជួបគណៈប្រតិភូជាន់ខ្ពស់បក្ស និងរដ្ឋឡាវ ដឹកនាំដោយលោក Thongloun Sisoulith អគ្គលេខាបក្ស និងជាប្រធានរដ្ឋឡាវដែលអញ្ជើញមកចូលរួមពិធីគោរពវិញ្ញាណក្ខន្ធលោកអគ្គលេខាបក្ស Nguyen Phu Trong។
លោក Thongloun Sisoulith អគ្គលេខាបក្សនិងជាប្រធានរដ្ឋឡាវ បានពាំនាំសាររំលែកទុក្ខយ៉ាងក្រៀមក្រំបំផុតរបស់បក្ស រដ្ឋ រដ្ឋសភា រដ្ឋាភិបាល និងរណសិរ្សមាតុភូមិឡាវកសាងប្រទេសជាតិជូនចំពោះបក្ស រដ្ឋ រដ្ឋសភា រដ្ឋាភិបាល និងរណសិរ្សមាតុភូមិវៀតណាមចំពោះមរណភាពលោក Nguyen Phu Trong អគ្គលេខាបក្សកុម្មុយនិស្ដវៀតណាម។
|
|
លោក To Lam ប្រធានរដ្ឋវៀតណាម ទទួលជួបគណៈប្រតិភូជាន់ខ្ពស់បក្ស និងរដ្ឋឡាវ ដឹកនាំដោយលោក Thongloun Sisoulith អគ្គលេខាបក្ស និងជាប្រធានរដ្ឋឡាវ |
លោកប្រធានរដ្ឋ To Lam បានថ្លែងអំណរគុណយ៉ាងជ្រាលជ្រៅចំពោះគណៈកម្មាធិការប្រតិបត្តិមជ្ឈិម រដ្ឋ រដ្ឋសភា រដ្ឋាភិបាល និងរណសិរ្សឡាវកសាងជាតិ ដែលបានផ្ញើសាររំលែកទុក្ខចំពោះមរណភាពរបស់លោកអគ្គលេខាបក្ស Nguyen Phu Trong និងកាន់ទុក្ខថ្នាក់ជាតិរយៈពេលពីរថ្ងៃ ជាពិសេសចាត់បញ្ជូនគណៈប្រតិភូជាន់ខ្ពស់ដឹកនាំដោយលោកអគ្គលេខាបក្ស និងប្រធានរដ្ឋឡាវមកចូលរួមពិធីនេះ ដោយបង្ហាញពីមនោសញ្ចេតនាជាសមមិត្ដ បងប្អូនយ៉ាងជ្រាលជ្រៅ ជិតស្និទ្ធ ស្មោះស្ម័គ្រ ប្រកៀកស្មាគ្នា ចែករំលែករវាងបក្សទាំងពីរ រដ្ឋទាំងពីរ និងប្រជាជននៃប្រទេសទាំងពីរ។
លោកប្រធានរដ្ឋ To Lam បានអះអាងថា មិនថាកាន់តំណែងអ្វីណាមួយ លោកអគ្គលេខាបក្ស Nguyen Phu Trong តែងតែឲ្យតម្លៃ និងយកចិត្ដទុកដាក់ ពិសេសជាមួយបដិវត្តន៍ឡាវ និងស្និទ្ធស្នាលជាមួយថ្នាក់ដឹកនាំឡាវ និងលោក Thongloun Sisoulith ផ្ទាល់តែងតែយកចិត្តទុកដាក់និងពូនជ្រំទំនាក់ទំនងចំណងសាមគ្គីភាពពិសេស និងកិច្ចសហប្រតិបត្តិការគ្រប់ជ្រុងជ្រោយរវាងវៀតណាម និងឡាវ។
* នារសៀលថ្ងៃទី២៥ ខែកក្កដា នៅវិមានប្រធានរដ្ឋ លោក To Lam ប្រធានរដ្ឋវៀតណាម តាងនាមថ្នាក់ដឹកនាំបក្ស និងរដ្ឋបានទទួលជួបលោក Wang Huning សមាជិកគណៈកម្មាធិការអចិន្ត្រៃយ៍នៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនីស្តចិន និងជាប្រធានសភាប្រឹក្សានយោបាយប្រជាជនទូទាំងប្រទេសចិន។ បេសកជនពិសេសរបស់លោក Xi Jinping អគ្គលេខាបក្ស និងជាប្រធានរដ្ឋចិន អញ្ជើញមកចូលរួមពិធីគោរពវិញ្ញាណក្ខន្ធលោកអគ្គលេខាបក្ស Nguyen Phu Trong។
|
|
លោក To Lam ប្រធានរដ្ឋវៀតណាមទទួលជួបលោក Wang Huning ប្រធានសភាប្រឹក្សានយោបាយប្រជាជនទូទាំងប្រទេសចិន |
នៅក្នុងជំនួបនេះ លោក Wang Huning បានពាំនាំសាររំលែកទុក្ខរបស់គណៈកម្មាធិការមជ្ឈិមបក្សកុម្មុយនិស្តចិន លោក Xi Jinping អគ្គលេខាបក្ស និងជាប្រធានរដ្ឋចិនជូនចំពោះបក្ស រដ្ឋ ប្រជាជនវៀតណាម និងក្រុមគ្រួសាររបស់លោកអគ្គលេខាបក្ស Nguyen Phu Trong។ មរណភាពរបស់លោកអគ្គលេខាបក្ស Nguyen Phu Trong មិនត្រឹមតែជាការបាត់បង់ដ៏ធំធេងសម្រាប់បក្ស រដ្ឋ និងប្រជាជនវៀតណាមប៉ុណ្ណោះទេ ថែមទាំងជាការបាត់បង់សម្រាប់បក្ស រដ្ឋ និងប្រជាជនចិន ក៏ដូចជាការបាត់បង់បុព្វហេតុសន្តិភាព និងវឌ្ឍនភាពរបស់មនុស្សជាតិ។
ភាគីទាំងពីរបានវាយតម្លៃខ្ពស់ចំពោះការរីកចម្រើនជាវិជ្ជមានក្នុងទំនាក់ទំនងរវាងបក្សទាំងពីរ និងប្រទេសទាំងពីរ ដោយផ្អែកលើការយល់ដឹងរួម និងកិច្ចព្រមព្រៀងសំខាន់ៗ រវាងថ្នាក់ដឹកនាំកំពូលនៃបក្សទាំងពីរ និងប្រទេសទាំងពីរ ជាពិសេសបន្ទាប់ពីដំណើរទស្សនកិច្ចទ្វេភាគីក្នុងឆ្នាំ ២០២២ និងឆ្នាំ ២០២៣ របស់លោកអគ្គលេខាបក្ស Nguyen Phu Trong និងលោក Xi Jinping អគ្គលេខាបក្ស និងជាប្រធានរដ្ឋ។ លោក Wang Huning បានអះអាងថា ចិនចាត់ទុកវៀតណាមជាជម្រើសអាទិភាព និងជាជម្រើសយុទ្ធសាស្ត្រក្នុងគោលនយោបាយការបរទេសអ្នកជិតខាង។ លោក To Lam បានសង្កត់ធ្ងន់ថា វៀតណាមឲ្យតម្លៃ និងផ្តល់អាទិភាពកំពូលដល់ទំនាក់ទំនងជាមួយចិនក្នុងគោលនយោបាយការបរទេស ឯករាជ្យ ខ្លួនទីពឹងខ្លួន ពហុភាគីភាវូបនីយកម្ម និងពិពិធកម្ម។ ភាគីទាំងពីរបានឯកភាពនឹងបន្តអនុវត្តប្រកបដោយប្រសិទ្ធភាពនូវទស្សនៈរួមរវាងអគ្គលេខាបក្ស Nguyen Phu Trong និងលោក Xi Jinping អគ្គលេខាបក្ស និងប្រធានរដ្ឋ ជានិច្ចកាលធ្វើឲ្យប្រសើរនូវទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ កសាងសហគមន៍ចែករំលែកអនាគតវៀតណាម និងចិនមានអត្ថន័យជាយុទ្ធសាស្ត្រដ៏ល្អ ស្ថិរភាព និងយូរអង្វែង ដើម្បីផលប្រយោជន៍ប្រជាជននៃប្រទេសទាំងពីរ រួមចំណែកដល់សន្តិភាព ស្ថិរភាព និងកិច្ចសហប្រតិបត្តិការលើពិភពលោក និងតំបន់។
* នាថ្ងៃទី ២៥ ខែកក្កដា នៅវិមានប្រធានរដ្ឋ លោកប្រធានរដ្ឋ To Lam បានទទួលជួបលោក Han Duck Soo នាយករដ្ឋមន្ត្រីកូរ៉េខាងត្បូង ក្នុងឱកាសដឹកនាំគណៈប្រតិភូជាន់ខ្ពស់រដ្ឋាភិបាលកូរ៉េខាងត្បូងអញ្ជើញមកចូលរួមពិធីគោរពវិញ្ញាណក្ខន្ធលោកអគ្គលេខាបក្ស Nguyen Phu Trong។
* នាថ្ងៃទី ២៥ ខែកក្កដា នៅវិមានប្រធានរដ្ឋ លោក To Lam ប្រធានរដ្ឋវៀតណាម បានទទួលជួបលោក Suga Yoshihide បេសកជនពិសេសរបស់លោកនាយករដ្ឋមន្ត្រីជប៉ុន និងអតីតនាយករដ្ឋមន្ត្រីជប៉ុន ក្នុងឱកាសអញ្ជើញមកចូលរួមពិធីគោរពវិញ្ញាណក្ខន្ធលោកអគ្គលេខាបក្ស Nguyen Phu Trong៕
* នាព្រឹកថ្ងៃដដែល លោកប្រធានរដ្ឋ To Lam ទទួលជួបលោក Ajit Doval ទីប្រឹក្សាសន្តិសុខជាតិឥណ្ឌាក្នុងឱកាសអញ្ជើញមកចូលរួមពិធីគោរពវិញ្ញាណក្ខន្ធលោកអគ្គលេខាបក្ស Nguyen Phu Trong។
* នារសៀលថ្ងៃទី២៥ ខែកក្កដា នៅវិមានរដ្ឋសភា លោក Tran Thanh Man ប្រធានរដ្ឋសភាវៀតណាម បានទទួលជួបលោក Tolstoy Petr Olegovich អនុប្រធាន Duma ជាតិ រដ្ឋសភានៃសហព័ន្ធរុស្ស៊ី ដែលអញ្ជើញមកវៀតណាមចូលរួមពិធីគោរពវិញ្ញាណក្ខន្ធលោកអគ្គលេខាបក្ស Nguyen Phu Trong៕
បកប្រែដោយ Pham Diep