ការប្តេជ្ញាចិត្តខាងនយោបាយ ផ្ដល់ផលប្រយោជន៍ទៅវិញទៅមក ភាពស្រដៀងគ្នានៃវប្បធម៌ និងការផ្សារភ្ជាប់សង្គមគឺជាមូលដ្ឋានគ្រឹះនៃទំនាក់ទំនងវៀតណាម-កូរ៉េខាងត្បូង
នារសៀលថ្ងៃទី៣ ខែកក្កដា លោកនាយករដ្ឋមន្ត្រី Pham Minh Chinh បានថ្លែងសុន្ទរកថាអំពីគោលនយោបាយរបស់វៀតណាមនៅសកលវិទ្យាល័យជាតិ Seoul ព្រមទាំងអះអាងថា វៀតណាមត្រៀមខ្លួនសហប្រតិបត្តិការយ៉ាងជិតស្និទ្ធជាមួយកូរ៉េខាងត្បូង ជំរុញទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយឲ្យទទួលផ្លែផ្កា ដើម្បីសុភមង្គលរបស់ប្រជាជននៃប្រទេសទាំងពីរ និងដើម្បីសន្តិភាព កិច្ចសហប្រតិបត្តិការ និងការអភិវឌ្ឍក្នុងតំបន់ និងជុំវិញពិភពលោក។
អស់រយៈពេលជិត ៤០ ឆ្នាំមកនេះ វៀតណាមបានអនុវត្តការផ្លាស់ថ្មីយ៉ាងខ្លាំងក្លា។ ពីប្រទេសមួយដែលស្ថិតនៅក្រោមការហ៊ុមព័ទ្ធ និងការដាក់ទណ្ឌកម្ម ឥឡូវនេះវៀតណាមមានទំនាក់ទំនងការទូតជាមួយប្រទេសចំនួន ១៩៣ ដែលក្នុងនោះ ជាង ៣០ ប្រទេសជាដៃគូគ្រប់ជ្រុងជ្រោយ ដៃគូយុទ្ធសាស្ត្រ រួមទាំងកូរ៉េខាងត្បូងផងដែរ។ វៀតណាមក៏ជាសមាជិកសកម្មនៃអង្គការតំបន់ និងអន្តរជាតិជិត ៧០។
|
|
លោក Pham Minh Chinh នាយករដ្ឋមន្ត្រីវៀតណាម ថ្លែងសុន្ទរកថានៅសកលវិទ្យាល័យជាតិ Seoul (រូបថត៖ vnanet.vn) |
លោកនាយករដ្ឋមន្ត្រី Pham Minh Chinh ជឿជាក់ថា ទំនាក់ទំនងសហប្រតិបត្តិការមិត្តភាពរវាងវៀតណាម និងកូរ៉េខាងត្បូងនឹងកាន់តែអភិវឌ្ឍយ៉ាងខ្លាំងក្លា ប្រកបដោយប្រសិទ្ធភាព និងនិរន្តរភាពជាមួយនឹងអនាគតដ៏ភ្លឺស្វាងនាពេលខាងមុខ។ លោកនាយករដ្ឋមន្ត្រី Pham Minh Chinh សង្កត់ធ្ងន់ថា ជាមួយនឹងប្រវត្តិសាស្ដ្រទំនាក់ទំនងដ៏យូរលង់ដែលត្រូវបានពូនជ្រំ សក្ដានុពលសម្រាប់កិច្ចសហប្រតិបត្តិការរវាងប្រទេសទាំងពីរ និងស្មារតីប្តេជ្ញាចិត្ត ភាពច្នៃប្រឌិត និងការភ្ជាប់នៃសហគមន៍ធុរកិច្ចនិងប្រជាជន ជាពិសេសជំនាន់ក្រោយនៃប្រទេសទាំងពីរវៀតណាម និងកូរ៉េខាងត្បូងនឹងគាំទ្រគ្នាទៅវិញទៅមក ជំនះរាល់ការលំបាក និងបញ្ហាប្រឈម និងរីកចម្រើនជារួម។
* មុននោះ នាព្រឹកថ្ងៃទី៣ ខែកក្កដា នៅទីក្រុងសេអ៊ូល លោកនាយករដ្ឋមន្ត្រី Pham Minh Chinh បានមានជំនួបជាមួយ ថ្នាក់ដឹកនាំ សាជីវកម្មសេដ្ឋកិច្ចកូរ៉េខាងត្បូងជាច្រើនក្នុងវិស័យបច្ចេកវិទ្យា អេឡិចត្រូនិក សំណង់ ហេដ្ឋារចនាសម្ព័ន្ធ ការផលិតដែកថែប និងពាណិជ្ជកម្ម សេវាកម្ម ឱសថ ជីវវិទ្យា ... រួមមានសម្ព័នក្រុមហ៊ុន CJ, សម្ព័នក្រុមហ៊ុន POSCO, ធនាគារ KDB, សម្ព័នក្រុមហ៊ុន LG Display, សម្ព័នក្រុមហ៊ុន E&C, សម្ព័នក្រុមហ៊ុន GS Engineering & Construction, សម្ព័នក្រុមហ៊ុន Celltion ហើយសម្ព័នក្រុមហ៊ុនទាំងអស់នេះ មានបំណងចង់ពង្រីកការវិនិយោគនៅវៀតណាម។
* នាថ្ងៃដដែល លោកនាយករដ្ឋមន្ត្រី Pham Minh Chinh បានអញ្ជើញចូលរួមពិធីរំលឹកខួបលើកទី ៣០ នៃទិវាក្រុមហ៊ុន អាកាសចរណ៍ Vietnam Airlines បើកជើងហោះហើរត្រង់ និងស្វាគមន៍អ្នកដំណើរទី ១៥ លាននៃផ្លូវហោះហើរពីវៀតណាមទៅកូរ៉េខាងត្បូង។
* នាថ្ងៃទី ៣ ខែកក្កដានេះដែរ លោកនាយករដ្ឋមន្ត្រី Pham Minh Chinh បានទៅទស្សនាមជ្ឈមណ្ឌល Semiconductor របស់សម្ព័ន្ធក្រុមហ៊ុន Samsung នៅខេត្ត Gyeonggi ដែលជាកន្លែងផលិតបន្ទះឈីប semiconductor ធំបំផុតរបស់ Samsung នៅទូទាំងពិភពលោក ដើម្បីស្វែងយល់អំពីទម្រង់អភិវឌ្ឍន៍ឧស្សាហកម្ម semiconductor។
* នារសៀលថ្ងៃទី៣ ខែកក្កដា លោកនាយករដ្ឋមន្ត្រី Pham Minh Chinh និងលោកជំទាវបានអញ្ជើញទៅសួរសុខទុក្ខគ្រួសារពហុវប្បធម៌វៀតណាម-កូរ៉េខាងត្បូង នៅទីក្រុង Osan ខេត្ត Gyeonggi ប្រទេសកូរ៉េខាងត្បូង។
ដាក់ពង្រាយកម្មវិធីបច្ចេកវិទ្យាព័ត៌មាន ធានាសុវត្ថិភាពព័ត៌មានសម្រាប់ការធ្វើបរិវត្ដកម្មឌីជីថល
ក្នុងឱកាសដែលអមដំណើរលោកនាយករដ្ឋមន្ត្រី Pham Minh Chinh ទៅបំពេញទស្សនកិច្ចជាផ្លូវការនៅកូរ៉េខាងត្បូង នារសៀលថ្ងៃទី៣ ខែកក្កដា នៅទីក្រុង An Yang លោកឧត្តមសេនីយ៍ឯក Le Huy Vinh អនុរដ្ឋមន្ត្រីក្រសួងការពាររប្រទេសវៀតណាមបានជួបពិភាក្សាការងារជាមួយលោក Choi Dae Ho អភិបាលក្រុង An Yang។
នៅក្នុងជំនួបនេះ លោកឧត្តមសេនីយ៍ឯក Le Huy Vinh បានថ្លែងអំណរគុណចំពោះលោក Choi Dae Ho ដែលបានចំណាយពេលទទួលជួបគណៈប្រតិភូ និងរៀបចំឱ្យគណៈប្រតិភូមកទស្សនាមជ្ឈមណ្ឌលប្រតិបត្តិការទីក្រុងឆ្លាតវៃ An Yang។ លោកឧត្តមសេនីយ៍ឯក Le Huy Vinh បានឲ្យដឹងថា បច្ចុប្បន្ន ក្រសួងការពារប្រទេសវៀតណាមកំពុងផ្តោតលើការអនុវត្តការធ្វើបរិវត្តកម្មឌីជីថល និងកម្មវិធីរដ្ឋាភិបាលអេឡិចត្រូនិក ដើម្បីបង្កើនសមត្ថភាព និងប្រសិទ្ធភាពនៃការគ្រប់គ្រង និងការដឹកនាំ។ ដូច្នេះ ក្រសួងការពារប្រទេសវៀតណាមមានបំណងចង់រៀនសូត្រពីបទពិសោធន៍ និងប្រសិទ្ធភាពក្នុងការអនុវត្តកម្មវិធីបច្ចេកវិទ្យាព័ត៌មាន និងធានាសុវត្ថិភាពព័ត៌មានសម្រាប់ការធ្វើបរិវត្ដកម្មឌីជីថល។
រីឯខ្លួនវិញ លោក Choi Dae Ho អភិបាលក្រុង An Yang បានសម្តែងនូវសេចក្តីរីករាយដែលបានស្វាគមន៍គណៈប្រតិភូជាន់ខ្ពស់ក្រសួងការពារប្រទេសវៀតណាមមកបំពេញទស្សនកិច្ច។ លោក Choi Dae Ho បានឲ្យដឹងថា An Yang គឺជាទីក្រុងមួយនៅក្នុងខេត្ត Gyeonggi ដែលមានផ្ទៃដីជាង ៥៨ គីឡូម៉ែត្រ និងមានប្រជាជនប្រមាណ ៥៤៦,១៦១ នាក់ ជាមួយនឹងសហគ្រាសចំនួន ១,៧៦៤ ដែលវិនិយោគលើការផលិត និងការធ្វើអាជីវកម្ម ភាគច្រើននៅក្នុងបច្ចេកវិទ្យាខ្ពស់ និងអេឡិចត្រូនិច។ ទីក្រុងបានសាងសង់មជ្ឈមណ្ឌលប្រតិបត្តិការទីក្រុងឆ្លាតវៃ ដែលប្រើប្រាស់បច្ចេកវិទ្យាព័ត៌មានដើម្បីគ្រប់គ្រងទីក្រុង ដើម្បីបម្រើផលប្រយោជន៍របស់ប្រជាពលរដ្ឋ។
នៅមជ្ឈមណ្ឌលប្រតិបត្តិការទីក្រុងឆ្លាតវៃ គណៈប្រតិភូវៀតណាមបានស្តាប់តំណាងមជ្ឈមណ្ឌលណែនាំអំពីបច្ចេកវិទ្យា និងបច្ចេកទេសជឿនលឿន និងទំនើបដែលកំពុងអនុវត្តនៅក្នុងទីក្រុងឆ្លាតវៃ។
* នាយប់ថ្ងៃដដែល លោកនាយករដ្ឋមន្ត្រី Pham Minh Chinh និងលោកជំទាវ រួមទាំងគណៈប្រតិភូជាន់ខ្ពស់វៀតណាម បានត្រឡប់មកមាតុប្រទេសវិញ ដោយបញ្ចប់ដោយជោគជ័យនូវដំណើរទស្សនកិច្ចផ្លូវការនៅកូរ៉េខាងត្បូង ចាប់ពីថ្ងៃទី ៣០ ខែមិថុនា ដល់ថ្ងៃទី ៣ ខែកក្កដា៕
បកប្រែដោយ Pham Diep