លើកកំពស់ភារកិច្ច ធានាឲ្យពិធីរំលឹកខួបលើកទី ៧០ នៃជ័យជំនះ Dien Bien Phu ប្រកបដោយជោគជ័យ
កប.អនឡាញ - បន្តកម្មវិធីការងារនៅខេត្ត Dien Bien នាព្រឹកថ្ងៃទី ២៨ មីនា លោកស្រី Truong Thi Mai សមាជិកាការិយាល័យនយោបាយ លេខាប្រចាំការគណៈលេខាមជ្ឈិមបក្ស ប្រធានគណៈចាត់តាំងមជ្ឈិមបក្សកុម្មុយនិស្តវៀតណាម និងជាប្រធានគណៈកម្មាធិការដឹកនាំមជ្ឈិមស្ដីពីពិធីបុណ្យធំៗ និងព្រឹត្ដិការណ៍ប្រវត្ដិសាស្ដ្រសំខាន់ៗ របស់ប្រទេសក្នុងរយៈពេល ៣ ឆ្នាំ (២០២៣-២០២៥) បានជួបធ្វើការជាមួយគណៈអចិន្ត្រៃយ៍នៃគណៈកម្មាធិការបក្សខេត្ត Dien Bien។
នៅក្នុងជំនួបនេះ ប្រតិភូទាំងឡាយបានពិភាក្សាក្នុងការអនុវត្តសកម្មភាពរំលឹកខួបលើកទី ៧០ នៃជ័យជំនះ Dien Bien Phu។ ក្នុងនោះ លោកឧត្តមសេនីយ៍ឯក Vo Minh Luong អនុរដ្ឋមន្ដ្រីក្រសួងការពារប្រទេស បានអះអាងថា ក្រសួងការពារប្រទេសនឹងបន្តសហការយ៉ាងជិតស្និទ្ធជាមួយក្រសួងនគរបាល ក្រសួងវប្បធម៌ កីឡា និងទេសចរណ៍ និងខេត្ត Dien Bien រៀបចំផែនការនិងរៀបចំពិធីអបអរសាទរខួបលើកទី ៧០ នៃជ័យជំនះ Dien Bien Phu; ធ្វើជាអធិបតីក្នុងការរៀបចំក្បួនព្យុហយាត្រាយោធា; សម្របសម្រួលជាមួយក្រសួងនគរបាល និងខេត្ត Dien Bien ដើម្បីធានាសន្តិសុខ សណ្តាប់ធ្នាប់...
|
|
លោកស្រី Truong Thi Mai ថ្លែងក្នុងជំនួបធ្វើការ |
ដោយកត់សម្គាល់ចំពោះការខិតខំប្រឹងប្រែងដ៏ធំធេងរបស់ខេត្ត Dien Bien ក្នុងការត្រៀមរៀបចំលក្ខខណ្ឌចាំបាច់នានាដើម្បីបម្រើពិធីរំលឹកខួបអនុស្សារីយ៍ និងយល់ព្រមនឹងផែនការ និងកម្មវិធីនៃពិធីដែលនឹងប្រារព្ធឡើងនៅថ្ងៃទី ៧ ខែឧសភា ខាងមុខ លោកស្រី Truong Thi Mai បានស្នើឱ្យស្ថាប័នពាក់ព័ន្ធត្រូវបង្កើតសេណារីយ៉ូទូទៅរបស់ពិធីដោយលម្អិត និងជាក់លាក់។
ដោយសង្កត់ធ្ងន់លើអត្ថន័យពិសេសនៃពិធីរំលឹកខួបលើកទី ៧០ នៃជ័យជំនះ Dien Bien Phu និងសកម្មភាពទាំងឡាយគឺបន្តអះអាងនូវអត្ថន័យ និងតម្លៃដ៏ធំធេងនៃជ័យជំនះ Dien Bien Phu ក្នុងប្រវត្តិសាស្ត្រកសាង និងការពារប្រទេសជាតិ។ លោកស្រី Truong Thi Mai បានស្នើឲ្យស្ថាប័ន បុគ្គលម្នាក់ៗគួរតែយកចិត្ដទុកដាក់ ខិតខំអស់ពីកម្លាំងកាយចិត្ត លើកកម្ពស់ភារកិច្ច និងសមត្ថភាពខ្ពស់បំផុតដើម្បីអនុវត្តការងារដែលបានប្រគល់ឱ្យ ដោយធានាថា ពិធីរំលឹកខួបលើកទី ៧០ នៃជ័យជំនះ Dien Bien Phu ប្រកបដោយជោគជ័យ។
* នារសៀលថ្ងៃទី ២៨ មីនា លោកស្រី Truong Thi Mai និងក្រុមការងារបានចូលរួមកិច្ចប្រជុំបូកសរុបការអនុវត្តគម្រោងចលនា និងជួយឧបត្ថម្ភកសាងផ្ទះមហាសាមគ្គីជូនគ្រួសារក្រីក្រនៅខេត្ត Dien Bien (គម្រោងទី ០៩) ដែលរៀចំដោយគណៈអចិន្ត្រៃយ៍នៃគណៈកម្មាធិការមជ្ឈិមរណសិរ្សមាតុភូមិវៀតណាមសហការជាមួយគណៈកម្មាធិការបក្សខេត្ត Dien Bien ។
* នាព្រឹកថ្ងៃដដែល លោកស្រី Truong Thi Mai និងក្រុមការងារបានអញ្ជើញទៅអុជធូប និងដាក់ផ្កាគោរពវិញ្ញាណក្ខន្ធយុទ្ធជនពលីនៅប្រាសាទយុទ្ធជនពលីនៅសមរភូមិ Dien Bien Phu និងទីបញ្ចុះសពយុទ្ធជនពលីជាតិ A1 ព្រមទាំងសួរសុខទុក្ខ និងជូនអំណោយដល់យុទ្ធជន Dien Bien៕
បកប្រែដោយ Pham Diep