ជំរុញទំនាក់ទំនងសេដ្ឋកិច្ចឲ្យស័ក្តិសមនឹងទំនាក់ទំនងនយោបាយល្អរវាងវៀតណាម និងគុយបា

នៅក្នុងជំនួបនេះ លោក Tran Hong Ha ឧបនាយករដ្ឋមន្ត្រី បានអបអរសាទរចំពោះជោគជ័យនៃកិច្ចប្រជុំកំពូលក្រុម G77 និងចិន ព្រមទាំងលោកឲ្យដឹងថា ប្រធានបទនៃវិទ្យាសាស្ត្រ បច្ចេកវិទ្យា និងនវានុវត្តន៍ គឺជាគន្លឹះមួយដើម្បីដោះស្រាយរាល់បញ្ហានៅក្នុងពិភពលោកនាពេលបច្ចុប្បន្ន។

លោក Tran Hong Ha បានអះអាងថា បក្ស រដ្ឋ រដ្ឋាភិបាល រដ្ឋសភា និងប្រជាជនវៀតណាម តែងតែឲ្យតម្លៃ ថែរក្សា និងប្តេជ្ញាចិត្ដបន្តធ្វើឲ្យស៊ីជម្រៅថែមទៀតនូវទំនាក់ទំនងប្រពៃណី សាមគ្គីភាព និងកិច្ចសហប្រតិបត្តិការគ្រប់ជ្រុងជ្រោយជាមួយ​វៀត​ណាម​-គុយបា គាំទ្របុព្វហេតុបដិវត្តន៍ដ៏ត្រឹមត្រូវរបស់ប្រជាជនគុយបា ហើយនឹងបន្តខិតខំប្រឹងប្រែងជាមួយគុយបាជំនះការលំបាកនាពេលបច្ចុប្បន្ន។

លោក Tran Hong Ha ឧបនាយករដ្ឋមន្ត្រីវៀតណាម និងលោក Manuel Marrero Cruz នាយករដ្ឋមន្ត្រីគុយបា (រូបថត៖ VGP)

លោក Tran Hong Ha បានមានប្រសាសន៍ថា នាពេលខាងមុខ ភាគីទាំងពីរគួរតែបន្តសហការយ៉ាងជិតស្និទ្ធ ដើម្បីបង្កើតលក្ខខណ្ឌអំណោយផលសម្រាប់ធុរកិច្ចនៃប្រទេសទាំងពីរ ពង្រឹងទំនាក់ទំនងពាណិជ្ជកម្ម និងវិនិយោគ ដើម្បីជំរុញទំនាក់ទំនងសេដ្ឋកិច្ចឲ្យស័ក្តិសមនឹងទំនាក់ទំនងនយោបាយល្អរវាងប្រទេសទាំងពីរ ស្របតាមស្មារតីណែនាំនិងគោលបំណងរបស់ថ្នាក់ដឹកនាំជាន់​ខ្ពស់នៃប្រទេសទាំងពីរ។

លោក Manuel Marrero Cruz បានថ្លែងអំណរគុណចំពោះបក្ស និងរដ្ឋវៀតណាមដែលបានបញ្ជូនគណៈប្រតិភូទៅចូលរួមកិច្ចប្រជុំកំពូលក្រុម G 77 និងចិន ហើយវាយតម្លៃខ្ពស់ចំពោះសុន្ទរកថារបស់គណៈប្រតិភូវៀតណាម។ លោក Manuel Marrero Cruz ឲ្យដឹងថា គុយបាមានមិត្តជាច្រើននៅលើពិភពលោក ប៉ុន្តែតែងតែចាត់ទុកវៀតណាមជាបងប្អូនបង្កើត និងថ្លែងអំណរគុណចំពោះជំនួយរបស់វៀតណាម ជាពិសេសការផ្គត់ផ្គង់អង្ករដល់គុយបា តាមរយៈជំនួយ និងកិច្ចសន្យាពាណិជ្ជកម្ម ជាពិសេសក្នុងបរិបទដែលគុយបាកំពុងប្រឈមមុខនឹងការលំបាកជាច្រើន ដោយសារវិធានការបង្កើនការហ៊ុមព័ទ្ធរបស់អាមេរិកនាពេលកន្លងមក។ លោកបានវាយតម្លៃថា ទំនាក់ទំនងគុយបា-វៀតណាមកំពុងអភិវឌ្ឍយ៉ាងល្អប្រសើរ។ ព្រមទាំងឯកភាពបញ្ជាឲ្យក្រសួង ស្ថាប័នសហការយ៉ាងជិតស្និទ្ធជាមួយវៀតណាម ដើម្បីជំរុញទំនាក់ទំនងវិនិយោគ និងពាណិជ្ជកម្មរវាងប្រទេសទាំងពីរ ជាពិសេសលើវិស័យជាច្រើនដូចជា កសិកម្ម ឱសថ ជីវបច្ចេកវិទ្យា និងការកសាងហេដ្ឋារចនាសម្ព័ន្ធ៕

បកប្រែដោយ Pham Diep