លើកកំពស់ទំនាក់ទំនងភាពជាដៃគូយុទ្ធសាស្ត្រវៀតណាម - អូស្ត្រាលីឡើងកំពស់ថ្មី

នេះជាដំណើរទស្សនកិច្ចជាផ្លូវការលើកដំបូងរបស់លោកនាយករដ្ឋមន្ត្រី Anthony Albanese នៅប្រទេសវៀតណាម ក្រោយពីចូលកាន់តំណែង។ ប្រព្រឹត្តទៅក្នុងបរិបទដែលវៀតណាម និងអូស្ត្រាលីប្រារព្ធខួប ៥០ ឆ្នាំ នៃទំនាក់ទំនងការទូត (១៩៧៣-២០២៣) និង ៥ ឆ្នាំ នៃទំនាក់ទំនងភាពជាដៃគូយុទ្ធសាស្ត្រ (២០១៨-២០២៣) ដំណើរទស្សនកិច្ចនេះត្រូវបានគេរំពឹងថានឹងរួមចំណែកពង្រឹងជំនឿទុកចិត្តខាងនយោបាយ ធ្វើឲ្យស៊ីជម្រៅទំនាក់ទំនងសហប្រតិបត្តិការលើគ្រប់វិស័យរវាងវៀតណាម និងអូស្ត្រាលី។

ក្រឡេកមើលថយក្រោយ ក្នុងឆ្នាំ ១៩៧៣ អូស្ត្រាលីគឺជាប្រទេសមួយក្នុងចំណោមប្រទេសដំបូងគេដែលបង្កើតទំនាក់ទំនងការទូតជាមួយវៀតណាមបន្ទាប់ពីកិច្ចព្រមព្រៀងទីក្រុងប៉ារីសត្រូវបានចុះហត្ថលេខា។ ក្នុងរយៈពេលកន្លះសតវត្សន៍នេះ ទំនាក់ទំនងវៀតណាម-អូស្ត្រាលីបានអភិវឌ្ឍប្រកបដោយប្រសិទ្ធភាព សម្រេចបានសមិទ្ធផលគួរឲ្យចាប់អារម្មណ៍ជាច្រើន  ឆ្ពោះទៅរកគោលដៅលើកកំពស់ទំនាក់ទំនងភាពទៅជាដៃគូយុទ្ធសាស្ត្រគ្រប់ជ្រុងជ្រោយ។

លោក Pham Minh Chinh នាយករដ្ឋមន្ត្រីវៀតណាម  និង លោក Anthony Albanese នាយករដ្ឋមន្ត្រីអូស្ត្រាលី  ក្នុងជំនួបកាលពីថ្ងៃទី ១២ ខែវិច្ឆិកា ឆ្នាំ ២០២២ នៅរាជធានីភ្នំពេញ ប្រទេសកម្ពុជា រូបថត៖ vnanet.vn

ប៉ុន្មានឆ្នាំមកនេះ ថ្នាក់ដឹកនាំជាន់ខ្ពស់ នៃប្រទេសទាំងពីរបានទៅទស្សនកិច្ច និងជួបពិភាក្សាគ្នាជាប្រចាំនៅតាមវេទិកាអន្តរជាតិ និងតំបន់។ នាពេលថ្មីៗនេះ លោក Vo Van Thuong ប្រធានរដ្ឋវៀតណាម បានជួបជាមួយអគ្គទេសាភិបាល និងនាយករដ្ឋមន្ត្រី នៃប្រទេសអូស្ត្រាលី ក្នុងព្រះរាជពិធីឡើងគ្រងរាជ្យរបស់ព្រះមហាក្សត្រអង់គ្លេស។ លោក Pham Minh Chinh នាយករដ្ឋមន្ត្រីវៀតណាម និងលោក Anthony Albanese នាយករដ្ឋមន្ត្រីអូស្ត្រាលី ក៏បានជួបក្រៅកិច្ចប្រជុំកំពូលអាស៊ានលើកទី ៤១ (នៅកម្ពុជា ខែវិច្ឆិកា ឆ្នាំ ២០២២) និងក្នុងកិច្ចប្រជុំកំពូល G7 បូក (នៅប្រទេសជប៉ុន ខែឧសភា ឆ្នាំ ២០២៣)។ តាមរយៈដំណើរទស្សនកិច្ច និងការជួបពិភាក្សាគ្នារបស់ថ្នាក់ដឹកនាំជាន់ខ្ពស់នោះ ការជឿទុកចិត្តខាងនយោបាយរវាងប្រទេសទាំងពីរត្រូវបានពង្រឹង ដែល​បង្កើតកម្លាំងចលករសម្រាប់កិច្ចសហប្រតិបត្តិការលើវិស័យផ្សេងៗឱ្យអភិវឌ្ឍយ៉ាងខ្លាំងក្លា ជាពិសេសកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ។ ក្នុងឆ្នាំ ២០២២ ទំហំពាណិជ្ជកម្មទ្វេភាគីសម្រេចបានជិត ១៥.៧ ពាន់លានដុល្លារអាមេរិក កើនឡើង ២៦.៧% បើធៀបនឹងឆ្នាំ ២០២១ ដែលធ្វើឱ្យអូស្ត្រាលីក្លាយជាដៃគូពាណិជ្ជកម្មធំទី ៧ របស់វៀតណាម និងវៀតណាមក្លាយជាដៃគូពាណិជ្ជកម្មធំជាងគេទី ១០ របស់អូស្ត្រាលី។ គិតត្រឹមចុងខែកុម្ភៈ ឆ្នាំ ២០២៣ អូស្ត្រាលីមានគម្រោងវិនិយោគចំនួន ៥៩០ នៅវៀតណាម ជាមួយនឹងដើមទុនសរុបប្រហែល ២ ពាន់លានដុល្លារអាមេរិក។ ទន្ទឹមនឹងនោះ វៀតណាមបានវិនិយោគនៅប្រទេសអូស្ត្រាលីក្នុងគម្រោងចំនួន ៨៨ ដែលមានទុនវិនិយោគសរុបចំនួន ៥៩២,៣ លានដុល្លារអាមេរិក។

គួរឲ្យ​កត់សម្គាល់ថា អូស្ត្រាលីគឺជាដៃគូទ្វេភាគីដែល​ផ្តល់ ODA ធំបំផុតមួយសម្រាប់វៀតណាម។ ទោះបីជារងឥទ្ធិពលយ៉ាងខ្លាំងពីជំងឺរាតត្បាត Covid-19 ក៏ដោយ ក៏អូស្ត្រាលីនៅតែរក្សា ODA សម្រាប់វៀតណាម ជាមធ្យម ៧៨.៩ លាន AUD ក្នុង​មួយ​ឆ្នាំ ក្នុងរយៈពេល ២០២០-២០២២។ ក្នុងរយៈពេល ៥០ ឆ្នាំកន្លងទៅ អូស្ត្រាលីបានផ្តល់ ODA សរុបចំនួន ៣ ពាន់លាន AUD  រួមចំណែកយ៉ាងមានប្រសិទ្ធភាពក្នុងការអភិវឌ្ឍសេដ្ឋកិច្ចសង្គមរបស់វៀតណាម។

ក្រឡេកមើលទំនាក់ទំនងរួមរវាងវៀតណាម និងអូស្ត្រាលី យើងនឹងឃើញថា កិច្ចសហប្រតិបត្តិការលើវិស័យការពារជាតិ និងសន្តិសុខគឺជាចំណុចភ្លឺមួយ​។ ភាគីទាំងពីររក្សាការផ្លាស់ប្តូរគណៈប្រតិភូជាប្រចាំ រួម​ទាំង​កិច្ចសហប្រតិបត្តិការលើវិស័យទប់ស្កាត់ បង្ក្រាបឧក្រិដ្ឋកម្ម ការគ្រប់គ្រងការចេញចូលខុសច្បាប់ ការប្រឆាំងការធ្វើចំណាកស្រុកខុសច្បាប់ ការផ្លាស់ប្តូរព័ត៌មាន បទពិសោធន៍  និង​ការបណ្តុះបណ្តាលភាសាអង់គ្លេស ... ជាពិសេស វៀតណាម និងអូស្ត្រាលី មានសកម្មភាពសហប្រតិបត្តិការជាក់ស្តែងជាច្រើនក្នុងវិស័យរក្សាសន្តិភាពរបស់អង្គការសហប្រជាជាតិ។ ជាមួយនឹងបទពិសោធន៍ដ៏សំបូរបែបក្នុងការហ្វឹកហ្វឺន និងពង្រាយកងកម្លាំងដើម្បីចូលរួមក្នុងប្រតិបត្តិការរក្សាសន្តិភាពរបស់អង្គការសហប្រជាជាតិ អូស្ត្រាលីតែងតែយកចិត្តទុកដាក់ ជួយ​​គាំទ្រយ៉ាងសកម្ម និងប្រកបដោយប្រសិទ្ធភាព និងជួយឧបត្ថម្ភវៀតណាមក្នុងការចូលរួមក្នុងសកម្មភាពនេះ។ ភាគីទាំងពីរបានចុះហត្ថលេខាលើអនុស្សរណៈយោគយល់គ្នាស្តីពីកិច្ចសហប្រតិបត្តិការលើការហ្វឹកហ្វឺនរក្សាសន្តិភាព និងការដោះមីននៅឆ្នាំ ២០១៦។ កងទ័ពអាកាសភូមិន្ទអូស្ត្រាលី បានជួយគាំទ្រក្នុងការដឹកជញ្ជូនកងពេទ្យរបស់វៀតណាមទៅកាន់ស្ថានបេសកកម្មរក្សាសន្តិភាពអង្គការសហប្រជាជាតិនៅស៊ូដង់ខាងត្បូង។ បច្ចុប្បន្ន ភាគីទាំងពីរកំពុងពិភាក្សា និងត្រៀមរៀបចំចុះហត្ថលេខាលើកិច្ចព្រមព្រៀងភាពជាដៃគូរក្សាសន្តិភាព។

ដើម្បីបន្តជំរុញសន្ទុះនៃការអភិវឌ្ឍន៍ទំនាក់ទំនងនាបច្ចុប្បន្ន ភាគីទាំងពីរចាប់អារម្មណ៍លើ​ការ​ពង្រីកវិស័យសហប្រតិបត្តិការថ្មីៗ ដូចជា ការឆ្លើយតបនឹងការប្រែប្រួលអាកាសធាតុ ការធ្វើបរិវត្តកម្មឌីជីថល និងការធ្វើបរិវត្តកម្មថាមពល។ លើសពីនេះ ការអប់រំ-បណ្តុះបណ្តាល កម្លាំងពលកម្ម កសិកម្ម ទេសចរណ៍ និងការផ្លាស់ប្តូរប្រជាជន... ក៏ជាវិស័យសហប្រតិបត្តិកាដែលនៅមានសក្តានុពលជាច្រើន​ផងដែរ។

មិនត្រឹមតែនៅកម្រិតទ្វេភាគីប៉ុណ្ណោះទេ ភាគីទាំងពីរនៅសហការយ៉ាងជិតស្និទ្ធ ប្រកបដោយប្រសិទ្ធភាព និងគាំទ្រគ្នាទៅវិញទៅមកនៅវេទិកាពហុភាគី ក៏ដូចជាក្នុងបញ្ហាអន្តរជាតិ និងតំបន់ ដែលមានការយកចិត្តទុកដាក់ដូចគ្នាទៀតផង។ ចំពោះអូស្ត្រាលី វៀតណាមគឺជាមិត្ត និងជាដៃគូដែលអាចទុកចិត្តបាន។ ការពង្រឹងតួនាទីរបស់វៀតណាមលើឆាកអន្តរជាតិ បានបង្កើតកម្លាំងចលករ​សម្រាប់ប្រទេសទាំងពីរសហការយ៉ាងជិតស្និទ្ធថែមទៀតក្នុងយន្តការសហប្រតិបត្តិការពហុភាគី។

ជាមួយនឹងទំនាក់ទំនងសហប្រតិបត្តិការយូរអង្វែង និងទូលំទូលាយលើគ្រប់វិស័យ ដំណើរទស្សនកិច្ចរបស់ លោក Anthony Albanese នាយករដ្ឋមន្ត្រីអូស្ត្រាលី ទៅកាន់វៀតណាម បាននាំមកនូវការរំពឹងទុកខ្ពស់អំពីការ​លើកកំពស់ទំនាក់ទំនងភាពជា​ដៃគូយុទ្ធសាស្ត្រវៀតណាម - អូស្ត្រាលី ឡើងកំពូលថ្មី។

ដំណើរទស្សនកិច្ចនេះធ្វើឡើងតែពីរខែបន្ទាប់ពីដំណើរទស្សនកិច្ចផ្លូវរដ្ឋរបស់អគ្គទេសាភិបាលអូស្ត្រាលី បាន​បង្ហាញពីការយកចិត្តទុកដាក់យ៉ាងខ្លាំងរបស់អូស្ត្រាលីក្នុងទំនាក់ទំនងជាមួយវៀតណាម។ ក្នុងបរិបទដែលប្រទេសទាំងពីរកំពុងមានឱកាសថ្មី​ក្នុង​​កិច្ចសហប្រតិបត្តិការ និងការ​លើកកំពស់ទំនាក់ទំនងទ្វេភាគីនោះ ដំណើរទស្សនកិច្ចនេះនឹងរួមចំណែកពង្រឹងការជឿទុកចិត្តខាងនយោបាយ និងបង្កើតកម្លាំងចលករថ្មីដើម្បីជួយទំនាក់ទំនងសហប្រតិបត្តិការវៀតណាម - អូស្ត្រាលី ឲ្យកាន់តែពង្រីកថែមទៀតលើគ្រប់វិស័យ៕

បកប្រែដោយ Duy Hoan