មាតុភូមិទទួលយុទ្ធជនពលីត្រឡប់មកវិញ

នៅព្រឹកថ្ងៃទី ២៨ ខែឧសភា ទោះបីមានភ្លៀងធ្លាក់ខ្លាំងក៏ដោយ ក៏ប្រជាពលរដ្ឋនៅខេត្តមណ្ឌលគិរីរាប់ពាន់នាក់នៅតែរង់ចាំក្រុមឡានដែលដឹកអដ្ឋិធាតុយុទ្ធជនពលីដើម្បីថ្លែងលា។ ក្នុងពិធីសូត្រមន្តបង្សុកូលវិញ្ញាណក្ខន្ធយុទ្ធជនពលីដែលរៀបចំឡើងដោយគណៈកម្មាធិការបក្ស និងអាជ្ញាធរមូលដ្ឋាន លោក វិន ស៊ីធួន អភិបាលរងខេត្ត ប្រធានក្រុមជំនាញខេត្តមណ្ឌលគិរី បានចែករំលែកថា តាងនាមអាជ្ញាធរនិងប្រជាជនខេត្តមណ្ឌលគិរី ខ្ញុំសូមថ្លែងអំណរគុណយ៉ាងជ្រាលជ្រៅចំពោះកម្មាភិបាល កងទ័ពប្រជាជនវៀតណាមដែលពលីជីវិតក្នុងបុព្វហេតុរំដោះជាតិ បង្រួបបង្រួមជាតិវៀតណាម និងជួយកម្ពុជាផ្តួលរលំរបបប្រល័យពូជសាសន៍ ប៉ុល ពត។ នាពេលខាងមុខ អាជ្ញាធរខេត្តមណ្ឌលគិរី និងខេត្ត Dak Lak នឹងបន្តសហការយ៉ាងជិតស្និទ្ធដើម្បីអនុវត្តប្រកបដោយប្រសិទ្ធភាពនូវការប្រមូលអដ្ឋិធាតុយុទ្ធជនពលី ព្រមទាំង បង្កើតលក្ខខណ្ឌអំណោយផលសម្រាប់ក្រុម K៥១ បំពេញភារកិច្ច។

ថ្នាក់ដឹកនាំ និងប្រជាជនខេត្ត Dak Lak រង់ចាំឡានដឹកអដ្ឋិធាតុយុទ្ធជនពលីត្រឡប់មកស្រុកកំណើតវិញ

នារសៀលថ្ងៃដដែល ពិធីគោរពវិញ្ញាណក្ខន្ធ និងពិធីបញ្ចុះសពយុទ្ធជនពលីត្រូវបានរៀបចំឡើងយ៉ាងឱឡារិកដោយថ្នាក់ដឹកនាំខេត្ត Dak Lak នៅទីបញ្ចុះសពយុទ្ធជនពលីខេត្ត ដោយមានការចូលរួមពីប្រជាពលរដ្ឋយ៉ាងច្រើនកុះករ។ ក្នុងពិធី លោក Truong Cong Thai អនុប្រធានគណៈកម្មាធិការប្រជាជនខេត្ត Dak Lak បានចែករំលែកថា ក្នុងរយៈពេលប៉ុន្មានឆ្នាំនៃការតស៊ូប្រយទ្ធប្រឆាំងចក្រពត្តិអាមេរិកដើម្បីសង្គ្រោះជាតិ និងបំពេញកាតព្វកិច្ចអន្តរជាតិ តបតាមការអំពាវនាវដ៏ពិសិដ្ឋរបស់មាតុភូមិ កុលបុត្រ​-​កុលធីតា​វៀតណាមរាប់លាននាក់ បានចូលរួមការតស៊ូដោយស្ម័គ្រចិត្ដ។ កងទ័ពស្ម័គ្រចិត្ត និងអ្នកជំនាញវៀតណាម បានពលីជីវិតដើម្បីឲ្យប្រទេសកម្ពុជាមានសន្តិភាព ដើម្បីចំណងមិត្តភាពរវាងប្រជាជាតិវៀតណាម និងកម្ពុជាស្ថិតស្ថេរជាអមតៈ។ បក្ស រដ្ឋ និងប្រជាជនវៀតណាមមានមោទនភាព និងដឹងគុណចំពោះគំរូនៃភាពក្លាហាន ការលះបង់ដ៏ថ្លៃថ្លារបស់ជំនាន់មុន ដែលលះបង់ដើម្បីឯករាជ្យជាតិ នាំមកនូវសេរីភាព និងលទ្ធិប្រជាធិបតេយ្យជូនប្រជាពលរដ្ឋ និងបំពេញបេសកកម្មអន្តរជាតិដ៏ឧត្តុងឧត្តម។

ពិធីបញ្ចុះសពយុទ្ធជនពលីត្រូវបានប្រារព្ធឡើងយ៉ាងឱឡារិក

ក្រោយសង្គ្រាម ប្រទេសកម្ពុជា បានផ្លាស់ប្តូរជាបន្តិចម្តងៗ។ នាពេលនេះ យុទ្ធមិត្តដែលបានតស៊ូជាមួយគ្នា និងបញ្ចុះសពកងទ័ពស្ម័គ្រចិត្ត និងអ្នកជំនាញវៀតណាមដែលបានពលីជីវិតក្នុងសមរភូមិ មានវ័យចាស់ ខ្សោយ និងបាត់បង់ការចងចាំ ហើយមនុស្សជាច្រើនបានស្លាប់ ដែលធ្វើឲ្យដំណឹងអំពីផ្នូររបស់យុទ្ធជនពលីកាន់តែតិចទៅៗ។ ទោះយ៉ាងណាក៏ដោយ ដោយស្មារតីទទួលខុសត្រូវ និងមនោសញ្ចេតនាចំពោះយុទ្ធជនពលី ក្នុងរដូវប្រាំង ២០២៤-២០២៥ កម្មាភិបាល និងយុទ្ធជននៃក្រុម K៥១ បានជំនះការលំបាក ផ្ទៀងផ្ទាត់ប្រភពព័ត៌មានជិត ៣៥០ ហើយស្វែងរក ពិនិត្យទីតាំងចំនួន ១០៧ កន្លែង និងប្រមូលអដ្ឋិធាតុយុទ្ធជន ២៣ អដ្ឋិធាតុដែលបានពលីជីវិតនៅកម្ពុជាក្នុងសម័យសង្រ្គាម។ យោងតាមស្ថិតិរបស់គណៈកម្មាធិការដឹកនាំលេខ៥១៥ ខេត្ត Dak Lak ចាប់ពីឆ្នាំ២០២០ ដល់បច្ចុប្បន្ន ក្រុម K៥១ បានប្រមូលអដ្ឋិធាតុកងទ័ពស្ម័គ្រចិត្តនិងអ្នកជំនាញវៀតណាមដែលបានពលីជីវិតក្នុងសម័យសង្គ្រាមចំនួន ៧៦៩ អដ្ឋិធាតុនៅខេត្តមណ្ឌលគិរី ហើយបញ្ចុះសពនៅទីបញ្ចុះសពរបស់យុទ្ធជនពលីខេត្ត Dak Lak រួមទាំងអដ្ឋិធាតុយុទ្ធជនពលីរាប់រយអដ្ឋិធាតុត្រូវបានកំណត់អត្តសញ្ញាណ៕

បកប្រែដោយ Thuy Anh