ថែទាំ និងអប់រំសិស្សជនជាតិ Mang
កប.អនឡាញ - ក្រុមជនជាតិ Mang រស់នៅច្រើននៅស្រុក Nam Nhun ខេត្ត Lai Chau នៅតាមភូមិចំនួន ១៥ នៃឃុំ Hua Bun, ឃុំ Nam Ban, ឃុំ Trung Chai, ឃុំ Nam Pi និងឃុំ Nam Hang ដែលមានគ្រួសារចំនួន ៨៧២ គ្រួសារ ជាមួយមនុស្សចំនួន ៤៣៦០ នាក់។
នេះជាជនជាតិភាគតិចមួយក្នុងចំណោមជនជាតិភាគតិចទាំង ៤ នៅក្នុងតំបន់មានការលំបាកខ្លាំងដែលត្រូវបានរដ្ឋអនុវត្តគម្រោងដាច់ដោយឡែកដើម្បីជួយគាំទ្រដល់ការអភិវឌ្ឍសេដ្ឋកិច្ច - សង្គម។ តំបន់ដែលជនជាតិ Mang រស់នៅច្រើនក្នុងតំបន់ដាច់ស្រយាល ពិបាកក្នុងការធ្វើដំណើរ ហើយវាលស្រែ និងចំការមិនមានច្រើនទេ។ ស្ថានភាពសេដ្ឋកិច្ចសង្គមដែលមិនទាន់មានការអភិវឌ្ឍ អត្រានៃគ្រួសារក្រីក្រមានច្រើនជាង ៦៤%។ ដូច្នេះសិស្សភាគច្រើនត្រូវសិក្សារៀនសូត្រក្នុងស្ថានភាពលំបាក និងខ្វះខាតគ្រប់សព្វបែបយ៉ាង។ ក្រៅពីនេះ ទោះបីសិស្សភាគច្រើនត្រូវបានស្នាក់នៅក្នុងសាលាក៏ដោយ ក៏ជំនាញបំណិនជីវិត និងចំណេះដឹងសង្គមរបស់ពួកគេនៅមានកម្រិតនៅឡើយ។
|
|
សិស្សជនជាតិ Mang ធ្វើលំហាត់នៅក្នុងម៉ោងសិក្សាមួយ |
ដើម្បីលើកកម្ពស់គុណភាពអប់រំរបស់សិស្សជនជាតិ Mang នៅតំបន់នោះ ស្រុក Nam Nhun បានផ្តោតលើការអនុវត្តគម្រោង “លើកកម្ពស់គុណភាពអប់រំសម្រាប់សិស្សអនុវិទ្យាល័យជាជនជាតិ Mang នៅស្រុក ដំណាក់កាល ២០១៩-២០២៥” ជាមួយនឹងគោលដៅបណ្តុះបណ្តាលសិស្សអនុវិទ្យាល័យចំនួន១០០ នាក់ដែលធានាបាននូវគុណភាព។ ដោយធ្វើបានល្អនូវការឃោសនា ផ្សព្វផ្សាយអំពីខ្លឹមសារនៃគម្រោងនេះ បានជាការអនុវត្ត និងការនាំសិស្សជនជាតិ Mang មកកណ្តាលស្រុកដើម្បីសិក្សារៀនសូត្រមានភាពងាយស្រួលជាច្រើន។ លោកស្រី Nguyen Thi Thuy Duong នាយិការអនុវិទ្យាល័យ Nam Nhun ឲ្យដឹងថា “ដើម្បីធានាបាននូវគុណភាពអប់រំ នៅដើមឆ្នាំសិក្សា សាលាបានរៀបចំការវាយតំលៃលើគុណភាពរបស់សិស្សដើម្បីបង្កើតផែនការរៀនសូត្រឲ្យបានសមស្រប ដោយហេតុនេះនាំឲ្យសិស្សមានការជឿរទុកចិត្តលើខ្លួនឯង និងមានភាពក្លាហានក្នុងសកម្មភាពសមូហភាព និងការជួបប្រាស្រ័យប្រចាំថ្ងៃ។
តាមការវាយតំលៃរបស់អនុវិទ្យាល័យ Nam Nhun អត្រានៃការទៅរៀនជាទៀងទាត់របស់សិស្សជនជាតិ Mang មានកំរិតខ្ពស់។ ក្នុងចំណោមសិស្សជនជាតិ Mang សរុបចំនួន ៥០ នាក់ដែលកំពុងសិក្សានៅសាលា មានសិស្សចំនួន ៤៨ នាក់ដែលមានអាកប្បកិរិយាល្អបង្គួរ គ្មានសិស្សណាដែលមានអាកប្បកិរិយាទន់ខ្សោយឡើយ។ បើនិយាយពីលទ្ធផលនៃការសិក្សាមានសិស្សល្អ ១ នាក់ សិស្សល្អបង្គួរ ២០ នាក់ និងសិស្សមធ្យម ២៨ នាក់ ... មានសិស្ស ៣ នាក់ជាសិស្សពូកែថ្នាក់ស្រុក និងសិស្សចំនួន ៤ ឈ្នះរង្វាន់នៅការប្រកួតកីឡាថ្នាក់ស្រុក។ ទោះបីនៅដំណាក់កាលដំបូងនៃការអនុវត្តគម្រោងនេះនៅមានកម្រិតជាច្រើនក៏ដោយ ប៉ុន្តែរហូតមកទល់បច្ចុប្បន្ននេះ គម្រោងនេះបាននាំមកនូវប្រសិទ្ធភាព ដែលរួមចំណែកដល់ការបង្កើតធនធានមនុស្ស និងធនធានកម្មាភិបាលជាជនជាតិ Mang សម្រាប់មូលដ្ឋាន៕
បកប្រែដោយ Duy Hoan