អាស៊ានត្រូវធ្វើការទម្លាយភាពទាល់ច្រកក្នុងវិស័យសេវាកម្ម ដើម្បីបង្កើតអនាគតពាណិជ្ជកម្មសកល

មានប្រសាសន៍នៅក្នុងពិធីបើក AIFTIS ឆ្នាំ២០២៥ លោក Liew Chin Tong អនុរដ្ឋមន្ត្រី បានសង្កត់ធ្ងន់ថា អាស៊ានមិនគួរបន្តចាត់ទុកសេវាកម្ម និងផលិតកម្មជាវិស័យពីរដាច់ដោយឡែកពីគ្នាទេ ដោយសារបញ្ហាទំនើបនៃការផលិតកាន់តែពឹងផ្អែកទៅលើសេវាកម្មពាក់ព័ន្ធ។

លោកបានមានប្រសាសន៍ថា ពាណិជ្ជកម្មសេវាកម្មរបស់អាស៊ានបានកើនឡើង ១២.២% ដែលសម្រេចបាន ១,២៩០ ពាន់លានដុល្លារអាមេរិក ក្នុងឆ្នាំ២០២៤ ដោយសារការងើបឡើងវិញនៃវិស័យទេសចរណ៍ និងសកម្មភាពអាជីវកម្មឌីជីថលដ៏រឹងមាំ។ ទោះជាយ៉ាងណាក៏ដោយ ប្រទេសជាសមាជិកជាច្រើន រួមទាំងប្រទេសម៉ាឡេស៊ី នៅតែប្រឈមមុខនឹងគម្លាតរចនាសម្ព័ន្ធនៅក្នុងពាណិជ្ជកម្មសេវាកម្ម ដែលត្រូវដោះស្រាយតាមរយៈការសម្របសម្រួលគោលនយោបាយកាន់តែជិតស្និទ្ធ និងការអភិវឌ្ឍប្រព័ន្ធអេកូឡូស៊ី។

លោក Liew Chin Tong អនុរដ្ឋមន្ត្រីក្រសួងវិនិយោគ ពាណិជ្ជកម្ម និងឧស្សាហកម្មម៉ាឡេស៊ី មានប្រសាសន៍នៅក្នុងពិធីបើក AIFTIS ២០២៥ (រូបថត៖ vnanet.vn)

ដើម្បីកសាងវិស័យសេវាកម្មអាស៊ានដ៏រឹងមាំមួយ ទាំងសម្រាប់សេដ្ឋកិច្ចក្នុងតំបន់ និងទីផ្សារក្នុងប្រទេសម៉ាឡេស៊ី លោក Liew Chin Tong អនុរដ្ឋមន្ត្រីបានគូសបញ្ជាក់ពីអាទិភាពយុទ្ធសាស្ត្រចំនួនប្រាំ។ ទីមួយ ការរួមបញ្ចូលផលិតកម្ម និងសេវាកម្ម ដែលរីកចម្រើនជាមួយគ្នា ពង្រឹងគ្នាទៅវិញទៅមក បង្កើតឱកាសបង្កើនតម្លៃបន្ថែមសម្រាប់ទាំងពីរ។ ទីពីរ កសាងជើងឯកសេវាកម្មក្នុងតំបន់បន្ថែមទៀត ដូចជា Grab ដែលមានឥទ្ធិពលក្នុងស្រុក។ ទីបី ពង្រឹងឧស្សាហកម្មវប្បធម៌ ពូនជ្រំអត្តសញ្ញាណរួមរបស់អាស៊ាន។ ទីបួន បង្កើតក្រុមអ្នកជំនាញជាតិសម្រាប់ការតាំងពិព័រណ៍សកលសំខាន់ៗ។ ទីប្រាំ កែលម្អលក្ខខណ្ឌការងារ ជំនាញ និងប្រាក់ឈ្នួលក្នុងវិស័យសេវាកម្ម ខណៈពេលដែលធានាថាការងារទាំងនេះនៅតែអាចសម្រេចបាន និងមានអត្ថន័យ ទោះបីជាប្រឈមមុខនឹងការផ្លាស់ប្តូរបច្ចេកវិទ្យា និងបញ្ញាសិប្បនិម្មិតក៏ដោយ។

លោក Liew Chin Tong អនុរដ្ឋមន្ត្រីបានមានប្រសាសន៍ថា ជោគជ័យនៃ AIFTIS ២០២៥ នឹងពង្រឹងសមត្ថភាពរបស់អាស៊ានក្នុងការក្លាយជាមជ្ឈមណ្ឌលសកលសម្រាប់សេវាកម្មវិជ្ជាជីវៈដែលមានតម្លៃខ្ពស់ ដោយលើកកម្ពស់ភាពធន់ និងកំណើនសេដ្ឋកិច្ចប្រកបដោយចីរភាពសម្រាប់តំបន់។ លោកបានបញ្ជាក់ថា AIFTIS ២០២៥ គឺជាការបោះជំហានមួយនៅក្នុងមហិច្ឆតារបស់អាស៊ានក្នុងការបង្កើតអនាគតនៃពាណិជ្ជកម្មសេវាកម្មសកល៕

បកប្រែដោយ Huyen Trang