កម្ពុជាអបអរសាទរទិវា ASEM Day យ៉ាងឧឡារិក

ការប្រារព្ធទិវា ASEM Day ត្រូវបានធ្វើឡើងក្នុងបរិបទដែលកម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូល ASEM លើកទី ១៣ នៅរាជធានីភ្នំពេញចាប់ពីថ្ងៃទី ១៦ ដល់ថ្ងៃទី ១៧ ខែវិច្ឆិកា ខាងមុខនេះ។

លោក ប្រាក់ សុខុន ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេសកម្ពុជា (រូបថត៖ cambodiadaily.com)

ថ្លែងនៅក្នុងព្រឹត្ដិការណ៍ លោក ប្រាក់ សុខុន ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិកម្ពុជា បានឲ្យដឹងថា ការប្រារព្ធទិវា ASEM Day ថ្ងៃនេះគឺជាការបង្ហាញពីការត្រៀមខ្លួន និងការប្តេជ្ញាចិត្តខ្ពស់បំផុតរបស់កម្ពុជាក្នុងការធ្វើជាម្ចាស់ផ្ទះរៀបចំកិច្ចប្រជុំកំពូលអាស៉ី-អឺរ៉ុបលើកទី១៣។ លោក ប្រាក់ សុខុន  បន្ដថា ASEM ដើរតួនាទីយ៉ាងសំខាន់ក្នុងការជំរុញទំនាក់ទំនងភាពជាដៃគូនិងកិច្ចសហប្រតិបត្តិការអាស៊ី - អឺរ៉ុប និងកិច្ចសហប្រតិបត្ដិការដើម្បីសន្តិភាពវិបុលភាពសេដ្ឋកិច្ច និងវឌ្ឍនភាពសង្គម។

លោក ប្រាក់ សុខុន បានឲ្យដឹងថា កម្ពុជាបានដាក់ចេញនូវមូលបទ “ពង្រឹងពហុភាគីនិយមដើម្បីកំណើនរួមគ្នា” សម្រាប់កិច្ចប្រជុំខាងមុខនេះ។ មូលបទនេះផ្តោតសំខាន់លើការរួមបញ្ចូលគ្នានៃទស្សនៈសំខាន់ៗចំនួន ៤ គឺពហុភាគីនិយម កំណើនការអភិវឌ្ឍប្រកបដោយចីរភាព និងវិបុលភាព ដែលនឹងរួមចំណែកពង្រឹងភាពជាដៃគូអាស៊ី-អឺរ៉ុប ដើម្បីធានាថា ពហុភាគីនិយមនាំមកនូវកំណើនប្រកបដោយបរិយាប័ន្ន និងវិបុលភាព។

វេទិកាសហប្រតិបត្តិការអាស៊ី - អឺរ៉ុប (ASEM) ត្រូវបានបង្កើតឡើងកាលពីឆ្នាំ ១៩៩៦។ ASEM មានដៃគូចំនួន ៥៣ ក្នុងនោះមានប្រទេសចំនួន ២១ មកពីអាស៊ី និងប្រទេសចំនួន ៣០ មកពីអឺរ៉ុប ព្រមទាំងអគ្គលេខាធិការដ្ឋានអាស៊ាន និងគណ:កម្មការអឺរ៉ុប (EC)  ជារួមប្រទេសដៃគូ ASEM តំណាងឱ្យ ៦៥% នៃសេដ្ឋកិច្ចពិភពលោក ៦០% នៃប្រជាជនពិភពលោក ៥៥% នៃពាណិជ្ជកម្មពិភពលោកនិង ៧៥% នៃទេសចរណ៍ពិភពលោក៕

បកប្រែដោយ Pham Diep