គ្រួសារ ៤ ជំនាន់ស្រឡាញ់គងឃ្មោះ
កប.អនឡាញ - រៀងរាល់ចុងសប្តាហ៍ ផ្ទះវែងរបស់គ្រួសារ H'Dam Nie Kdam នៅសង្កាត់ Ea Tam ទីក្រុង Buon Ma Thuot ខេត្ត Dak Lak តំបន់ខ្ពង់រាបកណ្តាលវៀតណាមពោរពេញទៅដោយសំឡេងគងឃ្មោះ។
គ្រួសារ H'Dam ទាំងបួនជំនាន់ ថ្វីត្បិតតែម្នាក់ៗប្រកបមុខរបរ និងមុខជំនាញខុសគ្នា មនុស្សវ័យចំណាស់មានអាយុលើសពី ៧០ ឆ្នាំ សមាជិកក្មេងជាងគេទើបតែចូលរៀនថ្នាក់ទី ១ ក្នុងឆ្នាំនេះ... ប៉ុន្តែដោយក្តីស្រលាញ់ខ្លាំងចំពោះសំឡេងគងឃ្មោះ គ្រួសារ H'Dam បានបង្កើតក្រុមគងឃ្មោះគ្រួសារមួយ។ អ្នកជំនាន់មុនបង្រៀនអ្នកជំនាន់ក្រោយ ហើយអ្នកដែលចេះលេង ណែនាំឲ្យអ្នកថ្មី... គ្រប់គ្នារំភើបចិត្ដរាល់ពេលដែលសំឡេងគងឃ្មោះបន្លឺឡើង។
H'Dam បានចែករំលែកថា៖ “ខ្ញុំក៏ស្រលាញ់តន្ត្រីយុវវ័យ និងឧបករណ៍ភ្លេងផ្សេងៗទៀតដែរ ប៉ុន្តែនេះគឺជាអត្តសញ្ញាណរបស់ជនជាតិខ្ញុំ ដូច្នេះហើយខ្ញុំមិនត្រឹមតែរៀនពីរបៀបលេងប៉ុណ្ណោះទេ ថែមទាំងបង្រៀនដល់កូនៗ និងចៅៗរបស់ខ្ញុំនាពេលអនាគតទៀតផង។ ប្រជាជននៅតំបន់ខ្ពង់រាបកណ្តាល Tay Nguyen មានមោទនភាពយ៉ាងខ្លាំងចំពោះវប្បធម៌គងឃ្មោះ”។
|
|
សមាជិកគ្រួសារ H'Dam Nie Kdam លេងគងឃ្មោះជាមួយគ្នា |
ក្រុមគងឃ្មោះរបស់គ្រួសារ H'Dam ត្រូវបានបង្កើតឡើងក្នុងឆ្នាំ ២០១៨។ ដំបូងឡើយ ភាគច្រើនជាបុរសដែលលេងគងឃ្មោះ ហើយបន្ទាប់មក សមាជិកគ្រួសារបានបង្រៀនគ្នាទៅវិញទៅមកបន្តិចម្តងៗ។ ក្នុងអំឡុងពេលពិធីបុណ្យរបស់ភូមិ ក្រុមគងឃ្មោះរបស់គ្រួសារ H'Dam ត្រូវបានអញ្ជើញទៅចូលរួមការផ្លាស់ប្តូរ និងសម្តែង។ ទាំងនេះបានបន្តភ្នក់ភ្លើងនៃសេចក្តីស្រឡាញ់របស់សមាជិកគ្រួសារចំពោះវប្បធម៌ដ៏វិសេសវិសាលរបស់ជនជាតិពួកគេ។
លោកស្រី H'Junih Nie Kdam ម្តាយរបស់ H'Dam បានចែករំលែកថា៖ «ក្នុងជីវភាពរស់នៅដ៏ទាន់សម័យនាពេលបច្ចុប្បន្ននេះ ប្រុសស្រីស្មើគ្នា បើបុរសអាចលេងគងឃ្មោះបាន ស្ត្រីក៏អាចលេងបានដែរ ដូច្នេះគ្រប់គ្នាក្នុងគ្រួសារសិក្សា និងចែករំលែកជាមួយគ្នា ដើម្បីបង្កើនជំនាញរបស់ខ្លួន។ យើងខ្ញុំក៏អញ្ជើញសិប្បករនៅក្នុងភូមិមកណែនាំ ហើយនៅថ្ងៃចុងសប្តាហ៍អ្នករាល់គ្នានឹងប្រមូលផ្តុំគ្នាដើម្បីសិក្សា»។
ឪពុករបស់ H'Dam គឺជាសិប្បករគងឃ្មោះ ដែលជាជនជាតិ Gia Rai ហើយម្តាយរបស់គាត់គឺជនជាតិ E De។ តាំងពីកុមារភាព H'Dam និងបងប្អូនបង្កើតរបស់គាត់បានឮសំឡេងគងឃ្មោះ។ សមាជិកនៃគ្រួសារ H'Dam មានការយល់ដឹងយ៉ាងជ្រាលជ្រៅអំពីតម្លៃវប្បធម៌គងឃ្មោះដែលបន្សល់ទុកដោយបុព្វបុរសរបស់ពួកគេ។ ពួកគេមិនត្រឹមតែគាំទ្រគ្នាទៅវិញទៅមកក្នុងជីវភាពរស់នៅ និងការងារប៉ុណ្ណោះទេ ថែមទាំងបង្រៀនគ្នាទៅវិញទៅមកជាមួយសេចក្តីស្រឡាញ់ដ៏ពោពេញទៅដោយវប្បធម៌ប្រចាំតំបន់របស់ជនជាតិពួកគេទៀតផង។
ការបង្កើតក្រុមគងឃ្មោះគ្រួសារដូចជាគ្រួសារ H'Dam មានអត្ថន័យខ្លាំងណាស់។ វាជះឥទ្ធិពលដ៏អស្ចារ្យក្នុងការអភិរក្ស និងអភិវឌ្ឍវប្បធម៌គងឃ្មោះសម្រាប់មនុស្សជំនាន់បច្ចុប្បន្ន និងជំនាន់អនាគត៕
បកប្រែដោយ Huyen Trang