វៀតណាម និងសហរដ្ឋអាមេរិកចុះហត្ថលេខាលើឯកសារសហប្រតិបត្តិការអំពីថាមពល

នាថ្ងៃទី ៣ ខែកុម្ភៈ  នៅទីក្រុងវ៉ាស៊ីនតោនឌីស៊ី លោក Le Manh Hung រដ្ឋមន្ត្រីស្តីទីក្រសួងឧស្សាហកម្ម និងពាណិជ្ជកម្ម បានធ្វើជាសាក្សីក្នុងពិធីចុះហត្ថលេខាលើអនុស្សរណៈយោគយល់គ្នា (MOU) រវាងរោងចក្រចម្រាញ់ប្រេង Binh Son និងក្រុមហ៊ុន Petrochemical និងដៃគូថាមពលឈានមុខគេរបស់សហរដ្ឋអាមេរិក រួមមាន Chevron, Marquis Energy និង ADM Asia-Pacific Trading។

ពិធីចុះហត្ថលេខាលើអនុស្សរណៈយោគយល់គ្នា (MOU) រវាងរោងចក្រចម្រាញ់ប្រេង Binh Son និងក្រុមហ៊ុន Petrochemical និង Chevron

ឯកសារទាំងនេះផ្តោតលើកិច្ចសហប្រតិបត្តិការក្នុងការផ្គត់ផ្គង់ប្រេងឆៅដល់រោងចក្រចម្រាញ់ប្រេង Dung Quat; ការស្រាវជ្រាវលទ្ធភាពនៃការផ្គត់ផ្គង់ប្រេងឥន្ធនៈជីវសាស្ត្រអេតាណុលពីសហរដ្ឋអាមេរិក; ការផ្គត់ផ្គង់វត្ថុធាតុដើមពោតសម្រាប់ការផលិតអេតាណុលនៅវៀតណាម។ លោកស្រី Barbara Harrison អនុប្រធានផ្នែកផ្គត់ផ្គង់ និងជួញដូរប្រេងឆៅនៅក្រុមហ៊ុន Chevron បានថ្លែងថា “យើងទន្ទឹងរង់ចាំបន្តកិច្ចសហប្រតិបត្តិការរបស់យើងក្នុងការផ្គត់ផ្គង់ប្រេងឆៅដែលផលិតនៅសហរដ្ឋអាមេរិក ក៏ដូចជាប្រភពប្រេងផ្សេងទៀត ដើម្បីគាំទ្រដល់ការផលិតថាមពលដែលមានសុវត្ថិភាព និងអាចទុកចិត្តបានសម្រាប់ប្រជាជនវៀតណាម។ យើងមានគោលបំណងបង្កើនផលិតកម្ម និងសង្ឃឹមថានឹងឈានដល់ ៤-៥ លានបារ៉ែលនៅឆ្នាំក្រោយ”។

ពិធីចុះហត្ថលេខានេះបានធ្វើឡើងក្នុងអំឡុងពេលនៃការចរចាដែលកំពុងបន្តរវាងវៀតណាម និងសហរដ្ឋអាមេរិកលើកិច្ចព្រមព្រៀងពាណិជ្ជកម្មបដិការ ដោយសមភាព និងមានតុល្យភាព ដែលមានគោលបំណងសម្រេចក្របខ័ណ្ឌសហប្រតិបត្តិការសេដ្ឋកិច្ច និងពាណិជ្ជកម្មដែលមានស្ថិរភាព និងរយៈពេលវែង។ កិច្ចព្រមព្រៀងទាំងនេះមិនត្រឹមតែបើកឱកាសសម្រាប់កិច្ចសហប្រតិបត្តិការរយៈពេលវែង និងជាក់ស្តែងប៉ុណ្ណោះទេ ប៉ុន្តែថែមទាំងរួមចំណែកដល់ការធ្វើពិពិធកម្មប្រភពផ្គត់ផ្គង់ និងពង្រឹងការតភ្ជាប់ខ្សែសង្វាក់តម្លៃ ដោយហេតុនេះរួមចំណែកជាវិជ្ជមានដល់គោលដៅនៃការអភិវឌ្ឍទំនាក់ទំនងសេដ្ឋកិច្ច និងពាណិជ្ជកម្មទ្វេភាគីក្នុងទិសដៅមានតុល្យភាព ស្ថិរភាព និងប្រកបដោយចីរភាព។

បកប្រែដោយ Duy Hoan