ឥណ្ឌូនេស៊ីត្រៀមខ្លួនជាស្រេចសហការជាមួយវៀតណាមក្នុងវិស័យហាឡាល់

នៅក្នុងសិក្ខាសាលានេះ វាគ្មិនបានផ្តល់ទស្សនៈថ្មីៗ និងវិធីសាស្រ្តទំនើបៗចំពោះផលិតផលហាឡាល់ ដោយរួមបញ្ចូលគ្នានូវតម្លៃសាសនា សីលធម៌ និងមនុស្សធម៌ជាមួយនឹងយុទ្ធសាស្ត្រម៉ាកយីហោ ដើម្បីតភ្ជាប់គោលបំណងធ្វើអាជីវកម្មជាមួយនឹងការជឿទុកចិត្តរបស់អ្នកប្រើប្រាស់។

នៅក្នុងព្រឹត្តិការណ៍នេះ លោក Ahmad Haikal Hasan ប្រធានអង្គការធានាផលិតផលហាឡាល់ឥណ្ឌូនេស៊ី (BPJPH) សង្កត់ធ្ងន់ថា នេះគឺជាទិសដៅយុទ្ធសាស្ត្រដ៏សំខាន់សម្រាប់ធុរកិច្ច មិនត្រឹមតែបំពេញតាមស្តង់ដារហាឡាល់ប៉ុណ្ណោះទេ ប៉ុន្តែថែមទាំងកសាងម៉ាកយីហោជាមួយនឹង "ភាពទាក់ទាញអារម្មណ៍" បង្កើតទំនុកចិត្ត និងសម្រេចបាននូវកំណើនប្រកបដោយចីរភាពនៅក្នុងទីផ្សារពិភពលោក ជាពិសេសនៅក្នុងបរិបទនៃការប្រកួតប្រជែងកាន់តែខ្លាំងឡើងក្នុងចំណោមសេដ្ឋកិច្ចអាស៊ាន និងអន្តរជាតិ។

ទិដ្ឋភាពនៃសិក្ខាសាលា (រូបថត៖ vnanet.vn)

នៅក្នុងបទសម្ភាសន៍ជាមួយអ្នកយកព័ត៌មានវៀតណាមនៅទីក្រុងហ្សាការតា លោក Haikal Hasan បានវាយតម្លៃប្រទេសវៀតណាមថាជា "អ្នកផ្គត់ផ្គង់ដ៏មានសក្តានុពល" នៃផលិតផលហាឡាល់ ដែលមានសមត្ថភាពចូលរួមកាន់តែស៊ីជម្រៅនៅក្នុងទីផ្សារនេះ។ លោកបានឲ្យដឹងទៀតថា លោកនឹងបំពេញទស្សនកិច្ចនៅប្រទេសវៀតណាមនៅសប្តាហ៍ក្រោយ ដើម្បីពិភាក្សាអំពីវឌ្ឍនភាពរបស់វៀតណាមនៅក្នុងវិស័យហាឡាល់សកល។

យោងតាមលោក Haikal Hasan ប្រទេសវៀតណាមកំពុងខិតខំជ្រៀតចូលក្នុងទីផ្សារហាឡាល់សកល ហើយប្រទេសឥណ្ឌូនេស៊ីត្រៀមខ្លួនជាស្រេចដើម្បីគាំទ្រដំណើរការនេះ។ លោកបានស្នើឲ្យវៀតណាមពន្លឿននីតិវិធីបញ្ជាក់ហាឡាល់ទាំងអស់ ដើម្បីឲ្យផលិតផលរបស់វៀតណាមអាចចូលកាន់ទីផ្សារហាឡាល់នៅក្នុងប្រទេសឥណ្ឌូនេស៊ី ក៏ដូចជានៅលើពិភពលោក។

យោងតាមអ្នកជំនាញ ការជម្រុញការចុះហត្ថលេខាលើកិច្ចព្រមព្រៀងស្ដីពីការរៀបចំការទទួលស្គាល់ទៅវិញទៅមករបស់អាស៊ានសម្រាប់សេវាថែទាំ (MRA) រវាងឥណ្ឌូនេស៊ីនិងវៀតណាម នឹងបើកឱកាសសំខាន់ៗសម្រាប់កិច្ចសហប្រតិបត្តិការពាណិជ្ជកម្មទ្វេភាគី ជាពិសេសនៅក្នុងខ្សែសង្វាក់ផ្គត់ផ្គង់ហាឡាល់សកល៕

បកប្រែដោយ Thuy Anh