កិច្ចសហប្រតិបត្តិការពាណិជ្ជកម្មរុស្ស៊ី-វៀតណាម នៅតែមានសក្ដានុពលយ៉ាងធំធេង

លោក Ivan Nesterov ទីប្រឹក្សាស្ថានទូតសហព័ន្ធរុស្ស៊ីប្រចាំនៅវៀតណាម បានសំដែងនូវជំនឿលើឱកាសដ៏មានតម្លៃដែលបង្កើតដោយព្រឹត្តិការណ៍នេះ។ ព្រឹត្តិការណ៍នេះបានជួយពាណិជ្ជករនៃប្រទេសទាំងពីរបង្កើតទំនាក់ទំនងដោយផ្ទាល់ និងឆ្ពោះទៅរកកិច្ចព្រមព្រៀងសហប្រតិបត្តិការជាក់ស្តែង។ លោកបានសង្កត់ធ្ងន់ថា ថ្នាក់ដឹកនាំនៃប្រទេសទាំងពីរតែងតែយកចិត្តទុកដាក់ជាពិសេសចំពោះកិច្ចសហប្រតិបត្តិការទ្វេភាគីលើវិស័យសេដ្ឋកិច្ច និងពាណិជ្ជកម្ម។ យោងតាមស្ថិតិរបស់រុស្ស៊ី នៅឆ្នាំ២០២៤ ទំហំពាណិជ្ជកម្មទ្វេភាគីរវាងប្រទេសទាំងពីរកើនឡើង ២០% សម្រេចបាន ៦ ពាន់លានដុល្លារអាមេរិក។ គួរកត់សម្គាល់ថា ផលិតផលដែលផលិតដោយសហគ្រាសមូស្គូមានសមាមាត្រដ៏ធំក្នុងការនាំចេញរបស់រុស្ស៊ីទៅកាន់វៀតណាម។

ទិដ្ឋភាពនៃសន្និសីទតភ្ជាប់ពាណិជ្ជកម្មរុស្ស៊ី-វៀតណាម

លោកស្រី Ekaterina Zheleznyakova ប្រធានគណៈកម្មការទំនាក់ទំនងភាពជាដៃគូអន្តរជាតិនៃមជ្ឈមណ្ឌលនាំចេញម៉ូស្គូបានចែករំលែកថា មជ្ឈមណ្ឌលបានអនុវត្តគម្រោងជាច្រើនដើម្បីជំរុញកិច្ចសហប្រតិបត្តិការអាជីវកម្មនៅវៀតណាម។ គម្រោងទាំងនេះរួមមាន ការតាំងពិព័រណ៍អន្តរជាតិ ការជួយគាំទ្រឯកអគ្គរដ្ឋទូតម៉ាក កម្មវិធីបង្កើនល្បឿននៃការចាប់ផ្តើមអាជីវកម្ម ការជួយសហគ្រាសផ្សព្វផ្សាយផលិតផលនៅលើគេហទំព័រពាណិជ្ជកម្មតាមប្រព័ន្ធអេឡិចត្រូនិក។ល។

ប្រតិភូចូលរួមសន្និសីទ

មានប្រសាសន៍ក្នុងពិធីបើក លោក Tran Van Tam អគ្គលេខាធិការរងសមាគមមិត្តភាពវៀតណាម - រុស្ស៊ី បានណែនាំអំពីមជ្ឈមណ្ឌលសហប្រតិបត្តិការវៀតណាម - រុស្ស៊ី នៃសមាគមមិត្តភាពវៀតណាម - រុស្ស៊ី ដែលជាមជ្ឈមណ្ឌលមានភារកិច្ចសំខាន់ក្នុងការតភ្ជាប់ និងរៀបចំសកម្មភាពជំរុញទំនាក់ទំនងមិត្តភាព និងកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិទ្យាសាស្ត្រ - បច្ចេកវិទ្យា អប់រំ សុខាភិបាល វប្បធម៌ និងទេសចរណ៍នៃប្រទេសទាំងពីរ។

លោក Tran Van Tam រំពឹងថា នឹងបន្តតភ្ជាប់ និងជួយគាំទ្រការនាំចេញ នាំចូល នីតិវិធីច្បាប់ និងការអភិវឌ្ឍទីផ្សារនៃទំនិញ និងសេវាកម្ម ស្វែងរកនិងតភ្ជាប់ជាមួយសហគ្រាសល្បីឈ្មោះ និងមានសក្តានុពលរបស់វៀតណាម និងសហព័ន្ធរុស្ស៊ី ក្នុងបំណងបង្កើនការផ្លាស់ប្តូរពាណិជ្ជកម្ម និងការនាំចេញទំនិញទៅកាន់ទីផ្សារនៃប្រទេសទាំងពីរ។

តាមគម្រោង សកម្មភាពតភ្ជាប់ពាណិជ្ជកម្មរុស្ស៊ី-វៀតណាមនឹងប្រព្រឹត្តទៅដល់ថ្ងៃទី៣ ខែមេសា៕

បកប្រែដោយ Thanh Cong