កិច្ចព្រមព្រៀងពាណិជ្ជកម្មសេរី (FTA) មានផលប៉ះពាល់ជាវិជ្ជមានដល់សេដ្ឋកិច្ចវៀតណាម
កប.អនឡាញ - នៅថ្ងៃទី ១៩ ខែវិច្ឆិកា កិច្ចប្រជុំធុរកិច្ចកំពូលអាស៊ាន - សហភាពអឺរ៉ុប (EU) លើកទី ៨ ក្រោមប្រធានបទ “ ឆ្ពោះទៅរកអាស៊ានខ្លាំងក្លា ខ្លួនទីពឹងខ្លួន និងបរិយាប័ន្ន" បានប្រព្រឹត្ដទៅនៅប្រទេសសិង្ហបុរីតាមរយៈប្រព័ន្ធវីដេអូ ដោយមានការចូលរួមពីប្រតិភូជាង ២៥០ នាក់ រួមមានអ្នកបង្កើតគោលនយោបាយ និងថ្នាក់ដឹកនាំអាជីវកម្មមកពីអឺរ៉ុប និងអាស៊ីអាគ្នេយ៍។ រដ្ឋមន្រ្តីក្រសួងឧស្សាហកម្មនិងពាណិជ្ជកម្មវៀតណាមលោក Tran Tuan Anh បានចូលរួមនិងថ្លែងនៅកិច្ចប្រជុំនេះ។
|
|
រដ្ឋមន្រ្តីក្រសួងឧស្សាហកម្មនិងពាណិជ្ជកម្មវៀតណាមលោក Tran Tuan Anh ថ្លែងនៅកិច្ចប្រជុំ (រូបថត៖ vnanet.vn) |
លោក Tran Tuan Anh បានឲ្យដឹងថា សហភាពអឺរ៉ុបគឺជាដៃគូពាណិជ្ជកម្មធំទី២ របស់អាស៊ានក្នុងដំណាក់កាល ២០០៩-២០១៨ និងជាវិនិយោគិនធំជាងគេរបស់អាស៊ានដោយមានទុនវិនិយោគផ្ទាល់ចំនួន ១៩០ ពាន់លានដុល្លារអាមេរិក។
លោក Tran Tuan Anh បានមានប្រសាសន៍ថា “FTA រវាង EU និងប្រទេសអាស៊ានមួយចំនួនត្រូវបានចាត់ទុកថាជាការត្រៀមឆ្ពោះទៅរក FTA រវាង EU និងអាស៊ានទាំងមូល។ សិង្ហបូរី និងវៀតណាម បានផ្តល់សច្ចាប័នលើកិច្ចព្រមព្រៀងពាណិជ្ជកម្មសេរីរវាងវៀតណាម និងសហភាពអឺរ៉ុប (EVFTA) ។ កិច្ចព្រមព្រៀង EVFTA គឺជាកិច្ចព្រមព្រៀងពាណិជ្ជកម្មសេរីជំនាន់ថ្មីទូលំទូលាយ និងផ្ដល់ផលប្រយោជន៍ស្មើភាពគ្នារវាងវៀតណាម និងសហភាពអឺរ៉ុប។ ដោយមានការសន្យាបើកទីផ្សារ និងលុបបំបាត់ពន្ធនាំចូលរហូតដល់ជិត ១០០% នៃតារាងពន្ធរបស់ភាគីទាំងពីរនោះ EVFTA ត្រូវបានគេរំពឹងថានឹងបើកឱកាសសម្រាប់អាជីវកម្មមកពីវៀតណាមនិងសហភាពអឺរ៉ុប។
លោករដ្ឋមន្រ្តី Tran Tuan Anh បានឲ្យដឹងថា សហភាពអឺរ៉ុប និងអាស៊ានគួរតែបន្តជំរុញកិច្ចសហប្រតិបត្តិការសេដ្ឋកិច្ចនិងពាណិជ្ជកម្មទ្វេភាគីនិងក្នុងតំបន់បន្ថែមទៀត ដោយផ្តោតលើការតភ្ជាប់ខ្សែសង្វាក់ផ្គត់ផ្គង់និងរបាំងមិនមែនពន្ធគយ៕
បកប្រែដោយ Pham Diep