អង្គការសុខភាពពិភពលោកបើកវគ្គសិក្សាតាមអ៊ិនធឺណេតជាភាសាវៀតណាម លើប្រធានបទស្តីពីការព្យាបាល Covid-19
កប.អនឡាញ - ការិយាល័យតំណាងរបស់អង្គការសុខភាពពិភពលោក (WHO) ប្រចាំនៅប្រទេសវៀតណាមទើបបានប្រកាសផែនការបើកវគ្គសិក្សាតាមអ៊ិនធឺណេតចំនួន ២ ជាភាសាវៀតណាមក្រោមប្រធានបទស្តីពីការព្យាបាល Covid-19 ក្នុងគោលបំណងជួយសម្រួលដល់មិត្តអ្នកអានវៀតណាមឲ្យទទួលបានព័ត៌មានថ្មីៗ និងឯកសារវិទ្យាសាស្ត្រទាំងឡាយអំពីជំងឺនេះ។
កម្មវិធីសិក្សាទាំងពីរនេះគ្រោងនឹងចាប់ផ្តើមដាក់ឲ្យដំណើរការនៅចុងខែមីនា ឆ្នាំ២០២០ ហើយត្រូវបានផ្តល់ជូនដោយឥតគិតថ្លៃ ដែលអនុញ្ញាតឱ្យមនុស្សគ្រប់រូបដែលចាប់អារម្មណ៍ចំពោះការព្យាបាល Covid-19 អាចចូលទៅកាន់គេហទំព័រដោយភាពងាយស្រួល។ វគ្គសិក្សាដំបូងមានរយៈពេល ១០ ម៉ោង ផ្តោតលើការផ្តល់ចំណេះដឹងនានាដែលទាក់ទងនឹងការសម្រេចវិធានការព្យាបាលជាបឋមសម្រាប់អ្នកជំងឺដែលឆ្លងមេរោគផ្លូវដង្ហើមស្រួចស្រាវធ្ងន់ធ្ងរ (SARI) ដោយតែងតែកើតមានចំពោះអ្នកជំងឺដែលឆ្លងវីរុសផ្លូវដង្ហើមទើបលេចចេញថ្មីៗនេះដូចជា ជំងឺផ្តាសាយបក្សី (H5N1, H7N9), Covid-19។ វគ្គសិក្សាទី ២ មានរយៈពេល ៣ ម៉ោងនឹងផ្តល់ចំណេះដឹងអំពីវិធីសាស្រ្តរកឃើញ បង្ការ ទប់ស្កាត់ និងការគ្រប់គ្រងវីរុសផ្លូវដង្ហើមដែលកំពុងកើតមានឡើងនាពេលថ្មីៗនេះ រួមទាំងវីរុស SARS-CoV-2។
អ្នកដែលចាប់អារម្មណ៍នឹងវគ្គសិក្សាទាំងពីរនេះអាចចូលតាមរយៈគេហទំព័រ OpenWHO: https://openwho.org/channels/covid-19-national-languages៕
បកប្រែដោយ Duy Hoan