កាត់បន្ថយការបំភាយឧស្ម័ននៅកម្រិត "សូន្យ" គឺជាបេសកកម្មជាតិ

ថ្លែងក្នុងសម័យប្រជុំ លោកនាយករដ្ឋមន្ត្រី Pham Minh Chinh បានបញ្ជាក់ពីភាពត្រឹមត្រូវរបស់វៀតណាមក្នុងការសន្យានៅ COP26 ចំពោះការកាត់បន្ថយការបំភាយឧស្ម័ននៅកម្រិត "សូន្យ" នៅឆ្នាំ ២០៥០ ដោយបំពេញបេសកកម្មរួមជាមួយសកលដើម្បីប្រយុទ្ធប្រឆាំងនឹងការប្រែប្រួលអាកាសធាតុ។

លោកនាយករដ្ឋមន្ត្រី Pham Minh Chinh ថ្លែងក្នុងសម័យប្រជុំ (រូបថត៖ vnanet.vn)

លោកនាយករដ្ឋមន្ត្រី Pham Minh Chinh ក៏បានកត់សម្គាល់ និងវាយតម្លៃខ្ពស់ចំពោះស្មារតីដោយម្ចាស់ការ និងកិច្ចខិតខំប្រឹងប្រែងរបស់ក្រសួង ស្ថាប័ន មូលដ្ឋាន សហគមន៍ធុរកិច្ច និងប្រជាជនក្នុងការអនុវត្តការសន្យារបស់វៀតណាមនៅ COP26 ក្នុងរយៈពេលកន្លងមក។

លោកនាយករដ្ឋមន្ត្រី Pham Minh Chinh​ បានលើកច្បាស់ថា ការប្រយុទ្ធប្រឆាំងនឹងការប្រែប្រួលអាកាសធាតុត្រូវប្រកាន់យកប្រជាជន និងអង្គភាពអាជីវកម្មជាមជ្ឈភាព គោលដៅ កម្លាំងចលករ និងប្រភាពធនធាន។ លោកនាយករដ្ឋមន្ត្រីបានស្នើឲ្យមានការកសាងច្បាប់ដែលទាក់ទងទៅនឹងការប្រយុទ្ធប្រឆាំងនឹងការប្រែប្រួលអាកាសធាតុ ស្របតាមលក្ខខណ្ឌ និងកាលៈទេសៈរបស់ប្រទេសវៀតណាម និងស្របតាមបទប្បញ្ញត្តិ និងនិន្នាការរបស់ពិភពលោក។

ភាគីពាក់ព័ន្ធគួរតែផ្តោតលើការកសាងយន្តការ និងគោលនយោបាយដើម្បីកៀរគរហិរញ្ញវត្ថុ ព្រមទាំងរៀបចំបទប្បញ្ញត្តិដើម្បីទាក់ទាញបច្ចេកវិទ្យាទំនើបសម្រាប់ការអភិវឌ្ឍបៃតង។  បង្កើតគំរូអភិបាលកិច្ចជាតិសម្រាប់ការអភិវឌ្ឍបៃតង និងអភិវឌ្ឍន៍ឆ្លាតវៃ ​កសាងយន្តការ និងគោលនយោបាយអភិវឌ្ឍធនធានមនុស្សក្នុងការអភិវឌ្ឍបៃតង។

លោកនាយករដ្ឋមន្ត្រី Pham Minh Chinh អញ្ជើញជាអធិបតីក្នុងសម័យប្រជុំលើកទី ៦ នៃគណៈកម្មាធិការដឹកនាំជាតិស្ដីពីការអនុវត្ដការសន្យារបស់វៀតណាមនៅ COP26 (រូបថត៖ vnanet.vn)

លោកនាយករដ្ឋមន្ត្រី Pham Minh Chinh​​​​ បានសង្កត់ធ្ងន់ថា ការដែលវៀតណាមកាត់បន្ថយការបំភាយឧស្ម័ននៅកម្រិតសូន្យនៅឆ្នាំ ២០៥០ មិនគ្រាន់តែជាការសន្យានោះទេ ប៉ុន្តែថែមទាំងជាបេសកកម្មនយោបាយរបស់ប្រទេសជាតិ និងការទទួលខុសត្រូវនៃប្រព័ន្ធនយោបាយទាំងមូល សហគមន៍អាជីវកម្ម និងប្រជាពលរដ្ឋគ្រប់រូប ដូច្នេះ ក្រសួង ស្ថាប័ន មូលដ្ឋាន ប្រជាពលរដ្ឋ និងអាជីវកម្មនានាត្រូវតែផ្តោតលើការអនុវត្តបានល្អនូវភារកិច្ចនេះ៕

បកប្រែដោយ Pham Diep