ជប៉ុន និងប្រេស៊ីលជួយគាំទ្រវៀតណាមក្នុងការជម្នះផលវិបាកនៃព្យុះ និងទឹកជំនន់

ទឹកជំនន់នៅខេត្ត Khanh Hoa។ (រូបថត៖ VNA)

នៅថ្ងៃទី ១២ ខែធ្នូ ក្រសួងការបរទេសជប៉ុនបានប្រកាសថា រដ្ឋាភិបាលជប៉ុននឹងផ្តល់ជំនួយបន្ទាន់ចំនួន ១.៥ លានដុល្លារដើម្បីជួយវៀតណាមជំនះការខូចខាតធ្ងន់ធ្ងរដែលបណ្តាលមកពីព្យុះ និងទឹកជំនន់ថ្មីៗនេះនៅតំបន់ភាគកណ្តាល។

ថ្លែងនៅក្នុងសន្និសីទសារព័ត៌មាន លោក Motegi Toshimitsu រដ្ឋមន្ត្រីការបរទេសជប៉ុន បាននិយាយថា ជំនួយដែលបានរៀបរាប់ខាងលើនឹងត្រូវផ្ទេរទៅឱ្យវៀតណាមតាមរយៈអង្គការអន្តរជាតិឱ្យបានឆាប់តាមដែលអាចធ្វើទៅបាន។

ជាពិសេស ជប៉ុនបានផ្តល់ជំនួយគ្រឿងឧបភោគបរិភោគដែលមានតម្លៃ ១ លានដុល្លារអាមេរិកតាមរយៈអង្គការអន្តរជាតិសម្រាប់ការធ្វើចំណាកស្រុក (IOM) និងផ្តល់ទឹកស្អាត និងសេវាអនាម័យបរិស្ថានដែលមានតម្លៃ ៥០០,០០០ ដុល្លារអាមេរិកតាមរយៈមូលនិធិកុមារអង្គការសហប្រជាជាតិ (UNICEF)។

លោក Motegi បានបន្ថែមថា អាស៊ីអាគ្នេយ៍ថ្មីៗនេះបានរងការខូចខាតយ៉ាងធ្ងន់ធ្ងរពីព្យុះទីហ្វុង និងទឹកជំនន់។ ប្រទេសជប៉ុនបានផ្តល់ជំនួយសមស្របដោយផ្អែកលើតម្រូវការរបស់ប្រទេសនីមួយៗ។ នៅពេលអនាគត ប្រសិនបើស្ថានភាពស្រដៀងបែបនេះកើតឡើងម្តងទៀត ប្រទេសជប៉ុននឹងបន្តកិច្ចខិតខំប្រឹងប្រែងរបស់ខ្លួនក្នុងការផ្តល់ជំនួយតាមលទ្ធភាពដែលអាចធ្វើទៅបាន។

ទន្ទឹមនឹងនេះ នៅប្រទេសប្រេស៊ីល ក្នុងរយៈពេលប៉ុន្មានថ្ងៃថ្មីៗនេះ អង្គការ អង្គភាពអាជីវកម្ម និងមិត្តភក្តិជាច្រើន បានឆ្លើយតបទៅនឹងការអំពាវនាវពីសភាពាណិជ្ជកម្មប្រេស៊ីល-វៀតណាម ដើម្បីចូលរួមគាំទ្រវៀតណាមជំនះផលវិបាកនៃគ្រោះមហន្តរាយធម្មជាតិ។

ក្រុមហ៊ុន JBS Group ដែលជាក្រុមហ៊ុនកែច្នៃអាហារធំជាងគេមួយរបស់ប្រទេសប្រេស៊ីល ដែលមានដៃគូវៀតណាមជាច្រើន បានផ្តល់ថវិកាចំនួន ២០,០០០ ដុល្លារអាមេរិក និងភួយពូកចំនួន ១,០០០ ឈុត ជូនគ្រួសារដែលរងផលប៉ះពាល់ ដើម្បីផ្តល់ការជួយគាំទ្រទាន់ពេលវេលាដល់ជនរងគ្រោះដោយទឹកជំនន់។

លើសពីនេះ នៅខាងរដ្ឋាភិបាលប្រេស៊ីល ទីភ្នាក់ងារសហប្រតិបត្តិការប្រេស៊ីល (ABC) នៃក្រសួងការបរទេសប្រេស៊ីល បាននិយាយថា ក្នុងអំឡុងពេលជួបជាមួយគណៈប្រតិភូមកពីគណៈគោលនយោបាយយុទ្ធសាស្ត្រនៃមជ្ឈិមបក្សកុម្មុយនិស្តវៀតណាម ដឹកនាំដោយ លោក Nguyen Duc Hien អនុប្រធាន ក្នុងអំឡុងពេលបំពេញទស្សនកិច្ចការងារនៅប្រទេសប្រេស៊ីលកាលពីដើមខែធ្នូ ទីភ្នាក់ងារនេះកំពុងពិចារណាពីវិធានការជួយគាំទ្រសមស្របសម្រាប់ប្រជាជននៅភាគកណ្តាលប្រទេសវៀតណាម។

គណៈគោលនយោបាយយុទ្ធសាស្ត្រនៃមជ្ឈិមបក្សកុម្មុយនិស្តវៀតណាម ដឹកនាំដោយ លោក Nguyen Duc Hien អនុប្រធាន ជួបធ្វើការជាមួយទីភ្នាក់ងារសហប្រតិបត្តិការ (ABC) នៃក្រសួងការបរទេសប្រេស៊ីល (រូបថត៖ VNA)

ABC បានសង្កត់ធ្ងន់ថា ខ្លួននឹងពិចារណាលើលទ្ធភាពនៃការចែករំលែកបទពិសោធន៍ក្នុងការគ្រប់គ្រងគ្រោះមហន្តរាយ ការឆ្លើយតបនឹងទឹកជំនន់ និងការកសាងឡើងវិញក្រោយគ្រោះមហន្តរាយ ដែលជាវិស័យដែលប្រេស៊ីលបានប្រមូលមេរៀនជាក់ស្តែងជាច្រើនក្នុងប៉ុន្មានឆ្នាំថ្មីៗនេះ។

អង្គភាពអាជីវកម្មប្រេស៊ីលមួយចំនួនក្នុងវិស័យភស្តុភារ កសិកម្ម និងខ្សែសង្វាក់ផ្គត់ផ្គង់ក៏កំពុងពិចារណាយ៉ាងសកម្មក្នុងការគាំទ្រថ្លៃដឹកជញ្ជូន និងផ្តល់ទំនិញដែលបានផ្ញើទៅកាន់ប្រទេសវៀតណាម។

ស្ថានទូតវៀតណាមប្រចាំនៅប្រេស៊ីលបានបញ្ជាក់ថា ខ្លួននឹងបន្តសម្របសម្រួលយ៉ាងជិតស្និទ្ធជាមួយអាជ្ញាធរប្រេស៊ីល និងក្រសួងការបរទេសវៀតណាម ដើម្បីធានាថាការជួយគាំទ្រទាំងអស់ត្រូវបានផ្តល់ជូនដល់ប្រទេសវៀតណាមទាន់ពេលវេលា សុវត្ថិភាព និងមានប្រសិទ្ធភាព។

បន្ថែមពីលើការចូលរួមវិភាគទានទាំងនេះ ស្ថានទូតជាច្រើននៅក្នុងតំបន់ និងសមាគមមិត្តភាពប្រេស៊ីល-វៀតណាម ក៏បានផ្ញើលិខិត និងទូរលេខចូលរួមរំលែកទុក្ខចំពោះការបាត់បង់ជីវិត និងទ្រព្យសម្បត្តិនៅក្នុងគ្រោះទឹកជំនន់ថ្មីៗនេះនៅប្រទេសវៀតណាមផងដែរ៕

បកប្រែដោយ​ Duy Hoan