កិច្ចសហការរក្សាសន្តិសុខ សណ្តាប់ធ្នាប់នៅតាមតំបន់ព្រំដែនខេត្ត Dak Nong

ក្នុងស្មារតីមិត្តភាព ភាគីទាំងពីរបានពិភាក្សា និងឯកភាពបន្តអនុវត្តឲ្យបានត្រឹមត្រូវនូវកំណត់ហេតុនៃកិច្ចសន្ទនា អនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការរវាងគណៈប្រតិភូបញ្ជាការដ្ឋានកងទ័ពការពារព្រំដែនវៀតណាម និងគណៈប្រតិភូបញ្ជាការដ្ឋានកងរាជអាវុធហត្ថ អគ្គបញ្ជាការដ្ឋាននៃកងយោធពលខេមរភូមិន្ទ។ 

លោកវរសេនីយ៍ឯក Vu Xuan Dai មេបញ្ជាការកងទ័ពការពារព្រំដែនខេត្ត Dak Nong និងលោកឧត្តមសេនីយ៍ត្រី ហែម បូណារ៉ែល មេបញ្ជាការកងរាជអាវុធហត្ថខេត្តមណ្ឌលគិរី ចុះហត្ថលេខាលើកំណត់ហេតុនៃកិច្ចសន្ទនា (រូបថត៖ bienphong.com.vn)

ភាគីទាំងពីរបង្កើនការផ្លាស់ប្តូរព័ត៌មាន និងការសហការរក្សាសន្តិសុខនយោបាយ សណ្តាប់ធ្នាប់ និងសុវត្ថិភាពសង្គម ស៊ើបអង្កេត និងទប់ស្កាត់ឧក្រិដ្ឋកម្មឆ្លងដែននៅតំបន់ព្រំដែនគោក និងច្រកទ្វារព្រំដែន ការពារលទ្ធផលនៃការខ័ណ្ឌសីមា បោះបង្គោលព្រំដែន និងបង្កើតលក្ខខណ្ឌអំណោយផលសម្រាប់ការខ័ណ្ឌសីមា បោះបង្គោលព្រំដែន នៅពេលដែលមានផែនការអនុវត្ត។ ភាគីទាំងពីរក៏បានបង្កើតលក្ខខណ្ឌអំណោយផលសម្រាប់ភាគីនីមួយៗក្នុងការសាងសង់សំណង់នៅតំបន់ព្រំដែនស្របតាមបទប្បញ្ញត្តិ និងកិច្ចព្រមព្រៀងរបស់ថ្នាក់ដឹកនាំជាន់ខ្ពស់ និងក្រសួងការពារជាតិនៃប្រទេសទាំងពីរ។ ទន្ទឹមនឹងនោះ ជំរុញការឃោសនា និងអប់រំប្រជាពលរដ្ឋដែលរស់នៅតាមតំបន់ព្រំដែន ដើម្បីលើកកម្ពស់ការយល់ដឹងផ្នែកច្បាប់ អនុវត្តឲ្យបានត្រឹមត្រូវនូវកិច្ចព្រមព្រៀងស្តីពីបទប្បញ្ញត្តិតំបន់ព្រំដែន និងកិច្ចព្រមព្រៀងទ្វេភាគីដែលរដ្ឋាភិបាលប្រទេសទាំងពីរបានចុះហត្ថលេខា មិនស្តាប់ការឃោសនាបំភ្លៃ ការញុះញង់បំបែកបំបាក់សាមគ្គីភាព និងមិត្តភាពវៀតណាម-កម្ពុជា៕

បកប្រែដោយ Thuy Anh