វៀតណាម និងកម្ពុជា សហប្រតិបត្តិការអនុវត្តយន្តការវិនិយោគបៃតង

នេះជាការបញ្ជាក់របស់លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថានកម្ពុជាក្នុងជំនួបសម្តែងការគួរសម និងពិភាក្សាការងារជាមួយលោក Nguyen Minh Vu ឯកអគ្គរដ្ឋទូតវៀតណាមប្រចាំនៅកម្ពុជា នាថ្ងៃទី១៦ ខែកញ្ញា នៅរាជធានីភ្នំពេញ។ ក្នុង​ជំនួប ​បានពិភាក្សាអំពីការពង្រឹងកិច្ចសហប្រតិបត្តិការរវាងកម្ពុជា និងវៀតណាម លើវិស័យបរិស្ថាន និងសេដ្ឋកិច្ច ជាពិសេសលើវិស័យការពារធនធានធម្មជាតិ និងការគាំទ្រគម្រោងវិនិយោគ។

លោក Nguyen Minh Vu ឯកអគ្គរដ្ឋទូត និងលោក អ៊ាង សុផល្លែត រដ្ឋមន្ត្រីក្រសួងបរិស្ថានកម្ពុជា  (រូបថត៖ vov.vn)

លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថានកម្ពុជា បានស្វាគមន៍យ៉ាងកក់ក្តៅ និងគាំទ្រគម្រោងវិនិយោគរវាងប្រទេសទាំងពីរ ជាពិសេសលើវិស័យបរិស្ថាន។ ជាមួយគ្នានេះ លោករដ្ឋមន្ត្រីក៏បានផ្តល់អនុសាសន៍ថា បណ្តាប្រទេសអាស៊ានត្រូវតែមានការរួបរួមគ្នាជាសំឡេងតែមួយសំដៅកៀរគរហិរញ្ញវត្ថុបៃតង ប្រយុទ្ធប្រឆាំងនឹងផលប៉ះពាល់អវិជ្ជមានដែលបណ្តាលមកពីមីក្រូប្លាស្ទីក និងណាណូប្លាស្ទិក។

ទិដ្ឋភាពនៃកិច្ចពិភាក្សាការងារ (រូបថត៖ vov.vn)

លោក Nguyen Minh Vu ឯកអគ្គរដ្ឋទូត បានអបអរសាទរ និងបង្ហាញការជឿជាក់ថា ក្រសួងបរិស្ថានកម្ពុជានឹងទទួលបានជោគជ័យក្នុងការវិនិយោគបៃតង។ ទន្ទឹមនឹងនោះ លោក Nguyen Minh Vu ឯកអគ្គរដ្ឋទូត ក៏បានអះអាងដែរថា វៀតណាមនឹងសហប្រតិបត្តិការជាមួយកម្ពុជាដើម្បីដោះស្រាយបញ្ហាដែលកើតឡើង និងជួយអង្គភាពអាជីវកម្មនៃប្រទេសទាំងពីរពង្រឹងកិច្ចសហប្រតិបត្តិការវិនិយោគ ផលិតកម្ម និងធ្វើអាជីវកម្ម ឆ្ពោះទៅគោលដៅធ្វើឱ្យកម្ពុជាក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០៕

បកប្រែដោយ Huyen Trang