រួមចំណែកជំរុញទំនាក់ទំនងសហប្រតិបត្តិការលើវិស័យការពារជាតិ វៀតណាម-ឡាវ ឱ្យកាន់តែស៊ីជម្រៅថែមទៀត

នៅក្នុងជំនួប លោកឧត្តមសេនីយ៍ឯក Le Huy Vinh បានសង្កត់ធ្ងន់ថា កិច្ចសហប្រតិបត្តិការលើវិស័យការពារជាតិរវាងប្រទេសទាំងពីរបានបន្តអភិវឌ្ឍប្រកបដោយជាក់ស្តែង និងមានប្រសិទ្ធភាពក្នុងរយៈពេលកន្លងមក ដោយទទួលបានលទ្ធផលលេចធ្លោជាច្រើនលើវិស័យដូចជា៖ ការផ្លាស់ប្តូរគណៈប្រតិភូ យន្តការសហប្រតិបត្តិការ ការសម្របសម្រួល និងការគាំទ្រគ្នាទៅវិញទៅមកនៅក្នុងព្រឹត្តិការណ៍សំខាន់ៗនៃប្រទេសនីមួយៗ។

លោកឧត្តមសេនីយ៍ឯក Le Huy Vinh ទទួលជួបលោកឧត្តមសេនីយ៍ត្រី Chomphet Xaynhasuk

នាពេលខាងមុខ លោកឧត្តមសេនីយ៍ឯក Le Huy Vinh បានស្នើឲ្យវិស័យបច្ចេកទេសនៃកងទ័ពទាំងពីរ ពង្រឹងកិច្ចសហប្រតិបត្តិការ ចែករំលែកបទពិសោធន៍ ជំរុញកិច្ចសហប្រតិបត្តិការក្នុងការបណ្តុះបណ្តាលធនធានមនុស្សដើម្បីបំពេញតម្រូវការនៃភារកិច្ចក្នុងស្ថានភាពថ្មី។ លោកឧត្តមសេនីយ៍ឯក Le Huy Vinh បានអះអាងថា ក្រសួងការពារប្រទេសវៀតណាមត្រៀមខ្លួនជាស្រេចចាត់បញ្ជូនអ្នកជំនាញទៅគាំទ្រ និងជួយឧបត្ថម្ភកម្មាភិបាល និងបុគ្គលិកបច្ចេកទេសនៃកងទ័ពប្រជាជនឡាវក្នុងវិស័យដែលឡាវមានតម្រូវការ។ ក្រសួងការពារប្រទេសវៀតណាមជានិច្ចកាលគាំទ្រ និងបង្កើតលក្ខខណ្ឌអំណោយផលសម្រាប់ស្ថាប័ននៃភាគីទាំងពីរពង្រឹងកិច្ចសហប្រតិបត្តិការ រួមចំណែកជំរុញទំនាក់ទំនងសហប្រតិបត្តិការលើវិស័យការពារជាតិទ្វេភាគីឱ្យកាន់តែស៊ីជម្រៅថែមទៀត។

លោកឧត្តមសេនីយ៍ឯក Le Huy Vinh ផ្តល់វត្ថុអនុស្សាវរីយ៍ជូនលោកឧត្តមសេនីយ៍ត្រី Chomphet Xaynhasuk

លោកឧត្តមសេនីយ៍ត្រី Chomphet Xaynhasuk បានជម្រាបជូនលោកឧត្តមសេនីយ៍ឯក Le Huy Vinh អំពីលទ្ធផលនៃជំនួបធ្វើការជាមួយអគ្គនាយកដ្ឋានឧស្សាហកម្មការពារជាតិ និងអគ្គនាយកដ្ឋានភស្តុភារ និងបច្ចេកវិទ្យា ក្រសួងការពារប្រទេសវៀតណាម។ ភាគីទាំងពីរបានពិភាក្សា និងវាយតម្លៃអំពីខ្លឹមសារនៃកិច្ចសហប្រតិបត្តិការក្នុងរយៈពេលកន្លងមក ព្រមទាំងឯកភាពលើទិសដៅសហប្រតិបត្តិការនាពេលខាងមុខ ដោយផ្តោតលើការបណ្តុះបណ្តាល ការហ្វឹកហាត់ ការចែករំលែកបទពិសោធន៍វិជ្ជាជីវៈ។ល។ លោកឧត្តមសេនីយ៍ត្រី Chomphet Xaynhasuk បានស្នើថា នាពេលខាងមុខ វៀតណាមត្រូវបន្តផ្តល់ជំនួយបច្ចេកទេសដល់កងទ័ពប្រជាជនឡាវ បង្កើនការផ្លាស់ប្តូរគណៈប្រតិភូ និងចែករំលែកបទពិសោធន៍ ជំរុញកិច្ចសហប្រតិបត្តិការលើវិស័យការពារជាតិរវាងប្រទេសទាំងពីរឱ្យកាន់តែស៊ីជម្រៅ ជាក់ស្តែង និងប្រសិទ្ធភាពថែមទៀត៕

បកប្រែដោយ Huyen Trang