ជំរុញកិច្ចសហប្រតិបត្តិការក្នុងការស្រាវជ្រាវវិទ្យាសាស្ត្រសមុទ្រ និងមហាសមុទ្ររវាងវៀតណាម និងសហព័ន្ធរុស្ស៊ី

លោក To Lam អគ្គលេខាបក្សបានអះអាងថា វៀតណាមជាប្រទេសជាប់មាត់សមុទ្រ ហើយដើម្បីសម្រេចបាននូវគោលដៅយុទ្ធសាស្ត្រនៃការអភិវឌ្ឍជាតិនាពេលខាងមុខ វៀតណាមត្រូវតែក្លាយទៅជាប្រទេសដែនសមុទ្រដ៏មានឥទ្ធិពល រួមចំណែកយ៉ាងសកម្មដល់សន្តិភាព សន្តិសុខ កិច្ចសហប្រតិបត្តិការ និងការអភិវឌ្ឍក្នុងតំបន់ និងលើពិភពលោក។ លោកអគ្គលេខាបក្ស បានស្នើថា សហព័ន្ធរុស្ស៊ី ក្នុងនាមជាប្រទេសមហាអំណាចមួយដែលមានបទពិសោធន៍យ៉ាងទូលំទូលាយក្នុងសកម្មភាពដែនសមុទ្រ គាំទ្រ និងសហប្រតិបត្តិការជាមួយវៀតណាមដោយឈរលើមូលដ្ឋាននៃផលប្រយោជន៍ទៅវិញទៅមក ស្របតាមទំនាក់ទំនងមិត្តភាពប្រពៃណី និងភាពជាដៃគូយុទ្ធសាស្ត្រលើគ្រប់វិស័យរវាងប្រទេសទាំងពីរ។ វាយតំលៃខ្ពស់ចំពោះការអភិវឌ្ឍជាវិជ្ជមានក្នុងទំនាក់ទំនងទ្វេភាគីលើគ្រប់វិស័យនាពេលថ្មីៗនេះ។ លោក To Lam អគ្គលេខាបក្សបានស្នើថា ក្រុមប្រឹក្សាសមុទ្រសហព័ន្ធរុស្ស៊ី និងលោក Patrushev ផ្ទាល់នឹងគាំទ្រ និងជំរុញកិច្ចសហប្រតិបត្តិការជាមួយវៀតណាមក្នុងការស្រាវជ្រាវគោលនយោបាយសមុទ្រ ស្រាវជ្រាវវិទ្យាសាស្ត្រសមុទ្រ និងមហាសមុទ្រ ការអភិវឌ្ឍប្រព័ន្ធហេដ្ឋារចនាសម្ព័ន្ធសមុទ្រ ផ្លូវដឹកជញ្ជូនតាមសមុទ្រ ប្រព័ន្ធភស្តុភារ និងការបណ្តុះបណ្តាលធនធានមនុស្ស និងគាំទ្រវៀតណាមក្នុងការគ្រប់គ្រង និងធ្វើអាជីវកម្មលំហសមុទ្រប្រកបដោយនិរន្តរភាព និងប្រសិទ្ធភាព ស្របតាមផលប្រយោជន៍របស់ភាគីនីមួយៗដើម្បីសន្តិភាព ស្ថិរភាព និងការអភិវឌ្ឍក្នុងតំបន់ និងពិភពលោក។

លោក To Lam អគ្គលេខាបក្ស ទទួលជួបលោក Nikolai Patrushev ជំនួយការប្រធានាធិបតីរុស្ស៊ី និងជាប្រធានក្រុមប្រឹក្សាសមុទ្រសហព័ន្ធរុស្ស៊ី

លោក Patrushev បានថ្លែងអំណរគុណចំពោះការទទួលស្វាគមន៍យ៉ាងកក់ក្តៅ និងស្និទ្ធស្នាលរបស់ភាគីវៀតណាម ដោយបានផ្ញើជូនលោកអគ្គលេខាបក្ស នូវការសួរសុខទុក្ខយ៉ាងស្មោះស្ម័គ្រពីសំណាក់ លោក V. Putin ប្រធានាធិបតីរុស្ស៊ី។ លោកអះអាងថា រុស្ស៊ីយកចិត្តទុកដាក់ចំពោះការអភិវឌ្ឍទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយជាមួយវៀតណាម ជាដៃគូសំខាន់មួយក្នុងចំណោមដៃគូសំខាន់របស់រុស្ស៊ីក្នុងតំបន់អាស៊ីប៉ាស៊ីហ្វិក។ លោក Patrushev បានជំរាបជូនលោកអគ្គលេខាបក្សអំពីលទ្ធផលនៃកិច្ចពិភាក្សាប្រកបដោយប្រសិទ្ធភាព និងជាក់ស្តែងជាមួយស្ថាប័ន ក្រសួង ស្ថាប័ននានារបស់វៀតណាម ដើម្បីដាក់ពង្រាយអនុវត្តវិស័យសហប្រតិបត្តិការថ្មីៗ ប៉ុន្តែមានសក្តានុពលក្នុងទំនាក់ទំនងទ្វេភាគី ដោយចាត់ទុកថានេះជាជំហានជាក់ស្តែងក្នុងការអនុវត្តសេចក្តីថ្លែងការណ៍រួមស្តីពីការតំរង់ទិសសំខាន់ៗក្នុងទំនាក់ទំនងរវាងប្រទេសទាំងពីរ ក៏ដូចជារាល់ការប្តេជ្ញាចិត្តដែលសម្រេចបានក្នុងអំឡុងដំណើរទស្សនកិច្ចមកកាន់រុស្ស៊ីរបស់លោក To Lam អគ្គលេខាបក្សកាលពីខែឧស្សភា ឆ្នាំ២០២៥។ លោក Patrushev បានអះអាងពីការត្រៀមខ្លួនជាស្រេចដើម្បីធ្វើកិច្ចសហប្រតិបត្តិការយ៉ាងជិតស្និទ្ធជាមួយវៀតណាមក្នុងការកសាង និងធ្វើឲ្យល្អឥតខ្ចោះនូវផ្លូវសមុទ្រអន្តរជាតិ រួមទាំងការប្រើប្រាស់កំពង់ផែទឹកជ្រៅរបស់វៀតណាមជាមជ្ឈមណ្ឌលដឹកជញ្ជូនក្នុងតំបន់ និងអន្តរជាតិ។

លោកអគ្គលេខាបក្ស បានអះអាងនូវការគាំទ្រចំពោះរុស្ស៊ីក្នុងការលើកកម្ពស់តួនាទី និងកិត្យានុភាពរបស់ខ្លួននៅក្នុងតំបន់អាស៊ីអាគ្នេយ៍ និងតំបន់អាស៊ីប៉ាស៊ីហ្វិក និងស្នើឱ្យរុស្ស៊ីគាំទ្រគោលជំហរ និងទស្សនៈរបស់វៀតណាម និងអាស៊ានទាក់ទងនឹងសមុទ្រខាងកើត ដោយឈរលើមូលដ្ឋានគោរពតាមច្បាប់អន្តរជាតិ ជាពិសេសអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ ១៩៨២ (UNCLOS)។

* នាថ្ងៃទី ១៦ ខែកញ្ញា នៅវិមានប្រធានរដ្ឋ លោក Luong Cuong ប្រធានរដ្ឋវៀតណាម បានទទួលជួបលោក Patrushev។ លោកប្រធានរដ្ឋបានវាយតម្លៃខ្ពស់ចំពោះដំណើរទស្សនកិច្ចរបស់លោក Patrushev នៅវៀតណាម ដោយចាត់ទុកថា នេះជាសកម្មភាពសំខាន់មួយក្នុងការអនុវត្តជាក់ស្តែងលើវិស័យសំខាន់ៗនៃកិច្ចសហប្រតិបត្តិការរវាងប្រទេសទាំងពីរ ដើម្បីនាំឱ្យទំនាក់ទំនងមិត្តភាពជាប្រពៃណី និងភាពជាដៃគូយុទ្ធសាស្ត្រលើគ្រប់វិស័យរវាងវៀតណាម និងរុស្ស៊ីឡើងកំពស់ថ្មី និងបានទទួលស្គាល់ការវិវឌ្ឍជាវិជ្ជមានក្នុងទំនាក់ទំនងវៀតណាម - រុស្ស៊ីនាពេលថ្មីៗនេះ ជាពិសេសក្នុងបរិបទដែលប្រទេសទាំងពីរប្រារព្ធព្រឹត្តិការណ៍ប្រវត្តិសាស្ត្រសំខាន់ៗនៅក្នុងប្រទេសនីមួយៗ និងក្នុងទំនាក់ទំនងទ្វេភាគី រួមទាំងរំលឹកខួបលើកទី ៧៥ នៃការបង្កើតទំនាក់ទំនងការទូតវៀតណាម - រុស្ស៊ី ផងដែរ។

លោក Luong Cuong ប្រធានរដ្ឋវៀតណាម ទទួលជួបលោក Patrushev

លោកប្រធានរដ្ឋអះអាងថា បក្ស រដ្ឋ និងប្រជាជនវៀតណាមចងចាំជានិច្ចនូវការឧបត្ថម្ភ និងជំនួយដ៏មានតម្លៃរបស់ប្រជាជននៃអតីតសហភាពសូវៀត និងរុស្ស៊ីនាបច្ចុប្បន្នកាល និងបានសង្កត់ធ្ងន់លើគោលនយោបាយការបរទេសជាប់លាប់របស់វៀតណាមក្នុងទំនាក់ទំនងជាមួយរុស្ស៊ី ជាពិសេសក្នុងដំណាក់កាលអភិវឌ្ឍន៍ថ្មីនាពេលបច្ចុប្បន្ន។ លោកប្រធានរដ្ឋបានស្នើឱ្យក្រុមប្រឹក្សាសមុទ្រសហព័ន្ធរុស្ស៊ី គាំទ្រការជំរុញកិច្ចសហប្រតិបត្តិការ និងគាំទ្រវៀតណាមក្នុងលំហដែនសមុទ្រ ក៏ដូចជាលើរាល់វិស័យប្រពៃណី និងជាសសរស្តម្ភដូចជា ការពារជាតិ សន្តិសុខ ថាមពល-ប្រេង និងឧស្ម័ន សេដ្ឋកិច្ច-ពាណិជ្ជកម្ម ការអប់រំ-បណ្តុះបណ្តាល ការដឹកជញ្ជូន ... ស្របតាមផលប្រយោជន៍របស់ភាគីនីមួយៗ ដើម្បីសន្តិភាព ស្ថិរភាព និងការអភិវឌ្ឍរួមក្នុងតំបន់ និងពិភពលោក។ លោកប្រធានរដ្ឋបានសង្កត់ធ្ងន់លើសារៈសំខាន់នៃការធានាសន្តិភាព និងសុវត្ថិភាពដែនសមុទ្រនៅសមុទ្រខាងកើត ស្នើឱ្យរុស្ស៊ីបន្តបញ្ចេញសំឡេងគាំទ្រការដោះស្រាយជម្លោះនៅសមុទ្រខាងកើតដោយសន្តិវិធី ឈរលើមូលដ្ឋានច្បាប់អន្តរជាតិ រួមទាំង UNCLOS ឆ្នាំ ១៩៨២ ផងដែរ។

លោក Patrushev បានអះអាងថា រុស្ស៊ីយកចិត្តទុកដាក់ចំពោះការអភិវឌ្ឍទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយជាមួយវៀតណាម ចាត់ទុកវៀតណាមជាដៃគូសំខាន់មួយក្នុងចំណោមដៃគូដ៏សំខាន់របស់រុស្ស៊ីក្នុងតំបន់។ លោក Patrushev បានអះអាងថា ក្រុមប្រឹក្សាសមុទ្រសហព័ន្ធរុស្ស៊ី នឹងបន្តគាំទ្រការពង្រីកបន្ថែមទៀតនូវវិស័យសហប្រតិបត្តិការជាមួយវៀតណាម រួមទាំងកិច្ចសហប្រតិបត្តិការដែនសមុទ្ររវាងប្រទេសទាំងពីរ ផ្តោតលើការស្រាវជ្រាវវិទ្យាសាស្ត្រ និងបច្ចេកទេសក្នុងវិស័យដែនសមុទ្រ។

* នាព្រឹកថ្ងៃទី ១៦ កញ្ញា នៅទីក្រុងហាណូយ គណៈប្រតិភូក្រុមប្រឹក្សាសមុទ្រនៃសហព័ន្ធរុស្ស៊ី ដឹកនាំដោយលោក Patrushev បានអញ្ជើញទៅទស្សនា និងធ្វើការនៅមជ្ឈមណ្ឌលត្រូពិកវៀតណាម - រុស្ស៊ី។ លោកឧត្តមសេនីយ៍ឯក Nguyen Truong Thang អនុរដ្ឋមន្ត្រីក្រសួងការពារប្រទេសវៀតណាម បានអញ្ជើញជាអធិបតីក្នុងពិធីទទួលជួប និងធ្វើការជាមួយគណៈប្រតិភូ៕

បកប្រែដោយ Minh Trung