គណៈប្រតិភូនៃកាសែតកងទ័ពប្រជាជនទៅទស្សនាកងពលធំរថក្រោះលេខ ១០១១ (គុយបា)

ក្នុងឱកាសនេះ គណៈប្រតិភូបានទៅទស្សនាបន្ទាយ សម្ភារៈបរិក្ខារ សព្វាវុធ សម្ភារៈបច្ចេកទេសដែលបម្រើដល់ការហ្វឹកហាត់ និងការត្រៀមប្រយុទ្ធជាស្រេចរបស់កងពលធំ ព្រមទាំងជួបសំណេះសំណាលជាមួយកម្មាភិបាល និងយុទ្ធជននៃអង្គភាព។

គណៈប្រតិភូនៃកាសែតកងទ័ពប្រជាជន ទៅទស្សនាសារមន្ទីរកងពលធំរថក្រោះលេខ ១០១១

នៅក្នុងជំនួប លោកវរសេនីយ៍ឯក Robendo Navarro Cabneja មេបញ្ជាការកងពលធំរថក្រោះលេខ ១០១១ បានណែនាំអំពីដំណើររយៈពេល ៦០ ឆ្នាំ (១៩៦៥-២០២៥) ក្នុងការកសាង ការប្រយុទ្ធ និងការរីកចម្រើននៃកងពលធំ។ កងពលធំគឺជាអង្គភាពសំខាន់ និងគំរូមួយដែលមានសមិទ្ធិផលឆ្នើមជាច្រើនក្នុងការហ្វឹកហាត់ ការត្រៀមប្រយុទ្ធជាស្រេច និងបំពេញបេសកកម្មអន្តរជាតិរបស់កងកម្លាំងប្រដាប់អាវុធបដិវត្តន៍គុយបា។

គណៈប្រតិភូនៃកាសែតកងទ័ពប្រជាជន ស្តាប់ការណែនាំអំពីឯកសារហ្វឹកហាត់មួយចំនួនរបស់កងពលធំរថក្រោះលេខ ១០១១

តាងនាមគណៈប្រតិភូ លោកឧត្តមសេនីយ៍ត្រី Doan Xuan Bo បានថ្លែងអំណរគុណចំពោះមេបញ្ជាការ កម្មាភិបាល និងយុទ្ធជននៃកងពលធំរថក្រោះលេខ ១០១១ សម្រាប់ការស្វាគមន៍យ៉ាងកក់ក្តៅ ស្និទ្ធស្នាល។ លោកឧត្តមសេនីយ៍ត្រី Doan Xuan Bo បានសម្តែងនូវចំណាប់អារម្មណ៍ ចំពោះប្រពៃណីដ៏យូរលង់ និងការរីកចម្រើនដោយឥតឈប់ឈររបស់កងពលធំ។ លោកឧត្តមសេនីយ៍ត្រី Doan Xuan Bo ជឿជាក់ថា អង្គភាពនឹងបន្តរក្សា និងលើកកំពស់ប្រពៃណីបដិវត្តន៍របស់ខ្លួន សម្រេចបានជោគជ័យនូវភារកិច្ចដែលបក្ស រដ្ឋ ប្រជាជន និងក្រសួងកងកម្លាំងប្រដាប់អាវុធបដិវត្តន៍គុយបាប្រគល់ឲ្យសក្តិសមជា “កណ្តាប់ដៃដែកថែបនៃកងកម្លាំងប្រដាប់អាវុធបដិវត្តន៍គុយបា” រួមចំណែកការពារយ៉ាងរឹងមាំនូវមាតុភូមិគុយបាសង្គមនិយម។

ក្នុងបរិយាកាសស្និទ្ធស្នាល និងភាតរភាព លោកឧត្តមសេនីយ៍ត្រី Doan Xuan Bo បានជម្រាបជូនអំពីដំណើរការបង្កើត ការអភិវឌ្ឍ និងសមិទ្ធិផលឆ្នើមរបស់កាសែតកងទ័ពប្រជាជនក្នុងរយៈពេលកន្លងមក។ ទន្ទឹមនឹងនោះ លោកឧត្តមសេនីយ៍ត្រី Doan Xuan Bo បានបញ្ជាក់ថា ដំណើរទស្សនកិច្ចនៅកងពលធំរថក្រោះលេខ ១០១១ បានជួយឱ្យសមាជិកគណៈប្រតិភូទទួលបានចំណេះដឹងបន្ថែម និងប្រមូលឯកសារដ៏មានតម្លៃសម្រាប់ការងារសារព័ត៌មាននាពេលអនាគត៕

បកប្រែដោយ Huyen Trang