លោកនាយឧត្តមសេនីយ៍ Nguyen Tan Cuong មានជំនួបជាមួយប្រធានគណៈប្រតិភូមកពីប្រទេសមួយចំនួនដែលចូលរួមកិច្ចប្រជុំ ACDFM-22

លោកនាយឧត្តមសេនីយ៍ Nguyen Tan Cuong ទទួលជួបអគ្គមេបញ្ជាការនៃកងទ័ពម៉ាឡេស៊ី

នៅក្នុងជំនួបជាមួយអគ្គមេបញ្ជាការនៃកងទ័ពម៉ាឡេស៊ី លោកនាយឧត្តមសេនីយ៍ Nguyen Tan Cuong បានស្នើថា នាពេលខាងមុខ ភាគីទាំងពីរបន្តសម្របសម្រួលអនុវត្តយ៉ាងល្អនូវយន្តការសហប្រតិបត្តិការដូចជា៖ កិច្ចសន្ទនាគោលនយោបាយការពារជាតិ ពង្រឹងកិច្ចសហប្រតិបត្តិការរវាងអង្គភាពទ័ព និងការជួបប្រាស្រ័យរវាងនាយទាហានវ័យក្មេង។ លោកនាយឧត្តមសេនីយ៍ Nguyen Tan Cuong បានសង្ឃឹមថា ម៉ាឡេស៊ីនឹងគាំទ្រចំពោះការចុះហត្ថលេខាលើអនុស្សរណៈយោគយល់គ្នារវាងរដ្ឋាភិបាលនៃប្រទេសទាំងពីរស្តីពីកិច្ចសហប្រតិបត្តិការអនុវត្តច្បាប់ និងការស្វែងរក និងជួយសង្គ្រោះនៅសមុទ្រ និងចុះហត្ថលេខាលើកិច្ចព្រមព្រៀងដើម្បីបង្កើតយន្តការយាមល្បាតរួមគ្នានៅសមុទ្រ និងបណ្តាញទាក់ទងរវាងកងទ័ពជើងទឹកនៃប្រទេសទាំងពីរ។ ទន្ទឹមនឹងនោះ ភាគីទាំងពីរសម្របសម្រួលការផ្លាស់ប្តូរព័ត៌មាន ការអនុវត្តច្បាប់ ការជួយនាវានេសាទ និងអ្នកនេសាទដែលរងគ្រោះនៅសមុទ្រ ក៏ដូចជាការព្យាបាលប្រកបដោយមនុស្សធម៌ចំពោះនាវានេសាទ និងអ្នកនេសាទនៃប្រទេសទាំងពីរ បន្តពិគ្រោះយោបល់ និងគាំទ្រគ្នាទៅវិញទៅមកនៅវេទិកា និងយន្តការពហុភាគីដែលដឹកនាំដោយអាស៊ាន។

លោកនាយឧត្តមសេនីយ៍ Nguyen Tan Cuong ទទួលជួបអគ្គសេនាធិការនៃកងទ័ពប្រជាជនឡាវ

ក្នុងជំនួបជាមួយអគ្គសេនាធិការនៃកងទ័ពប្រជាជនឡាវ លោកនាយឧត្តមសេនីយ៍ Nguyen Tan Cuong បានឲ្យដឹងថា ភាគីទាំងពីរគប្បីដឹកនាំស្ថាប័ន អង្គភាពនានាសម្របសម្រួលយ៉ាងសកម្ម និងរៀបចំផែនការអនុវត្តប្រកបដោយប្រសិទ្ធភាព រួមទាំងការត្រៀមរៀបចំបានល្អ និងរៀបចំដោយជោគជ័យនូវកិច្ចប្រជុំប្រចាំឆ្នាំរវាងរដ្ឋមន្ត្រីក្រសួងការពារប្រទេសទាំងបី និងលំហាត់សមយុទ្ធរួមរវាងកងទ័ពនៃប្រទេសទាំង៣ វៀតណាម-ឡាវ-កម្ពុជា នៅឡាវ។

លោកនាយឧត្តមសេនីយ៍ Nguyen Tan Cuong ទទួលជួបអគ្គមេបញ្ជាការនៃកងយោធពលខេមរភូមិន្ទ

នៅក្នុងជំនួបទ្វេភាគីជាមួយអគ្គមេបញ្ជាការនៃកងយោធពលខេមរភូមិន្ទ លោកនាយឧត្តមសេនីយ៍ Nguyen Tan Cuong បានស្នើថា នាពេលខាងមុខ ភាគីទាំងពីរនឹងបំពេញការងារបានល្អក្នុងការរៀបចំប្រកបដោយជោគជ័យនូវជំនួបប្រាស្រ័យមិត្តភាពព្រំដែនថ្នាក់រដ្ឋមន្រ្តីក្រសួងការពារជាតិ វៀតណាម-កម្ពុជា លើកទី២ កិច្ចសន្ទនាគោលនយោបាយការពារជាតិ វៀតណាម-កម្ពុជា លើកទី៨ នៅវៀតណាម ការចុះហត្ថលេខាលើកិច្ចព្រមព្រៀងសហប្រតិបត្តិការព្រំដែនរវាងក្រសួងការពារជាតិទាំងពីរ ការរៀបចំកិច្ចប្រជុំស្តីពីការបណ្តុះបណ្តាល និងគ្រប់គ្រងសិក្ខាកាមយោធានៃប្រទេសទាំងពីរ។ល។

លោកនាយឧត្តមសេនីយ៍ Nguyen Tan Cuong ផ្តល់វត្ថុអនុស្សាវរីយ៍ជូនអគ្គសេនាធិការនៃកងកម្លាំងប្រដាប់អាវុធហ្វីលីពីន

នៅក្នុងជំនួបទ្វេភាគីជាមួយអគ្គសេនាធិការនៃកងកម្លាំងប្រដាប់អាវុធហ្វីលីពីន លោកនាយឧត្តមសេនីយ៍ Nguyen Tan Cuong បានស្នើថា នាពេលខាងមុខគឺភាគីទាំងពីរបន្តជំរុញការផ្លាស់ប្តូរគណៈប្រតិភូគ្រប់លំដាប់ថ្នាក់ អនុវត្តយន្តការសហប្រតិបត្តិការប្រកបដោយប្រសិទ្ធភាព។ ទន្ទឹមនឹងនោះ លោកនាយឧត្តមសេនីយ៍ Nguyen Tan Cuong សង្ឃឹមថា ហ្វីលីពីននឹងសម្រេចបានការចុះហត្ថលេខាលើឯកសារសហប្រតិបត្តិការលើវិស័យការពារជាតិនាពេលឆាប់ៗនេះ។

លោកនាយឧត្តមសេនីយ៍ Nguyen Tan Cuong ពិភាក្សាជាមួយមេបញ្ជាការកងទ័ពសិង្ហបុរី

នៅក្នុងជំនួបទ្វេភាគីជាមួយអគ្គមេបញ្ជាការនៃកងទ័ពសិង្ហបុរី លោកនាយឧត្តមសេនីយ៍ Nguyen Tan Cuong សង្ឃឹមថា នាពេលខាងមុខ ភាគីទាំងពីរនឹងបន្តពង្រឹងកិច្ចសហប្រតិបត្តិការប្រកបដោយទំនុកចិត្ត គ្រប់ជ្រុងជ្រោយ និងជាក់ស្តែង ផ្តោតលើការផ្លាស់ប្តូរគណៈប្រតិភូគ្រប់លំដាប់ថ្នាក់ ជាពិសេសនៅថ្នាក់ជាន់ខ្ពស់ រក្សាប្រកបដោយប្រសិទ្ធភាពនូវយន្តការពិគ្រោះយោបល់ និងកិច្ចសន្ទនាដែលមានស្រាប់ បន្តពង្រឹងកិច្ចសហប្រតិបត្តិការលើវិស័យបណ្តុះបណ្តាលធនធានមនុស្ស រក្សាកិច្ចសហប្រតិបត្តិការរវាងអង្គភាពទ័ពប្រកបដោយប្រសិទ្ធភាព ចែករំលែកបទពិសោធន៍វិជ្ជាជីវៈ ការជួបប្រាស្រ័យនាយទាហានវ័យក្មេង ការចាត់បញ្ជូននាវាទៅទស្សនាគ្នាទៅវិញទៅមក ពង្រីកកិច្ចសហប្រតិបត្តិការលើវិស័យពេទ្យយោធា និងសន្តិសុខតាមអ៊ីនធឺណិត។ល៕

បកប្រែដោយ Huyen Trang