លោក Luong Cuong ប្រធានរដ្ឋវៀត​ណាម អញ្ជើញជាអធិបតីក្នុងពិធីទទួលព្រះរាជបដិសណ្ឋារកិច្ចព្រះមហាក្សត្រនៃព្រះរាជាណាចក្រកម្ពុជា

លោក Luong Cuong ប្រធានរដ្ឋវៀត​ណាម  អញ្ជើញជាអធិបតីក្នុងពិធីទទួលព្រះរាជបដិសណ្ឋារកិច្ចព្រះមហាក្សត្រនៃព្រះរាជាណាចក្រកម្ពុជា

កាលពីថ្ងៃទី២៤ ខែមិថុនា ឆ្នាំ១៩៦៧ វៀតណាមនិងកម្ពុជាបានបង្កើតទំនាក់ទំនងការទូតជាផ្លូវការ។ ចាប់តាំងពីពេលនោះមក ទំនាក់ទំនងមិត្តភាពរវាងប្រទេសទាំងពីរត្រូវបានពង្រឹងនិងអភិវឌ្ឍជាបន្តបន្ទាប់។ ក្នុងឆ្នាំ ២០០៥ ថ្នាក់ដឹកនាំជាន់ខ្ពស់នៃប្រទេសទាំងពីរបានឯកភាពគ្នាដាក់បាវចនាថ្មីក្នុងការអភិវឌ្ឍន៍ទំនាក់ទំនងទ្វេភាគី៖ “អ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិតស្ថេរយូរអង្វែង”។ ជាមួយនឹងការតម្រង់ទិសនោះ ទំនាក់ទំនងរវាងប្រទេសទាំងពីរត្រូវបានពង្រឹង និងអភិវឌ្ឍន៍ជាបន្តបន្ទាប់លើគ្រប់វិស័យ។

ក្នុងប៉ុន្មានឆ្នាំកន្លងទៅ ទំនាក់ទំនងវៀតណាម-កម្ពុជា បន្តអភិវឌ្ឍន៍យ៉ាងល្អប្រសើរ និងត្រូវបានពង្រឹងនិងពង្រីកឥតឈប់ឈរលើគ្រប់វិស័យ នាំមកនូវផលប្រយោជន៍ជូនប្រជាជននៃប្រទេសទាំងពីរ រួមចំណែកយ៉ាងសកម្មដល់សន្តិភាព ស្ថិរភាព និងកិច្ចសហប្រតិបត្តិការក្នុងតំបន់ និងពិភពលោក។ កិច្ចសហប្រតិបត្តិការលើបណ្តាញបក្សដើរតួនាទីស្នូលក្នុងការតម្រង់ទិសទំនាក់ទំនងវៀតណាម-កម្ពុជា។ ថ្នាក់ដឹកនាំជាន់ខ្ពស់នៃប្រទេសទាំងពីរតែងតែរក្សាដំណើរទស្សនកិច្ច។ យន្តការសហប្រតិបត្តិការទ្វេភាគីសំខាន់ៗត្រូវបានលើកកម្ពស់ប្រកបដោយប្រសិទ្ធភាព។ កិច្ចសហប្រតិបត្តិការលើវិស័យការពារជាតិ និងសន្តិសុខ គឺជាសសរស្តម្ភដ៏សំខាន់ និងរីកចម្រើនកាន់តែស៊ីជម្រៅ និងមានប្រសិទ្ធភាព។  កិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគបានអភិវឌ្ឍយ៉ាងឆាប់រហ័ស ហើយក្លាយជាចំណុចភ្លឺស្វាងក្នុងទំនាក់ទំនងវៀតណាម-កម្ពុជា។ បច្ចុប្បន្នវៀតណាមជាដៃគូពាណិជ្ជកម្មធំជាងគេទីបីរបស់កម្ពុជា និងជាដៃគូពាណិជ្ជកម្មធំជាងគេរបស់កម្ពុជាក្នុងអាស៊ាន។

ដោយឈរលើមូលដ្ឋាននៃទំនាក់ទំនងល្អប្រសើរ ព្រះរាជទស្សនកិច្ចផ្លូវរដ្ឋរបស់ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទៅកាន់ប្រទេសវៀតណាមគឺជាព្រឹត្តិការណ៍ដ៏មានសារៈសំខាន់មួយក្នុងទំនាក់ទំនងដ៏យូរអង្វែងរបស់ប្រទេសទាំងពីរ។

លោកប្រធានរដ្ឋវៀតណាម Luong Cuong និងព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា

បន្ទាប់ពីពិធីទទួលព្រះរាជបដិសណ្ឋារកិច្ច លោកប្រធានរដ្ឋ Luong Cuong និងព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានដឹកនាំគណៈប្រតិភូជាន់ខ្ពស់នៃប្រទេសទាំងពីរចាប់ផ្ដើមព្រះរាជសវនាការ និងវាយតម្លៃលទ្ធផលនៃកិច្ចសហប្រតិបត្តិការរវាងប្រទេសទាំងពីរនាពេលកន្លងមក និងដាក់ទិសដៅសម្រាប់កិច្ចសហប្រតិបត្តិការនាពេលខាងមុខ៕

ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា យាងដាក់កម្រងផ្កា និងចូលគោរពវិញ្ញាណក្ខន្ធលោកប្រធានហូជីមិញ

* គួររំលឹកថា មុននោះ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា យាងដាក់កម្រងផ្កានៅវិមានរំលឹកវិញ្ញាណក្ខន្ធវីរជនពលី និងយាងដាក់កម្រងផ្កា និងចូលគោរពវិញ្ញាណក្ខន្ធលោកប្រធានហូជីមិញ៕

បកប្រែដោយ Pham Diep