គណៈប្រតិភូជាន់ខ្ពស់នៃក្រសួងអធិការកិច្ចកម្ពុជាបំពេញទស្សនកិច្ចការងារនៅខេត្ត Binh Duong
កប.អនឡាញ - នាព្រឹកថ្ងៃទី១៣ ខែមិថុនា លោក Vo Van Minh ប្រធានគណៈកម្មាធិការប្រជាជនខេត្ត Binh Duong វៀតណាម បានទទួលជួបគណៈប្រតិភូជាន់ខ្ពស់នៃក្រសួងអធិការកិច្ចកម្ពុជា ដឹកនាំដោយលោក ហួត ហាក់ រដ្ឋមន្ត្រី។
ក្នុងជំនួបនេះ លោក Vo Van Minh បានជម្រាបជូនគណៈប្រតិភូអំពីស្ថានភាពអភិវឌ្ឍសេដ្ឋកិច្ចសង្គមរបស់ខេត្ត Binh Duong។ លោកបានឲ្យដឹងថា នាពេលកន្លងមកនេះ ខេត្ត Binh Duong តែងតែយកចិត្តទុកដាក់ដល់ការជំរុញទំនាក់ទំនងសហប្រតិបត្តិការល្អជាមួយមូលដ្ឋានរបស់កម្ពុជា ចូលរួមចំណែកពូនជ្រំ និងអភិវឌ្ឍទំនាក់ទំនងមិត្តភាពប្រពៃណីវៀតណាម-កម្ពុជា។
|
|
លោក Vo Van Minh (ស្តាំ) ជួបធ្វើការជាមួយលោក ហួត ហាក់ (រូបថត៖ baobinhduong.vn) |
លោក ហួត ហាក់ បានថ្លែងអំណរគុណចំពោះថ្នាក់ដឹកនាំខេត្ត Binh Duong ដែលបានចំណោយពេលវេលាទទួលស្វាគមន៍គណៈប្រតិភូ។ លោកក៏បានជម្រាបជូនអំពីលទ្ធផលនៃដំណើរទស្សនកិច្ចការងារនៅវៀតណាម ហើយថ្លែងអំណរគុណចំពោះកិច្ចសហប្រតិបត្តិការ ការជួយគាំទ្រដ៏មានតម្លៃរបស់វៀតណាមចំពោះកម្ពុជា។ លោក ហួត ហាក់ បានស្នើឲ្យស្ថាប័នអធិការកិច្ចខេត្ត Binh Duong ចងសម្ព័ន្ធមេត្រីភាពជាមួយភ្នាក់ងារអធិការកិច្ចនៃខេត្តក្រុងរបស់កម្ពុជា ដើម្បីរួមចំណែកលើកកម្ពស់ទំនាក់ទំនងសហប្រតិបត្តិការរវាងវៀតណាម និងកម្ពុជា។
លោក Vo Van Minh បានវាយតម្លៃចំពោះសំណើរបស់លោករដ្ឋមន្ត្រីអធិការកិច្ចកម្ពុជា ស្តីពីការចងសម្ព័ន្ធមេត្រីភាពរវាងស្ថាប័នអធិការកិច្ចខេត្ត Binh Duong និងភ្នាក់ងារអធិការកិច្ចមូលដ្ឋានកម្ពុជា ហើយចាត់ទុកថា ការចងសម្ព័ន្ធមេត្រីភាពនេះនឹងជួយដល់ស្ថាប័នអធិការកិច្ចនៃប្រទេសទាំងពីរមានឱកាសចែករំលែកបទពិសោធន៍អំពីការងារអធិការកិច្ច ចូលរួមចំណែកពង្រឹងទំនាក់ទំនងសហប្រតិបត្តិការមិត្តភាពរវាងផ្នែកអធិការកិច្ចនៃប្រទេសទាំងពីរ៕
បកប្រែដោយ Thuy Anh