ពិធីរំលឹកខួបលើកទី ៨០ នៃទិវាបង្កើតកងកម្លាំងប្រដាប់អាវុធខេត្ត Bac Giang

ក្នុងរយៈពេល ៨០ ឆ្នាំកន្លងមក កងកម្លាំងប្រដាប់អាវុធខេត្ត Bac Giang បានរីកចម្រើនឥតឈប់ឈរ លើកកំពស់ប្រពៃណីស្នេហាជាតិ និងបដិវត្តន៍របស់មាតុភូមិវីរភាព ស្មោះត្រង់ដាច់ខាតចំពោះបក្ស មាតុភូមិ និងប្រជាជន រួមចំណែកយ៉ាងសកម្មក្នុងបុព្វហេតុរំដោះជាតិ កសាង និងការពារមាតុភូមិ ក៏ដូចជាក្នុងការផ្លាស់ថ្មីប្រទេសជាតិ និងខេត្ត Bac Giang នាពេលបច្ចុប្បន្ន។

ទទួលការផ្ទេរសិទ្ធិពីលោកប្រធានរដ្ឋ លោកនាយឧត្តមសេនីយ៍ Nguyen Tan Cuong ប្រគល់គ្រឿង ឥស្សរិយយសការពារមាតុភូមិថ្នាក់ទី ២ ជូនកងកម្លាំងប្រដាប់អាវុធខេត្ដ Bac Giang

តាងនាមគណៈកម្មាធិការបក្សយោធាមជ្ឈិម ក្រសួងការពារប្រទេស លោកនាយឧត្តមសេនីយ៍ Nguyen Tan Cuong បានអបអរសាទរ និងកោតសរសើរចំពោះសមិទ្ធិផលដែលថ្នាក់ដឹកនាំ កម្មាភិបាល និងយុទ្ធជនគ្រប់ជំនាន់របស់កងកម្លាំងប្រដាប់អាវុធខេត្ត Bac Giang សម្រេចបានក្នុងរយៈពេល ៨០ ឆ្នាំកន្លងមក។

លោកនាយឧត្តមសេនីយ៍ Nguyen Tan Cuong បានស្នើឲ្យកងកម្លាំងប្រដាប់អាវុធខេត្ត Bac Giang បន្តអនុវត្តយ៉ាងម៉ឹងម៉ាត់នូវសេចក្ដីណែនាំ និងសេចក្ដីសម្រេចចិត្ដរបស់គណៈកម្មាធិការបក្សយោធាមជ្ឈិម ក្រសួងការពារប្រទេស ព្រមទាំងផ្ដល់យោបល់ជូនគណៈកម្មាធិការបក្សខេត្ដ ក្រុមប្រឹក្សាប្រជាជន និងគណៈកម្មាធិការប្រជាជនខេត្តដឹកនាំការងារការពារជាតិ និងយោធានៅមូលដ្ឋាន ផ្សារភ្ជាប់នូវការអភិវឌ្ឍន៍សេដ្ឋកិច្ច សង្គមជាមួយការពង្រឹងការការពារជាតិ និងសន្តិសុខ។ បំប៉នចំណេះដឹងផ្នែកការពារជាតិ និងសន្តិសុខដល់កម្មាភិបាល បក្ខជន និងប្រជាពលរដ្ឋ។

ទន្ទឹមនឹងការកសាងកងកម្លាំងប្រដាប់អាវុធខេត្ត Bac Giang ឲ្យមានរបៀបរៀបរយ ចំណាន ទំនើប និងមានសមត្ថភាព​ប្រយុទ្ធខ្ពស់ ហើយផ្តោតលើការលើកកម្ពស់គុណភាពហ្វឹកហ្វឺនឱ្យស្របទៅនឹងស្ថានភាពជាក់ស្តែង។ លើកកំពស់តួនាទីស្នូលក្នុងការអនុវត្តភារកិច្ចយោធា និងការពារជាតិ រួមចំណែករក្សាសន្តិសុខនយោបាយនៅមូលដ្ឋាន។

លោកនាយឧត្តមសេនីយ៍ Nguyen Tan Cuong បានលើកឡើងថា កងកម្លាំងប្រដាប់អាវុធខេត្ត Bac Giang គួរតែលើកកម្ពស់សមត្ថភាពដឹកនាំ កសាងអង្គការបក្សស្អាតស្អំ និងរឹងមាំ កសាងអង្គភាពប្រកបដោយរឹងមាំ គ្រប់ជ្រុងជ្រោយ និងលេចធ្លោ ហើយបន្តអនុវត្តល្អនូវគោលនយោបាយសមរភូមិក្រោយរបស់កងទ័ព រួមគ្នាកសាងជនបទថ្មី ចលនាលុបបំបាត់ផ្ទះបណ្តោះអាសន្ន និងទ្រុឌទ្រោមក្នុងខេត្ត រួមចំណែកលុបបំបាត់ភាពអត់ឃ្លាន និងកាត់បន្ថយភាពក្រីក្រនៅមូលដ្ឋាន  មិនទុកនរណាម្នាក់នៅពីក្រោយឡើយ៕

បកប្រែដោយ Pham Diep