អញ្ជើញថ្លែងសុន្ទរកថាដឹកនាំមហាសន្និបាត លោក To Lam អគ្គលេខាបក្សកុម្មុយនិស្តវៀតណាម បានបញ្ជាក់ថា បក្ស និងរដ្ឋបានយល់ឃើញតាំងពីដើមពីសារៈសំខាន់នៃទិន្នន័យ ហើយថ្មីៗបំផុតការិយាល័យនយោបាយបានចេញផ្សាយសេចក្តីសម្រេចចិត្តលេខ ៥៧ ដែលកំណត់យ៉ាងច្បាស់ថា ទិន្នន័យគឺជាស្នូលនៃការធ្វើបរិវត្តកម្មឌីជីថល និងជាកម្លាំងចលករដ៏សំខាន់មួយសម្រាប់ការអភិវឌ្ឍ។ ក្នុងបរិបទនោះ ការបង្កើតសមាគមទិន្នន័យជាតិពិតជាមានអត្ថន័យយ៉ាងសំខាន់ក្នុងការអនុវត្តសេចក្តីសម្រេចចិត្តលេខ ៥៧ ឱ្យប្រែក្លាយវៀតណាមទៅជាប្រទេសឌីជីថល ដែលអភិវឌ្ឍដោយផ្អែកលើទិន្នន័យ។
លោកអគ្គលេខាបក្ស To Lam បានសង្កត់ធ្ងន់ថា នាពេលខាងមុខសមាគមចាំបាច់ត្រូវផ្តោតលើការផ្តល់ប្រឹក្សាអំពីការកែលម្អ ធ្វើឱ្យមានភាពសុក្រឹតច្រករបៀងផ្លូវច្បាប់ទាក់ទងនឹងទិន្នន័យ បង្កើតលក្ខខណ្ឌសម្រាប់ការធ្វើចរាចរណ៍ ការតភ្ជាប់ ការចែករំលែក និងការធ្វើអាជីវកម្មទិន្នន័យឱ្យបានអតិបរមា ខណៈដែលនៅតែធានាសន្តិសុខ សុវត្ថិភាព និងអធិបតេយ្យភាពទិន្នន័យ លើកកម្ពស់តួនាទីស្នូលក្នុងការកសាង អភិវឌ្ឍ ធ្វើអាជីវកម្ម និងធ្វើឱ្យទិន្នន័យជាតិមានភាពចម្រើន។
លោកអគ្គលេខាបក្ស To Lam បានបញ្ជាក់ថា៖ “ម្ចាស់ការ អនុវត្តយ៉ាងសកម្មក្នុងការឆ្ពោះទៅរកស្វ័យភាពក្នុងបច្ចេកវិទ្យាទិន្នន័យ ស្នូល ជាពិសេស បញ្ញាសិប្បនិម្មិត (AI) ទិន្នន័យធំ ប្លុកឆេន និងកុំព្យូទ័រលើពពក។ ខ្ញុំសង្កត់ធ្ងន់ជាពិសេសលើតួនាទីរបស់សមាគមនៅក្នុងកម្មវិធី និងគំនិតផ្តួចផ្តើមសំខាន់ៗមួយចំនួន ដែលត្រូវតែអភិវឌ្ឍទីផ្សារទិន្នន័យសម្រាប់ការអភិវឌ្ឍប្រកបដោយនិរន្តរភាព កសាងទីផ្សារទិន្នន័យជាតិ ដាក់ពង្រាយវេទិកាទិន្នន័យ ដើម្បីបម្រើការស្រាវជ្រាវ អភិវឌ្ឍសហគ្រិនភាព នវានុវត្តន៍ ផ្គត់ផ្គង់ផលិតផល និងសេវាកម្ម ទាក់ទងនឹងទិន្នន័យ ដើម្បីបម្រើដល់ការអភិវឌ្ឍសេដ្ឋកិច្ចសង្គម។ ចាំបាច់ត្រូវបង្កើតផ្លាតហ្វម AI បើកចំហថ្នាក់ជាតិ ដើម្បីជួយឱ្យសហគ្រាសចូលប្រើកម្មវិធី AI បានយ៉ាងងាយស្រួល និងផ្សព្វផ្សាយការយល់ដឹងអំពីទិន្នន័យសម្រាប់ប្រជាពលរដ្ឋទាំងអស់ ហើយលើកកម្ពស់ការយល់ដឹង ចំណេះដឹង និងជំនាញអំពីទិន្នន័យសម្រាប់សង្គមទាំងមូល ជាពិសេសអំពីសារៈសំខាន់នៃការការពារទិន្នន័យផ្ទាល់ខ្លួន ក៏ដូចជាប្រតិបត្តិតាមច្បាប់ផងដែរ”។
នៅក្នុងមហាសន្និបាត លោកនាយឧត្តមសេនីយ៍ Luong Tam Quang រដ្ឋមន្ត្រីក្រសួងនគរបាលត្រូវបានអង្គសន្និបាតបោះឆ្នោតជ្រើសតាំងឱ្យកាន់តំណែងជាប្រធានសមាគមទិន្នន័យជាតិសម្រាប់អាណត្តិ ២០២៥-២០៣០៕
បកប្រែដោយ Thanh Cong
Type the code from the image