កិច្ចប្រជុំអនុរដ្ឋមន្ត្រីការពារជាតិអាស៊ាន-ជប៉ុនលើកទី១៤

គណៈប្រតិភូក្រសួងការពារប្រទេសវៀតណាមដឹកនាំដោយលោកឧត្តមសេនីយ៍ឯក Hoang Xuan Chien សមាជិកគណៈកម្មាធិការមជ្ឈិមបក្ស អនុរដ្ឋមន្ត្រីក្រសួងការពារប្រទេស បានចូលរួមកិច្ចប្រជុំនេះ។

ប្រតិភូចូលរួមកិច្ចប្រជុំអនុរដ្ឋមន្ត្រីការពារជាតិអាស៊ាន-ជប៉ុនលើកទី១៤

ក្រោមប្រធានបទ "ពិនិត្យឡើងវិញនូវកិច្ចសហប្រតិបត្តិការលើវិស័យការពារជាតិអាស៊ាន-ជប៉ុន និងពិភាក្សាអំពីទិសដៅជំរុញកិច្ចសហប្រតិបត្តិការនាពេលខាងមុខ" អង្គប្រជុំបានបញ្ជាក់ពីអត្ថន័យ និងសារៈសំខាន់នៃគំនិតផ្តួចផ្តើមពង្រឹងកិច្ចសហប្រតិបត្តិការអាស៊ាន-ជប៉ុន ដែលលើកឡើងដោយក្រសួងការពារប្រទេសវៀតណាម រួមទាំងគំនិតផ្តួចផ្តើមថ្នាក់រដ្ឋមន្ត្រីការពារជាតិជប៉ុន-អាស៊ាន ស្តីពីការពង្រឹងកិច្ចសហប្រតិបត្តិការការពារជាតិ (JASMINE) សម្រាប់កិច្ចសហប្រតិបត្តិការការពារជាតិអាស៊ាន-ជប៉ុន។ គំនិតផ្តួចផ្តើម JASMINE បានបញ្ជាក់ពីការប្តេជ្ញាចិត្តរបស់ប្រទេសជប៉ុន និងបណ្តាប្រទេសអាស៊ានក្នុងការពង្រឹងសាមគ្គីភាព ការចែករំលែក និងកិច្ចសហប្រតិបត្តិការជាក់ស្តែង ដើម្បីជំនះបញ្ហាប្រឈម ស្វែងរកឱកាស និងរួមចំណែកប្រកបដោយការទទួលខុសត្រូវដល់សន្តិសុខ សន្តិភាព និងវិបុលភាពនៃតំបន់។

ថ្លែងមតិក្នុងកិច្ចប្រជុំ លោកឧត្តមសេនីយ៍ឯក Hoang Xuan Chien បានលើកឡើងខ្លឹមសារសំខាន់ៗចំនួន៣។ ទីមួយ ទាក់ទងនឹងឥទ្ធិពលនៃបរិយាកាសសន្តិសុខនាពេលបច្ចុប្បន្នលើកិច្ចសហប្រតិបត្តិការការពារជាតិអាស៊ាន-ជប៉ុន លោកឧត្តមសេនីយ៍ឯក Hoang Xuan Chien បានសង្កត់ធ្ងន់ថា បញ្ហាប្រឈមសន្តិសុខបែបប្រពៃណី និងមិនមែនប្រពៃណីបន្តវិវឌ្ឍដ៏ស្មុគស្មាញ ដោយមានផលប៉ះពាល់យ៉ាងសំខាន់លើប្រទេសនីមួយៗ ក៏ដូចជា សន្តិភាព ស្ថិរភាព និងការអភិវឌ្ឍក្នុងតំបន់ និងពិភពលោក។ ក្នុងបរិបទនោះ កិច្ចប្រជុំ ADMM+ បាននិងកំពុងបង្ហាញពីប្រសិទ្ធភាពរបស់ខ្លួនក្នុងការគ្រប់គ្រងសន្តិសុខក្នុងតំបន់ តាមរយៈការជំរុញកិច្ចសន្ទនា និងកិច្ចសហប្រតិបត្តិការ ដើម្បីឆ្លើយតបទៅនឹងបញ្ហាប្រឈម រួមចំណែកយ៉ាងសំខាន់ក្នុងការរក្សាសន្តិភាព និងស្ថិរភាពក្នុងតំបន់អាស៊ី-ប៉ាស៊ីហ្វិក។ ទីពីរ ទាក់ទងនឹងលទ្ធផលនៃកិច្ចសហប្រតិបត្តិការលើវិស័យការពារជាតិអាស៊ាន-ជប៉ុន លោកឧត្តមសេនីយ៍ឯក Hoang Xuan Chien បានឲ្យដឹងថា ក្នុងឆ្នាំ២០២៤ ជប៉ុនបានជំរុញកិច្ចសហប្រតិបត្តិការលើគ្រប់ជ្រុងជ្រោយជាមួយអាស៊ានដោយមានសកម្មភាពជាក់ស្ដែងជាច្រើន។ សកម្មភាពទាំងនោះបានរួមចំណែកជួយបណ្ដាប្រទេសអាស៊ានក្នុងការលើកកម្ពស់សមត្ថភាពឆ្លើយតបទៅនឹងបញ្ហាប្រឈមសន្តិសុខមិនមែនប្រពៃណី ចូលរួមចំណែកយ៉ាងសំខាន់ក្នុងការពង្រឹងទំនាក់ទំនងការពារជាតិរវាងអាស៊ាន និងជប៉ុនឡើងកម្រិតខ្ពស់ថ្មីមួយ សមស្របនឹងទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ។ ទី៣ ចំពោះទិសដៅជំរុញកិច្ចសហប្រតិបត្តិការអាស៊ាន-ជប៉ុននាពេលខាងមុខ លោកឧត្តមសេនីយ៍ឯក Hoang Xuan Chien បានសង្កត់ធ្ងន់លើការរក្សាកិច្ចសន្ទនា និងកិច្ចពិគ្រោះយោបល់ជាន់ខ្ពស់នៅយន្តការនានា ក៏ដូចជាសកម្មភាពសហប្រតិបត្តិការដូចជា ការផ្លាស់ប្តូរគណៈប្រតិភូ ការចែករំលែកព័ត៌មាន សន្និសីទ និងសិក្ខាសាលា កិច្ចសហការយ៉ាងជិតស្និទ្ធក្នុងយន្តការនៃតំបន់ និងអន្តរជាតិ ដើម្បីធានាសន្តិភាព និងស្ថិរភាពក្នុងតំបន់ ជាពិសេសសន្តិសុខ និងសុវត្ថិភាពនាវាចរណ៍ និងអាកាសចរណ៍នៅសមុទ្រខាងកើត ដោះស្រាយវិវាទដោយសន្តិវិធី ស្របតាមច្បាប់អន្តរជាតិ បន្តស្រាវជ្រាវ និងពង្រីកកិច្ចសហប្រតិបត្តិការនៅលើវិស័យសសរស្តម្ភរបស់ JASMINE ដែលជប៉ុនមានប្រៀបខ្លាំង និងអាស៊ានមានតម្រូវការ...

លោកឧត្តមសេនីយ៍ឯក Hoang Xuan Chien ជួបជាមួយលោកនាយឧត្តមសេនីយ៍ ណឹម សុវត្ថិ

* នាថ្ងៃដដែល លោកឧត្តមសេនីយ៍ឯក Hoang Xuan Chien បានជួបជាមួយលោកនាយឧត្តមសេនីយ៍ ណឹម សុវត្ថិ អគ្គនាយកនៃអគ្គនាយកដ្ឋាននយោបាយ និងកិច្ចការបរទេសក្រសួងការពារជាតិកម្ពុជា ភាគីទាំងពីរបានវាយតម្លៃខ្ពស់ចំពោះទំនាក់ទំនងសហប្រតិបត្តិការទ្វេភាគីលើវិស័យការពារជាតិនៅពេលកន្លងមក និងឯកភាពបន្តសហការយ៉ាងជិតស្និទ្ធ អនុវត្តប្រកបដោយប្រសិទ្ធភាពនូវខ្លឹមសារនៃកិច្ចសហប្រតិបត្តិការលើវិស័យការពារជាតិរវាងប្រទេសទាំងពីរនាពេលខាងមុខ។ ភាគីទាំងពីរក៏បានឯកភាពបន្តរក្សាកិច្ចពិគ្រោះយោបល់ និងគាំទ្រគ្នាទៅវិញទៅមកនៅវេទិកាពហុភាគី ដែលភាគីទាំងពីរជាសមាជិក ពង្រឹងសាមគ្គីភាព និងកិច្ចសហប្រតិបត្តិការក្នុងតំបន់អាស៊ាន លើកកម្ពស់តួនាទីជាមជ្ឈភាពរបស់អាស៊ានក្នុងតំបន់ ក៏ដូចជាក្នុងពិភពលោក។

*នាថ្ងៃដដែល ក្នុងឱកាសចូលរួមកិច្ចប្រជុំអនុរដ្ឋមន្ត្រីការពារជាតិអាស៊ាន-ជប៉ុនលើកទី១៤ លោកឧត្តមសេនីយ៍ឯក Hoang Xuan Chien បានជួបពិភាក្សាទ្វេភាគីជាមួយប្រធានគណៈប្រតិភូមកពីប្រទេសម៉ាឡេស៊ី ថៃ ឡាវ៕

បកប្រែដោយ Thanh Cong