កងទ័ពជើងទឹកវៀតណាមចូលរួមយ៉ាងសកម្មក្នុងសកម្មភាពនៅសមយុទ្ធ Kakadu

លោកឧត្តមនាវីត្រី Christopher Smith មេបញ្ជាការកងនាវាចរនៃកងទ័ពជើងទឹកអូស្ត្រាលី ទទួលជួបលោកឧត្តមនាវីត្រី Nguyen Viet Khanh នាយរងសេនាធិការ នៃកងទ័ពជើងទឹកវៀតណាម

នារសៀលថ្ងៃទី ១១ ខែកញ្ញា លោកឧត្តមនាវីត្រី Christopher Smith មេបញ្ជាការកងនាវាចរ នៃកងទ័ពជើងទឹកអូស្ត្រាលី បានទទួលជួបលោកឧត្តមនាវីត្រី Nguyen Viet Khanh នាយរងសេនាធិការ នៃកងទ័ពជើងទឹកវៀតណាម។ លោកឧត្តមនាវីត្រី Christopher Smith បានថ្លែងអំណរគុណចំពោះវៀតណាម ដែលជាលើកដំបូងបានបញ្ជូននាវាអញ្ជើញចូលរួមក្នុងសកម្មភាពនានាក្នុងក្របខ័ណ្ឌនៃសមយុទ្ធ ដោយអះអាងថា ការចូលរួមរបស់កងទ័ពជើងទឹកវៀតណាមមានសារៈសំខាន់ចំពោះជោគជ័យនៃសមយុទ្ធ Kakadu ២០២៤។ លោកឧត្តមនាវីត្រី Nguyen Viet Khanh បានថ្លែងអំណរគុណចំពោះកងទ័ពជើងទឹកភូមិន្ទអូស្ត្រាលីដែលបានអញ្ជើញកងទ័ពជើងទឹកវៀតណាមចូលរួមក្នុងសមយុទ្ធនេះ ដោយចាត់ទុកថា នេះជាឱកាសដើម្បីស្វែងយល់ ចែករំលែកបទពិសោធន៍ និងពង្រឹងចំណងសាមគ្គីភាព និងមិត្តភាពរវាងកងទ័ពជើងទឹកនៃបណ្តាប្រទេស។

នាថ្ងៃទី១១ ខែកញ្ញា ដដែល នាយទាហាន និងនាវិកនៃនាវាលេខ ១៨ បានចូលរួមក្នុងការប្រកួតកីឡាដូចជាបាល់ទាត់ បាល់ទះ ជាមួយកងទ័ពជើងទឹក នៃបណ្តាប្រទេសដែលចូលរួមនៅ Kakadu ឆ្នាំ២០២៤។ ក្រុមសិល្បៈនៃកងទ័ពជើងទឹកវៀតណាមក៏ចូល​រួម​សម្តែងសិល្បៈ​​ក្នុង​កម្មវិធី​ផ្លាស់ប្តូរវប្បធម៌ម្ហូបអាហារ ដែលត្រូវបានមិត្តភក្តិអន្តរជាតិកោតសរសើរយ៉ាងខ្លាំង។

កងទ័ពជើងទឹកវៀតណាមចូលរួមយ៉ាងសកម្មក្នុងសកម្មភាពនៅសមយុទ្ធ Kakadu

គួររំលឹកថា នាព្រឹកថ្ងៃទី១០ ខែកញ្ញា លោកឧត្តមនាវីត្រី Nguyen Viet Khanh បានអញ្ជើញចូលរួមសន្និសីទមេបញ្ជាការកងនាវាចរ ដែលដឹកនាំដោយលោកឧត្តមនាវីត្រី Christopher Smith ដោយមានការចូលរួមពីតំណាងកងទ័ពជើងទឹកជាង ៣០ នាក់មកពីប្រទេសផ្សេងៗ។ នៅក្នុងសន្និសីទ ប្រតិភូបានចែករំលែកបទពិសោធន៍ក្នុងការកាត់បន្ថយការខូចខាតដែលបណ្តាលមកពីគ្រោះមហន្តរាយធម្មជាតិ និងជំងឺរាតត្បាត ហើយបានឯកភាពលើការពង្រឹងកិច្ចសហប្រតិបត្តិការអន្តរជាតិ ដើម្បីគាំទ្រគ្នាទៅវិញទៅមកក្នុងស្ថានភាពចាំបាច់។

នៅថ្ងៃទី១២ ខែកញ្ញា នាវាលេខ ១៨ និងនាវាផ្សេងទៀត ដែលចូលរួមក្នុងសមយុទ្ធ Kakadu ២០២៤ បានចាកចេញពីកំពង់ផែ ហើយបានចាប់ផ្តើមធ្វើសមយុទ្ធនៅសមុទ្រតាមការគ្រោងទុក៕

បកប្រែដោយ Duy Hoan