លោកនាយឧត្តមសេនីយ៍ Luong Cuong ជួបពិភាក្សាការងារជាមួយប្រធានអគ្គស្នងការនយោបាយនៃកងទ័ពប្រជាជនឡាវ

បន្ទាប់ពីពិធីទទួលបដិសណ្ឋារកិច្ចនៅទីស្នាក់ការក្រសួងការពារប្រទេស នាព្រឹកថ្ងៃទី ២៦ កញ្ញា លោកនាយឧត្តមសេនីយ៍ Luong Cuong ប្រធានអគ្គស្នងការនយោបាយនៃកងទ័ពប្រជាជនវៀតណាម បានជួបពិភាក្សាការងារជាមួយលោកឧត្តមសេនីយ៍ឯក Thongloi Silivong អនុរដ្ឋមន្ត្រីក្រសួងការពារជាតិ និងប្រធានអគ្គស្នងការនយោបាយនៃកងទ័ពប្រជាជនឡាវ។

លោកនាយឧត្តមសេនីយ៍ Luong Cuong និងលោកឧត្តមសេនីយ៍ឯក Thongloi Silivong

ភាគីទាំងពីរបានឯកភាពវាយតម្លៃថា កិច្ចសហប្រតិបត្តិការលើវិស័យការពារជាតិបន្តបញ្ជាក់ពីតួនាទីរបស់ខ្លួនដែល​ជា​សសរស្តម្ភដ៏សំខាន់មួយនៃទំនាក់ទំនងវៀតណាម-ឡាវ។ ក្រសួងការពារជាតិ និងកងទ័ពនៃប្រទេសទាំងពីរតែងតែសហកា​រ​យ៉ាងជិតស្និទ្ធ ផ្តល់យោបល់ប្រកបដោយប្រសិទ្ធភាពជូនថ្នាក់ដឹកនាំជាន់ខ្ពស់នៃប្រទេសទាំងពីរលើការងារយោធា-ការពារជាតិ រួមចំណែកយ៉ាងសំខាន់ក្នុងការថែរក្សាបរិយាកាសសន្តិភាពក្នុងប្រទេសនីមួយៗដើម្បីអភិវឌ្ឍន៍រួមគ្នា អនុវត្តយ៉ាងទូលំទូលាយ និងជាក់ស្តែងនូវពិធីសារស្តីពីកិច្ចសហប្រតិបត្តិការលើវិស័យការពារជាតិ និងផែនការសហប្រតិបត្តិការប្រចាំឆ្នាំ។ កិច្ចសហប្រតិបត្តិការរវាងអគ្គស្នងការដ្ឋាននយោបាយនៃកងទ័ពប្រជាជនវៀតណាម និងអគ្គស្នងការដ្ឋាននយោបាយនៃកងទ័ពប្រជាជនឡាវ រួមចំណែកយ៉ាងសំខាន់ក្នុងការអភិវឌ្ឍទំនាក់ទំនងរវាងប្រទេសទាំងពីរ និងកងទ័ពទាំងពីរ។

លោកនាយឧត្តមសេនីយ៍ Luong Cuong

លោកឧត្តមសេនីយ៍ឯក Thongloi Silivong

អំពីទិសដៅនៃកិច្ចសហប្រតិបត្តិការនាពេលខាងមុខ ភាគីទាំងពីរបានឯកភាពថា កិច្ចសហប្រតិបត្តិការលើវិស័យការពារជាតិទ្វេភាគីនិយាយរួម កិច្ចសហប្រតិបត្តិការរវាងអគ្គស្នងការដ្ឋាន​នយោបាយនៃកងទ័ពប្រជាជនវៀតណាម និងអគ្គស្នងការដ្ឋាន​នយោបាយនៃកងទ័ពប្រជាជនឡាវនិយាយដោយឡែក ត្រូវសម្របសម្រួល និងអនុវត្តប្រកបដោយប្រសិទ្ធភាព ស្របតាមទស្សនៈរួមរបស់ថ្នាក់ដឹកនាំជាន់ខ្ពស់នៃបក្សទាំងពីរ រដ្ឋទាំងពីរ និងលទ្ធផលនៃកិច្ចប្រជុំកំពូលវៀតណាម-កម្ពុជា-ឡាវ (ថ្ងៃទី៦ ខែកញ្ញា ឆ្នាំ២០២៣)។ អាស្រ័យលើនេះ ភាគីទាំងពីរនឹងបន្តសម្របសម្រួលយ៉ាងជិតស្និទ្ធ និងមានប្រសិទ្ធភាពក្នុងការផ្សព្វផ្សាយ និងអប់រំអំពីប្រវត្តិសាស្ត្រ អត្ថន័យ និងសារៈសំខាន់នៃទំនាក់ទំនងមិត្តភាព សាមគ្គីភាពពិសេស និងកិច្ចសហប្រតិបត្តិការលើគ្រប់វិស័យរវាងបក្សទាំងពីរ រដ្ឋទាំងពីរ កងទ័ព និងប្រជាជននៃប្រទេសទាំងពីរ ជាពិសេសក្នុងឱកាសរំលឹកខួបលើកទី ៨០ នៃការបង្កើតកងទ័ពប្រជាជនវៀតណាម ខួបលើកទី ៧៥ នៃការបង្កើតកងទ័ពប្រជាជនឡាវ និងខួបលើកទី ៧០ នៃជ័យជំនះ Dien Bien Phu នៅឆ្នាំ ២០២៤។

ទិដ្ឋភាពនៃកិច្ចពិភាក្សា

ភាគីទាំងពីរបន្តយកចិត្តទុកដាក់លើកិច្ចសហប្រតិបត្តិការលើវិស័យបណ្តុះបណ្តាល និងអភិវឌ្ឍន៍ធនធានមនុស្ស បន្តសម្របសម្រួល និងដឹកនាំការរុករក ប្រមូល និងធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្ត និងអ្នកជំនាញវៀតណាម ដែលបានពលីជីវិតនៅឡាវក្នុងសម័យសង្គ្រាម។ ភាគីទាំងពីរនឹងបង្កើន​ការសម្របសម្រួល និងគាំទ្រគ្នាទៅវិញទៅមកនៅវេទិកា និងយន្តការពហុភាគី ជាពិសេសវេទិកា និងយន្តការដែលដឹកនាំដោយអាស៊ាន។ តាមសមត្ថភាពរបស់ខ្លួន ក្រសួងការពារប្រទេស និងកងទ័ពប្រជាជនវៀតណាម ត្រៀមខ្លួនជាស្រេចចែករំលែកបទពិសោធន៍ និងគាំទ្រក្រសួងការពារជាតិ និងកងទ័ពប្រជាជនឡាវ ទទួលជោគជ័យក្នុងតួនាទីជាប្រធានកិច្ចប្រជុំយោធា-ការពារជាតិអាស៊ានឆ្នាំ ២០២៤៕

បកប្រែដោយ Thanh Cong