កិច្ចពិគ្រោះយោបល់ការពារជាតិទ្វេភាគី វៀតណាម - នូវែលហ្សេឡង់
កប.អនឡាញ - នាថ្ងៃទី ១៧ ខែកញ្ញា កិច្ចពិគ្រោះយោបល់ការពារជាតិទ្វេភាគីរវាងវៀតណាម និងនូវែលហ្សេឡង់
ត្រូវបានរៀបចំឡើងនៅទីក្រុងហាណូយ តាមរយៈប្រព័ន្ធវីដេអូ ក្រោមសហអធិបតីរបស់លោកឧត្តមសេនីយ៍ទោ Vu Chien Thang ប្រធាននាយកដ្ឋានការបរទេស ក្រសួងការពារប្រទេសវៀតណាម និងលោក Mike Thompson ប្រធានស្តីទីនាយកដ្ឋានអន្តរជាតិក្រសួងការពារជាតិនូវែលហ្សេឡង់។
ក្នុងឱកាសនេះ ភាគីទាំងពីរបានពិនិត្យលើការអនុវត្តផែនការសហប្រតិបត្តិការក្នុងដំណាក់កាលទី ៣ សម្រាប់ឆ្នាំ ២០១៨-២០២១ ព្រមទាំងលើកឡើងសកម្មភាពសហប្រតិបត្តិការនាពេលខាងមុខ និងពិភាក្សាស្ថានភាពពិភពលោក និងតំបន់ដែលភាគីទាំងពីរមានការយកចិត្តទុកដាក់ដូចគ្នា។ ភាគីទាំងពីរបានសម្តែងនូវគោលបំណងចង់ជំរុញបន្ថែមទៀតនូវទំនាក់ទំនងការពារជាតិទ្វេភាគី ដោយសន្យាគាំទ្រសណ្តាប់ធ្នាប់អន្តរជាតិ ដែលផ្អែកលើច្បាប់ក៏ដូចជាតួនាទីរបស់ស្ថាប័នពហុភាគីផងដែរ។
|
|
ទិដ្ឋភាពនៃកិច្ចពិគ្រោះយោបល់ |
ភាគីទាំងពីរបានឯកភាពបន្តពង្រឹងការផ្លាស់ប្តូរគណៈប្រតិភូគ្រប់លំដាប់ថ្នាក់ ដោយផ្តល់អាទិភាពលើវិស័យសហប្រតិបត្តិការដូចជា៖ សកម្មភាពរក្សាសន្តិភាពរបស់អង្គការសហប្រជាជាតិ សន្តិសុខនៅសមុទ្រ ការបណ្តុះបណ្តាល និងយន្តការនៃកិច្ចសន្ទនាទ្វេភាគី។
នៅកិច្ចពិគ្រោះយោបល់ លោកឧត្តមសេនីយ៍ទោ Vu Chien Thang បានជម្រាបជូនអំពីសកម្មភាពពហុភាគីក្នុងឆ្នាំដែលវៀតណាមជាប្រធានអាស៊ាន និងជាសមាជិកមិនអចិន្រ្តៃយ៍នៃក្រុមប្រឹក្សាសន្តិសុខអង្គការសហប្រជាជាតិ ក៏ដូចជាទិសដៅសម្រាប់កិច្ចសហប្រតិបត្តិការការពារជាតិពហុភាគី នាពេលខាងមុខ។
ភាគីនូវែលហ្សេឡង់បានចែករំលែកអំពីវឌ្ឍនភាពនៃការកសាងសៀវភៅសការពារជាតិ ព្រមទាំងបានបង្ហាញនូវគោលបំណងចង់ចូលរួមចំណែកក្នុងការថែរក្សាសន្តិភាព និងស្ថិរភាពនៅសមុទ្រខាងកើត ដោយសន្យាគាំទ្រវៀតណាមក្នុងនាមជាប្រធានអាស៊ាន និងសង្កត់ធ្ងន់លើសារៈសំខាន់នៃកិច្ចសហប្រតិបត្តិការក្នុងការដោះស្រាយបញ្ហាប្រឈមសន្តិសុខមិនមែនប្រពៃណី៕
បកប្រែដោយ Huyen Trang