លោកនាយឧត្តមសេនីយ៍ Nguyen Tan Cuong៖ ការហ្វឹកហ្វឺនត្រូវមានការផ្លាស់ថ្មី និងលើកកម្ពស់គុណភាព

ឆ្នាំ២០២៦ កងកម្លាំងប្រដាប់អាវុធខេត្ត Dong Thap បន្តផ្លាស់ថ្មីក្នុងភារកិច្ចហ្វឹកហ្វឺន ស្របតាមសេចក្តីសម្រេចចិត្ដរបស់គណៈកម្មាធិការបក្សយោធា​មជ្ឈិម គណៈកម្មាធិការបក្សយោធភូមិភាគទី ៩ និងគណៈកម្មាធិការបក្សយោធាខេត្តស្តីពីការលើកកម្ពស់គុណភាពហ្វឹកហ្វឺន រៀបចំការហ្វឹកហ្វឺន និងលំហាត់ហ្វឹកហ្វឺនសម្រាប់មុខសញ្ញា ដោយធានានូវខ្លឹមសារ និងពេលវាលាគ្រប់គ្រាន់ និងកម្មវិធីដែលបានកំណត់។

លោកនាយឧត្តមសេនីយ៍  Nguyen Tan Cuong ថ្លែងក្នុងពិធីបើកការហ្វឹកហ្វឺនក្នុងកងទ័ពទាំងមូល

ក្នុងនាមគណៈកម្មាធិការបក្សយោធាមជ្ឈិម និងថ្នាក់ដឹកនាំក្រសួងការពារប្រទេស លោកនាយឧត្តមសេនីយ៍ Nguyen Tan Cuong លើកសរសើរចំពោះសមិទ្ធផលដែលកងកម្លាំងប្រដាប់អាវុធខេត្តសម្រេចបានក្នុងឆ្នាំកន្លងមក ព្រមទាំងសង្កត់ធ្ងន់ថា៖ ដោយផ្អែកលើបទបញ្ជាអំពីយោធា ការពារជាតិឆ្នាំ២០២៦ កងកម្លាំងប្រដាប់អាវុធខេត្តត្រូវបន្តអនុវត្តប្រកបដោយប្រសិទ្ធភាពនូវសេចក្តីសម្រេចចិត្ដរបស់គណៈកម្មាធិការបក្សយោធាមជ្ឈិម និងសេចក្តីសម្រេចចិត្ដរបស់គណៈកម្មាធិការបក្សគ្រប់លំដាប់ថ្នាក់ស្តីពីការដឹកនាំការលើកកម្ពស់គុណភាពហ្វឹកហ្វឺនក្នុងដំណាក់កាលឆ្នាំ ២០២៥-២០៣០ និងឆ្នាំបន្តបន្ទាប់។

ចំពោះមុខតម្រូវការនៃភារកិច្ចកាន់តែខ្ពស់ គណៈកម្មាធិការបក្ស និងមេបញ្ជាការគ្រប់លំដាប់ថ្នាក់ត្រូវតែអប់រំជាប្រចាំ និងជ្រួតជ្រាបយ៉ាងជ្រាលជ្រៅអំពីភារកិច្ចនយោបាយរបស់កងទ័ពនៅក្នុងស្ថានភាពថ្មី រៀបចំការហ្វឹកហ្វឺនសម្រាប់យោធិន កងកម្លាំងបំរុង កងសេនាជន។ លំហាត់ហ្វឹកហ្វឺនយុទ្ធវិធី និងលំហាត់ហ្វឹកហ្វឺនតំបន់ការពារទប់ទល់ត្រូវបានធ្វើឡើងតាមផែនការដែលស្របទៅនឹងលក្ខណៈភូមិសាស្ត្រ និងភារកិច្ចជាក់ស្តែងៗល។

លោកនាយឧត្តមសេនីយ៍  Nguyen Tan Cuong លើកទឹកចិត្ដកម្មាភិបាលនិងយុទ្ធជន

លោកនាយឧត្តមសេនីយ៍ Nguyen Tan Cuong បានសង្កត់ធ្ងន់ថា៖ ការកសាងកងទ័ពប្រកបដោយបដិវត្តន៍ របៀបរៀបរយ ចំណាន និងទំនើប ដែលតម្រូវឲ្យការហ្វឹកហាត់ត្រូវមានការផ្លាស់ថ្មី និងលើកកម្ពស់គុណភាព។ ដូច្នេះ ចាំបាច់ត្រូវពង្រឹងការហ្វឹកហ្វឺនពេលយប់ ការហ្វឹកហ្វឺនចល័ត ការហ្វឹកហ្វឺនតាមស្ថានភាពជាក់ស្ដែង និងហ្វឹកហ្វឺនរាងកាយ ដោយធានាថា កម្មាភិបាល និងយុទ្ធជនមានសុខភាពល្អ និងអាចបំពេញភារកិច្ចក្នុងរយៈពេលច្រើនថ្ងៃក្នុងគ្រប់លក្ខណ្ឌភូមិសាស្ដ្រ និងអាកាសធាតុ៕

បកប្រែដោយ Pham Diep