លោកនាយឧត្តមសេនីយ៍ Nguyen Tan Cuong អញ្ជើញជាអធិបតីក្នុងពិធីទទួលបដិសណ្ឋារកិច្ច និងជួបពិភាក្សាការងារជាមួយអគ្គសេនាធិការនៃបណ្ដាកងកម្លាំងប្រដាប់អាវុធបេឡារុស្ស

លោកនាយឧត្តមសេនីយ៍ Nguyen Tan Cuong និងឧត្តមសេនីយ៍ត្រី Pavel Muraveiko ត្រួតពលកងកិត្តិយសកងទ័ពប្រជាជនវៀតណាម

នៅក្នុងកិច្ចពិភាក្សានេះ ភាគីទាំងពីរបានចែករំលែកនូវទស្សនៈនូវស្ថានភាព ពិភពលោក និងតំបន់ និងបញ្ហាដែលមានការយកចិត្តទុកដាក់គ្នាទៅវិញទៅមក។ លោកនាយឧត្តមសេនីយ៍ Nguyen Tan Cuong បានសង្កត់ធ្ងន់ថា អាស៊ានគឺជាកត្តាស្នូលក្នុងការកំណត់និម្មាបនកម្មតំបន់ តាមរយៈយន្តការដឹកនាំដោយអាស៊ាន។ វៀតណាមគាំទ្រ និងរួមជាមួយនឹងសមាជិករបស់ខ្លួន ពង្រឹងតួនាទីមជ្ឈភាពរបស់អាស៊ាន ពង្រឹងសាមគ្គីភាពនិងឯកភាពក្នុងប្លុក បង្រួមភាពខុសគ្នានិងជំរុញកិច្ចសហប្រតិបត្តិការជាមួយដៃគូនានា។

អំពីសមុទ្រខាងកើត វៀតណាមបន្តដោះស្រាយរាល់ការខ្វែងគំនិតគ្នានៅសមុទ្រខាងកើតដោយសន្តិវិធី ស្របតាមច្បាប់អន្តរជាតិ រួមទាំងអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ ១៩៨២ (UNCLOS 1982); អនុវត្តប្រកបដោយប្រសិទ្ធភាព និងពេញលេញនូវសេចក្តីថ្លែងការណ៍ស្តីពីការប្រតិបត្តិរបស់ភាគីនានានៅសមុទ្រខាងកើត (DOC) និងឆាប់បញ្ចប់ការចរចា និងចុះហត្ថលេខាលើក្រមប្រតិបត្តិនៅសមុទ្រខាងកើត (COC) ប្រកបដោយប្រសិទ្ធភាព។

លោកនាយឧត្តមសេនីយ៍ Nguyen Tan Cuong និងលោកឧត្តមសេនីយ៍ត្រី Pavel Muraveiko

លោកនាយឧត្តមសេនីយ៍ Nguyen Tan Cuong បានអះអាងថា វៀតណាមអនុវត្ដគោលនយោបាយការបរទេសឯករាជ្យ ខ្លួនទីពឹងខ្លួន សន្តិភាព មិត្តភាព សហប្រតិបត្តិការនិងអភិវឌ្ឍន៍ វៀតណាមគឺជាមិត្ត ជាដៃគូដែលគួរឲ្យទុកចិត្ត និងជាសមាជិកសកម្ម និងទទួលខុសត្រូវនៃសហគមន៍អន្តរជាតិ។ ប្រកាន់ខ្ជាប់នូវគោលនយោបាយការពារជាតិ "៤ មិន " ដើម្បីផលប្រយោជន៍រួម ដើម្បីការអភិវឌ្ឍន៍ និងវិបុលភាពក្នុងតំបន់ និងពិភពលោក។

នាពេលខាងមុខ លោកនាយឧត្តមសេនីយ៍ Nguyen Tan Cuong បានស្នើ ភាគីទាំងពីរបន្តសហការយ៉ាងជិតស្និទ្ធក្នុងការរក្សាការផ្លាស់ប្តូរគណៈប្រតិភូ និងគ្រប់លំដាប់ថ្នាក់; អនុវត្តប្រកបដោយប្រសិទ្ធភាពនូវខ្លឹមសារនៃកិច្ចសហប្រតិបត្តិការដែលបានចុះហត្ថលេខា។ រក្សាការផ្លាស់ប្តូរនិងកិច្ចសហប្រតិបត្តិការរវាងអង្គភាពយោធានៃប្រទេសទាំងពីរ។ ពង្រឹងកិច្ចសហប្រតិបត្តិការលើវិស័យបណ្តុះបណ្តាលនិងកីឡាយោធា ហើយបន្តគាំទ្រ និងចូលរួមយ៉ាងសកម្មនៅក្នុងពិព័រណ៍ការពារជាតិអន្តរជាតិ ដែលរៀបចំដោយភាគីនីមួយៗ។ ព្រមទាំងសិក្សាស្រាវជ្រាវលើវិស័យសហប្រតិបត្ដិការដែលមានសក្តានុពលផ្សេង ដូចជាវិទ្យាសាស្ត្រយោធា និងវេជ្ជសាស្ត្រយោធា។

លោកនាយឧត្តមសេនីយ៍ Nguyen Tan Cuong ជឿជាក់ថា ដំណើរទស្សនៈកិច្ចលើកនេះនឹងរួមចំណែកពង្រឹង និងពង្រីកថែមទៀតនូវកិច្ចសហប្រតិបត្តិការលើវិស័យការពារជាតិទ្វេភាគីនិយាយដោយឡែក ព្រមទាំងរួមចំណែកដល់ទំនាក់ទំនងមិត្តភាពជាប្រពៃណី ភាពជាដៃគូយុទ្ធសាស្ត្ររវាងវៀតណាមនិងបេឡារុស្ស ដើម្បីផលប្រយោជន៍ប្រជាជននៃប្រទេសទាំងពីរ ដើម្បីសន្តិភាព ស្ថិរភាព និងការអភិវឌ្ឍរួម។

ទិដ្ឋភាពនៃកិច្ចពិភាក្សាការងារ

រីឯខ្លួនវិញ លោកឧត្តមសេនីយ៍ត្រី Pavel Muraveiko បានបញ្ជាក់ថា វៀតណាមនិងបេឡារុស្ស គឺជាប្រទេសពីរដែលមានភាពស្រដៀងគ្នាជាច្រើន ដោយបានឆ្លងកាត់ការតស៊ូដណ្ដើមឯករាជ្យ និងរំដោះជាតិ។ ព្រមទាំងកត់សម្គាល់នូវលទ្ធផលវិជ្ជមានក្នុងកិច្ចសហប្រតិបត្តិការការពារជាតិទ្វេភាគីក្នុងរយៈពេលកន្លងមក  ហើយអះអាងថា សក្ដានុពលនៃកិច្ចសហប្រតិបត្តិការរវាងប្រទេសទាំងពីរនៅមានច្រើនណាស់; លោកឧត្តមសេនីយ៍ត្រី Pavel Muraveiko ឯកភាពជាមួយទស្សនៈនិងការវាយតម្លៃរបស់វៀតណាមអំពីស្ថានភាពពិភពលោក និងតំបន់។ ព្រមទាំងអះអាងថា បេឡារុស្សត្រៀមខ្លួនជាស្រេចដើម្បីកិច្ចសហប្រតិបត្តិការជាមួយបណ្តាប្រទេសដែលមានគោលនយោបាយមិត្តភាពដើម្បីការអភិវឌ្ឍរួមគ្នាដើម្បីស្ថិរភាព និងសន្តិភាពក្នុងតំបន់ និងពិភពលោក។

* នៅព្រឹកថ្ងៃទី២០ ខែតុលា លោកឧត្តមសេនីយ៍ត្រី Pavel Muraveiko និងគណៈប្រតិភូបេឡារុស្ស បានដាក់កម្រងផ្កានៅវិមានរំលឹកវិញ្ញាណក្ខន្ធវីរជនពលីនៅផ្លូវ Bac Son និងដាក់កម្រងផ្កាគោរពវិញ្ញាណក្ខន្ធលោកប្រធានហូជីមិញនៅវិមានតម្កល់សព។

បកប្រែដោយ Pham Diep