ពង្រឹងកិច្ចសន្ទនា និងដាក់ចេញនូវគំនិតផ្តួចផ្តើមនៃកិច្ចសហប្រតិបត្តិការលើការរក្សាសន្តិភាពរបស់អង្គការសហប្រជាជាតិ

កិច្ចប្រជុំនេះ បានប្រព្រឹត្តទៅចាប់ពីថ្ងៃទី ១៣ ដល់ថ្ងៃទី ១៨ ខែតុលា នៅទីក្រុង New Delhi (ប្រទេសឥណ្ឌា) ក្រោមប្រធានបទ "លើកកម្ពស់សមត្ថភាព និងការកៀងគរធនធានសម្រាប់បេសកកម្មរក្សាសន្តិភាពប្រកបដោយនិរន្តរភាពរបស់អង្គការសហប្រជាជាតិ"។ នេះជាលើកទីមួយហើយដែលកិច្ចប្រជុំនេះត្រូវបានធ្វើឡើងដើម្បីបង្កើតវេទិកាសម្រាប់នាយសេនាធិការនៃបណ្ដាប្រទេសពង្រឹងការសន្ទនា ការយល់ដឹងគ្នាទៅវិញទៅមក និងដាក់ចេញនូវគំនិតផ្តួចផ្តើមនៃកិច្ចសហប្រតិបត្តិការលើការរក្សាសន្តិភាពរបស់អង្គការសហប្រជាជាតិ។

លោកឧត្តមសេនីយ៍ឯក Nguyen Van Nghia និងគណៈប្រតិភូអន្តរជាតិនៅក្នុងកិច្ចប្រជុំ

ថ្លែងក្នុងកិច្ចប្រជុំនេះ លោកឧត្តមសេនីយ៍ឯក Nguyen Van Nghia បានលើកច្បាស់ថា វៀតណាមអះអាងនូវគោលនយោបាយឥតងាករេ និងការប្តេជ្ញាចិត្តក្នុងការចូលរួមក្នុងសកម្មភាពរក្សាសន្តិភាពរបស់អង្គការសហប្រជាជាតិ ដោយចាត់ទុកថានេះជាខ្លឹមសារសំខាន់មួយដែលបង្ហាញពីទំនួលខុសត្រូវអន្តរជាតិ ក៏ដូចជាគោលនយោបាយការបរទេសឯករាជ្យ ខ្លួនទីពឹងខ្លួន សន្តិភាព សហប្រតិបត្តិការ និងអភិវឌ្ឍន៍។

ដើម្បីសម្រេចបានសន្តិភាពប្រកបដោយនិរន្តរភាព សហគមន៍អន្តរជាតិចាំបាច់ត្រូវរួមដៃគ្នាលើកកំពស់ជីវភាពរស់នៅរបស់ប្រជាជននៅតំបន់ដែលរង​ផលប៉ះពាល់ដោយជម្លោះ និងសង្គ្រាម គាំទ្រពួកគេដើម្បីស្តារទំនុកចិត្ត ស្ថិរភាពជីវិត និងកសាងសន្តិភាពយូរអង្វែង។

លោកឧត្តមសេនីយ៍ឯក Nguyen Van Nghia ថ្លែងក្នុងកិច្ចប្រជុំ

ទិដ្ឋភាពនៃកិច្ចប្រជុំ

លោកឧត្តមសេនីយ៍ឯក Nguyen Van Nghia បានលើកដំណោះស្រាយមួយចំនួនដើម្បីលើកកម្ពស់ប្រសិទ្ធភាពនៃប្រតិបត្តិការរក្សាសន្តិភាពរបស់អង្គការសហប្រជាជាតិរួមមាន៖ ផ្តោតលើការត្រៀមរៀបចំកម្លាំង បង្កើនការហ្វឹកហ្វឺននិងបណ្តុះបណ្តាល  និងធានាឧបករណ៍គ្រប់គ្រាន់ ឆ្លើយតបនឹងបរិយាកាសការងារដែលមានតម្រូវការកាន់តែកើនឡើងនៃស្ថានបេសកកម្ម លើកកម្ពស់ប្រសិទ្ធភាពនៅពេលធ្វើការក្នុងបរិយាកាសអន្តរជាតិពហុភាគី។ ជំរុញកិច្ចសហប្រតិបត្តិការអន្តរជាតិក្នុងការស្រាវជ្រាវ ចែករំលែកបទពិសោធន៍ គាំទ្រការលើកកម្ពស់សមត្ថភាព និងការអនុវត្តវិទ្យាសាស្ត្រ និងបច្ចេកវិទ្យា រួមទាំងបច្ចេកវិទ្យាឌីជីថល និងបញ្ញាសិប្បនិម្មិត (AI) ធានាសុវត្ថិភាពនៃកងកម្លាំងរក្សាសន្តិភាពអង្គការសហប្រជាជាតិ។

* ក្នុងក្របខ័ណ្ឌនៃកិច្ចប្រជុំ លោកឧត្តមសេនីយ៍ឯក Nguyen Van Nghia បានចូលជួបសម្តែងការគួរសមជាមួយលោក Rajnath Singh រដ្ឋមន្ត្រីការពារជាតិឥណ្ឌា និងជួបទ្វេភាគីជាមួយលោកនាយឧត្តមសេនីយ៍ Upendra Dwivedi នាយសេនាធិការនៃកងទ័ពជើងគោកឥណ្ឌា និងជួបក្រៅផ្លូវការជាមួយប្រមុខគណៈប្រតិភូមកពីប្រទេសជាច្រើន។

លោកឧត្តមសេនីយ៍ឯក Nguyen Van Nghia ជួបទ្វេភាគីជាមួយលោកនាយឧត្តមសេនីយ៍ Upendra Dwivedi នាយសេនាធិការនៃកងទ័ពឥណ្ឌា

ក្នុងជំនួបទាំងនេះ លោកឧត្តមសេនីយ៍ឯក Nguyen Van Nghia បានសង្កត់ធ្ងន់ថា ដោយឈរលើមូលដ្ឋាននៃទំនាក់ទំនងមិត្តភាពជាប្រពៃណី និងភាពជាដៃគូយុទ្ធសាស្ត្រគ្រប់ជ្រុងជ្រោយរវាងវៀតណាមនិងឥណ្ឌា កិច្ចសហប្រតិបត្តិការលើវិស័យការពារជាតិទ្វេភាគីត្រូវបានពង្រឹងនិងពង្រីកឥតឈប់ឈរ និងសម្រេចបានលទ្ធផលសំខាន់ៗជាច្រើន ក្នុងនោះកិច្ចសហប្រតិបត្តិការរក្សាសន្តិភាពរបស់អង្គការសហប្រជាជាតិបន្តជាចំណុចភ្លឺ ។ ភាគីទាំងពីរបានអនុវត្តប្រកបដោយប្រសិទ្ធភាពនូវកិច្ចសហប្រតិបត្តិការលើវិស័យជាច្រើនដូចជា ការផ្លាស់ប្តូរគណៈប្រតិភូគ្រប់ជាន់ថ្នាក់ ការហ្វឹកហ្វឺននិងបណ្តុះបណ្តាល។ ការផ្តល់ជំនួយឥតសំណងនិងរក្សាបាននូវយន្តការសហប្រតិបត្តិការប្រកបដោយប្រសិទ្ធភាព ដូចជា ការពិគ្រោះយោបល់នាយទាហានសេនាធិការ និងជំនួបប្រាស្រ័យនាយទាហានវ័យក្មេង។

ដោយចាត់ទុកថា សក្ដានុពលនៃកិច្ចសហប្រតិបត្តិការរវាងកងទ័ពទាំងពីរនៅមានធំធេងណាស់ លោកឧត្តមសេនីយ៍ឯក Nguyen Van Nghia បានស្នើភាគីទាំងពីរបន្តសហការយ៉ាងជិតស្និទ្ធដើម្បីអនុវត្តប្រកបដោយប្រសិទ្ធភាពលើវិស័យដូចជា ការផ្លាស់ប្តូរគណៈប្រតិភូគ្រប់ជាន់ថ្នាក់ ការបណ្ដុះបណ្ដាលនិងការរក្សាសន្តិភាពរបស់អង្គការសហប្រជាជាតិ ហើយទន្ទឹមនឹងនោះសិក្សាស្រាវជ្រាវលើលទ្ធភាពនៃកិច្ចសហប្រតិបត្តិការលើវិស័យផ្សេងទៀតដូចជាសន្តិសុខតាមអ៊ីនធឺណិត វេជ្ជសាស្ត្រយោធា និងជួយសង្គ្រោះជាដើម។

ថ្នាក់ដឹកនាំនៃក្រសួងការពារជាតិ និងកងទ័ពឥណ្ឌា បានកត់សម្គាល់នូវលទ្ធផលវិជ្ជមានក្នុងកិច្ចសហប្រតិបត្តិការការពារជាតិទ្វេភាគីនិយាយរួម និងកិច្ចសហប្រតិបត្តិការកងទ័ពជើងគោកនិយាយដោយឡែកនាពេលកន្លងមក ព្រមទាំងបញ្ជាក់ថា នាពេលខាងមុខ ភាគីទាំងពីរនឹងបន្តជំរុញកិច្ចសហប្រតិបត្តិការលើវិស័យរក្សាសន្តិភាពអង្គការសហប្រជាជាតិ ផ្លាស់ប្តូរគណៈប្រតិភូនាយទាហានវ័យក្មេង និងគ្រូបង្រៀន ក៏ដូចជាពង្រឹងកិច្ចសហប្រតិបត្តិការក្នុងការស្រាវជ្រាវយុទ្ធសាស្ត្រ រួមចំណែកធ្វើឱ្យកាន់តែស៊ីជម្រៅថែមទៀតនូវទំនាក់ទំនងមិត្តភាពជាប្រពៃណី ទំនុកចិត្ត និងកិច្ចសហប្រតិបត្តិការរវាងកងទ័ពទាំងពីរ។

បកប្រែដោយ Pham Diep